EZEQUIEL 23 - Biblia Quichua Cañar 2010

Ñañandi Samariamantapish, Jerusalenmantapish

1Mandac Dios ñucata rimashpaca:

2«Huañunalla runa, shuclla mamapac ishcai huarmi huahuacunami tiyarca.

3Paicunaca huambramanta pachami Egipto llactapi huainayarca. Chaipimi pi mana japirishca chuchutapish japirichun saquirca.

4Punta ñañaca Ohola, quipa ñañaca Oholibami carca. Paicunaca ñuca huarmicunami carca. Chaimantami churicunatapish, ushicunatapish ñucaman curcacuna. Oholaca Samariatami ricuchin, Oholibaca Jerusalentami ricuchin.

5Oholaca ñucapac cashpapish ñucata shitashpami asiriocunata yallita cuyai callarirca.

6Paicunaca sumac puca churanata churarishca mandaccuna, soldadocunata mandaccuna, caballopi ric alaja mosocunami carca.

7Paicunahuanmi huainayashpa, mana allita ruhuarca. Paicunaca Asiria llactamanta ashtahuan acllashca runacunami carca. Shinallatac paicunapac ruhuashcalla dioscunata adorashpami mapayarca.

8Egiptopi huainayanata callarishcataca manatac saquircachu. Paihuanca huambramanta pachami huainayarca. Paipac chuchuta japirishpami yallita munarirca.

9Chaimantami Oholataca pai yallita munashca asiriocunapac maquipi churarcani.

10Paicunami pingaichishpa, paipac cari huahuacunatapish, huarmi huahuacunatapish quichushpa, paitaca espadahuan huañuchirca. Paica sumac huarmimi carca. Shina cashpapish burlashpa asina huarmimi tucurca.

11Paipac ñaña Oholiba chaita ricushpaca, ashtahuanmi paipac ñañata atishpa, mana allita ruhuashpa juchallirca.

12Asiriocunatami yallita munarca. Chashnami chai mandaccunatapish, soldadocunata mandaccunatapish munarca. Paicunaca alli churanata churarishca, macanacunata yachac, caballopi ric alaja mosocunami carca.

13Paicunahuan chashna mapayashpa, ishcai ñañandita mana allita ruhuashpa caticuctami ricurcani.

14Ashtahuanpish Oholibaca pirca quingraipi dibujashca runacunata, chaipi puca colorhuan pintashca caldeocunata ricushpami, ashtahuan huainayarca.

15Chai runacunaca chumbillishca, umacunapipish tauca color turbanteta churashcami carca. Tucui paicunami Caldeapi huacharishca shina, Babilonia llacta runacuna shina, soldadocunata mandaccuna shina carcacuna.

16Babilonia llacta runacunata yallita munashpami, Caldea llactaman huillaccunata cacharca.

17Chashnami Babilonia llacta gentecuna shamushpa, paihuan huainayashpa cushicurca. Chai gentecunahuanmi millanayachingacaman huainayashpa mapayarca.

18Chashnami paica lluchulla tucushpa, tucuipac ricuipi huainayarca. Chaimantami ñuca shungupica paitapish, paipac ñañatapish millanayachircani.

19Huambrarac cashpa, Egipto llactapi huainayashcata mana cungarishpami, yallita huainayashpa catirca.

20Chai solteraca yallita huainayana munaita charic Egipto runacunatami munarca. Paicunaca burrocuna shina, caballocuna shina huarmita munac runacunami carca.

21Huambramanta pachami pi mana tuparishca chuchucunata Egipto llacta gentecuna japirichun saquirca.

22Chaimantami Mandac Dios ñucaca Oholibataca: “Riqui, can millanayachingacaman huainayashca gentecunallatatacmi tucui ladomanta canta llaquichichun cachasha.

23Babilonia llacta gentecunata, caldeocunata, Pecod, Soa, Coa llacta gentecunata, Asiria llacta gentecunatami cachasha. Paicunaca alaja mosocuna, mandaccuna, soldadocunata mandaccunami. Shinallatac alli sinchi, caballocunapi alli montac, alaja mosocunami can.

24Canta llaquichingapacca, jahua ladomantami macanacuna carretacunata, micunata apac carretacunata apashpa, muyunacushpa shamunga. Chashnami jatun escudocunahuan, uchilla escudocunahuan, umapipish fierro churanata churarishca cambac ladopi shayaringa. Paicunaca ñuca llaquichichun cachacpimi, paicunapac mandashcacunapi nishca shina cantaca taripashpa llaquichinga.

25Ñuca yallita piñarishpami, cantaca yallita llaquichisha. Chashnami gentecunaca yallita piñarishpa cantaca llaquichinga. Cambac singatapish, ringritapish pitingami. Cutin cambac huahua huahuacunataca espadahuanmi huañuchinga. Cambac cari huahuacunatapish, huarmi huahuacunatapish apangami. Maijan saquirishcacunataca ninami tucuchinga.

26Cambac churanacunatapish quichushpami, lluchullata saquinga. Cambac sumac churanacunatapish quichungami.

