DEUTERONOMIO 24 - Biblia Quichua Cañar 2010

1Maijan cari shuc huarmihuan cazarashpa, chai huarmipi ima mana allita ricushpa, mana ricunayachishpaca, raquirishca quillcata paiman cushpa, huasimanta cachanallami.

2Chashna huasimanta cachacpica, huarmica shuctac carihuan cazarai pudinmi.

3Chai cusapish manallatac ricunayachishpa raquirishca quillcata huarmiman cushpa, huasimanta cachacpi, mana cashpaca cusa huañucpica,

4punta cusaca mana cutinllatac chai huarmihuan cazarai pudinchu. Chai huarmica mapayashcami can. Shina ruhuashpaca Mandac Diospac ñaupapi millanatami ruhuan. Mandac Dios cancunaman cushca llactataca juchata ruhuashpa, mana mapayachinachu canguichic.

5Maijan cunanlla cazarashca cashpaca, jatun macanacuimanpish, ima shuctac ruhuaicunamanpish mana rinachu can. Ashtahuanpish huarmita cushichishpami, shuc huatata huasillapi cana can.

6Imata mañachishpaca, ama cutana rumicunata prendashpa apanguichicchu. Shina apashpaca, causaipac minishtishcatami apanguichic.

7Maijan huauquita shuhuashpa, llaquichishpa charicucpi, mana cashpaca catushca cacpi, yachac chayashpaca, chai shuhuactaca huañuchinami canguichic. Chashna ruhuashpami, cancunapac chaupimanta millaita anchuchinguichic.

8Lepra ungüi ricuricpica, levita curacuna mandashcata allita yachacunguichic. Paicuna tucui nishcata ruhuanguichic. Ñuca nishcacunataca tucuita pactachinguichic.

9Mandac Dios Egipto llactamanta llucchimucucpi, Mariata imata ruhuashcata yuyaringuichic.

10Huauquiman imata mañachishpaca, ama prendata japingapac huasiman yaicunguichicchu.

11Mañac runa cutichingacaman canzhallapi shuyanguichic.

12Chai huaccha runapac prendata charicushpaca, ama cayacaman charicunguichicchu.

13Chai prendataca manarac inti tigracpi cutichinguichic. Shina cutichicpimi, paica cushilla canta alli nishpa sueñunga. Shinallatac Mandac Diospac ñaupapipish cashcata ruhuac nishcami canguichic.

14Imata mana charic, huaccha trabajac runataca cancunapura cacpipish, shuc llacta runa cancunapac llactapi causac runa cacpipish, ama llaquichinguichicchu.

15Trabajac runamanca manarac inti tigracpi, chai punzhallatac paganguichic. Paica huacchami, chai pagana cullquillatami charin. Chashna pagacpica, cancunata Mandac Dios llaquichichun mana mañangachu. Shina mana mañacpica, juchayucchu tucunguichic.

16Taitacunaca mana churicunapac juchamantaca huañungachu. Churicunapish mana taitacunapac juchamanta huañungachu. Ashtahuanpish quiquin juchamantaca, quiquinllatacmi huañunga.

17Shuctac llacta runa japinatapish, taita mama illaccuna japinatapish ama quichunguichicchu. Viudamantapish ama prendata japinguichicchu.

18Chaipac randica, cancunapish Egipto llactapi servishpa causacucpi, Mandac Dios llucchishcata yuyaringuichic. Chaimantami ñucaca caita cancuna ruhuachun mandani.

19Cancunapac trigota cosechapi, shuc gavilla cungarishpa saquirishcataca ama apangapac cutinguichicchu. Chaicunataca shuctac llacta runaman, taita mama illac huahuacunaman, viudacunaman saquinguichic. Shina ruhuacpimi, Mandac Diosca tucui cancunapac maquihuan ruhuashcata bendicianga.

20Olivosta pallacushpaca, ama saquirishcata cutin pallanguichicchu. Chaicunaca shuctac llacta runaman, taita mama illac huahuacunaman, viudacunaman saquinguichic.

21Uvas chagrata pallacushpaca, ama saquirishcata cutin pallanguichicchu. Chaicunataca shuctac llacta runaman, taita mama illac huahuacunaman, viudacunaman saquinguichic.

22Cancunapish Egipto llactapi servishpa causashcata yuyaringuichic. Chaimantami caicunata ruhuachun mandani.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help