27Chashnami millaita ruhuaccunatapish, Egipto llactamanta huainayac huainayaccunata anchuchisha. Shina ruhuacpica, Egipto gentecunataca ña mana alzarishpa ricunguichu. Ña mana ashtahuan yuyaringuichu.

28Mandac Diosca: Cantaca can mana ricunayachishca, can millanayachingacaman huainayashca gentecunapac maquipimi churani.

29Paicunami cantaca yallita mana ricunayachishpa llaquichinga. Tucui can charishcacunata quichushpami lluchullata saquinga. Chashna ruhuacpimi, can huainayashpa mapayashcapish, mana allita ruhuana munaihuan purishcapish, cullquimanta huainayashcapish ricuringa.

30Shuctac llactapi causaccunahuan huainayashcamanta, paicunapac ruhuashcalla dioscunata adorashpa mapayashcamantami cai llaquicunaca japinga.

31Cambac ñaña shinallatacmi mana allita ruhuashpa causarcangui. Chaimantami cambac ñañaman cushca ubiana shina llaquillatatac canmanca cusha.

32Chaimantami Mandac Diosca:

Cambac ñañaman cushca

ubiana shina llaquillahuantacmi

llaquichisha.

Chai ubiana vasoca ancho,

shinallatac jatunmi can.

Shuctac llactapi causaccunaca

burlashpami cantaca asinga.

33Canca, cambac ñaña Samariata

llaquichishca shina llaquichicpimi,

machashca shinapish,

nanaihuanpish cangui.

34Chai vasopi tiyac

llaquicunataca tucuimi ubiangui.

Chashna ubiashpami,

cambac chuchucunatapish

aspiringuimi.

Chaitaca Mandac Dios ñucami nini.

35Chaimantami Mandac Dios ñucaca: Canca ñucata cungarishpa huashata ricuchircanguimi. Chashna mana alli yuyaihuan purishpa, huainayashcamantami llaquishca cana cangui” nini» nirca.

36Cutinllatac Mandac Dios ñucata rimashpaca: «Huañunalla runa, ¿manachu Ohola huarmitapish, Oholiba huarmitapish, paicuna mana allita ruhuashcata taripashpa ricuchigringui? Millanayai mana allita ruhuashcata huillaiyari.

37Paicunaca huainayaccunami, huañuchiccunami ruhuashcalla dioscunata adoraccunami. Shinallatac ñucahuan charishca churicunatapish chai dioscunaman cushpami rupachirca.

38Ashtahuan millaicunatami ruhuarcacuna. Ñucapaclla huasitapish mapayachircami, samana punzhatapish yangatami ruhuarca.

39Paicunapac huahuacunata paicunapac dioscunaman cushpa, rupachishca punzhallatacmi, ñucapaclla huasita mapayachingapac yaicurca. ¡Chaitami ñuca huasi ucupica ruhuarcacuna!

40Chaipac jahuapica caru llacta gentecunata pushamuchunmi huillaccunata cacharca. Shina shamucpica, paicunaman alaja ricuringapacmi armarishpa, ñahuitapish pintarirca. Shinallatac tucuilaya sumaccunatapish churarircami.

41Allichishca miza ladopi cac sumac tiyarinapimi tiyarirca. Chai miza jahuallapitacmi ñuca inciensotapish, aceitetapish churarca.

42Paihuan tandanacushca gentecunami caparishca uyarirca. Paicunaca shitashca pambamanta shamushca sabeocuna, yanga gentecunami carca. Chai gentecunami cai huarmicunapac maquipica brazaletecunata, umapica sumac coronacunata churachirca.

43Chaimanta yallita huainayashpa mapayashca huarmimanta yuyarishpaca: “¿Yalli huainayashpa mapayashca huarmihuanchu huainayashpa catincuna?

44Cullquimanta huainayac huarmipacman shamuc shinami, chai mana pingac Ohola, Oholiba huarmicunapacmanca shamurcacuna” nircani.

45Cashcata ruhuac gentecunami huarmicunatapish, huañuchic huarmicunatapish mandashcapi nishca shina taripashpa llaquichinga. Paicunaca huainayaccuna, shinallatac huañuchic huarmicunami.

46Chaimantami Mandac Diosca: “Ñucami chai huarmicunata llaquichichun achca soldadocunata huichai cachasha. Paicunami manchachishpa, tucui shuhuanga.

47Chai gentecunami rumicunahuan shitashpa, espadahuan chugrichishpa huañuchinga. Paicunapac cari huahuacunatapish, huarmi huahuacunatapish huañuchishpami, huasicunatapish rupachinga.

48Chashnami chai llactamantaca millaita ruhuaccunata anchuchisha. Chaita ricushpami, tucui huarmicunaca paicuna ruhuashca shina, yalli millaita mana ruhuangacuna.

49Paicunallatac yalli mana allita ruhuashcamanta, ruhuashcalla dioscunata adorashpa mapayashcamantami chashna llaquita apangacuna. Chashna llaquita apashpami, ñucataca Mandac Dios cashcata yachangacuna” ninmi» nirca.