1Mana allita ruhuaccunapac causaitapish,
paicunahuan tandanacunatapish
ama munanguichu.
2Paicunapac shungupica
macanacunallatami yuyacuncuna.
Paicunapac shimica
mapacunallatami rimancuna.
—20—3Allita yachaihuanmi huasita shayachina.
Alli yuyarishpami
mana cuyuchipacta callarina.
4Yachaihuanmi huasi ucucunapica
sumaccunata,
alaja charinacunata jundachina.
—21—5Sinchi runa canapac randica
yuyaisapa runa canami ashtahuan alli.
Yachacushca runapacca
imapish mana llashacchu.
6Jatun macanacuitaca
alli yuyaihuanmi ruhuana.
Alli yachaccuna cunacpimi,
jatun macanacuitaca mishachinga.
—22—7Yuyai illac runamanca
allita yachaica mana entendipacmi.
Tandanacushca gentecunapica,
mana rimai pudinchu.
—23—8Llaquichina yuyailla puric runataca
millai yuyaiyuc runa ningacunami.
9Yuyai illac runaca juchallatacmi yuyarin.
Burlashpa asic runaca
gentecunapac ñaupapica millashcami.
—24—10Llaqui punzhacunapi fuerza illac cashpaca,
fuerza illacmi saquiringui.
—25—11Huañuiman apashcacunata
quishpichingui.
Ña huañunalla chucchushpa
puriccunatapish quishpichingui.
12Can: «Chaitaca manatac
yachashcanichu» nicucpipish,
¿tucuipac shunguta pezashpa ricuc Diosca
manachu yachanga?
Cambac causaita ricuc Diosmi chaitaca yachan.
Runacunamanca paicuna imata
ruhuashca shinallatacmi cunga.
—26—13Ñuca huahualla, bunga mishquica allimi.
Chaimanta japishpa micuilla.
Sinchiyashca bunga mishquipish
cambac shimipica mishquimi canga.
14Chashnallatac cambac almapac allipac
alli yachacuiyari.
Chashna yachacucpica,
shamuc punzhacunaca allimi canga.
Can shuyacushcapish mana yangachu canga.
—27—15Diosta mana manchac runalla,
cashcata ruhuac runapac
carpataca ama shuhuac shina muyuichu.
Paipac huasi ucupi ima tiyashcatapish,
ama shuhuashpa apaichu.
16Chaica, cashcata ruhuac runaca
canchis cutin urmashpapish jataringallami.
Ashtahuanpish Diosta mana manchaccunaca
jatun llaquipimi urmanga.
—28—17Canta piñac runa llaquipi urmacpica,
ama cushicuichu.
Mitcaric shina pandaricpipish,
shungullapi ama cushicuichu.
18Pacta Mandac Dios chaita ricushpa
cantapish mana alli ninman.
Pacta paita piñarishpa llaquichinatapish
paimanta anchuchinman.
—29—19Mana allita ruhuaccunamanta
ama piñarichu.
Diosta mana manchac runacunapac causaitaca
ama munaichu.
20Chaica, millaita ruhuac runacunaca
mana cushicuita charingachu.
Diosta mana manchaccunaca
lámpara huañushca shinami tucunga.
—30—21Ñuca huahualla, Mandac Diostapish,
jatun mandactapish manchangui.
Mana cazuccunahuanca ama tandanacuichu.
22Paicunataca cungaillami llaqui japinga.
Paicunata ishcaita llaquichigricushcataca
¿pitac yachangayari?
Shuctac yachachina rimashcacunamanta23Caicunapish yachaisapa
cunashca rimashcacunami:
Ima llaquita taripacushpaca
ñahuita ricushpalla
shucpac parte tucunaca mana allichu.
24Diosta mana manchac runata:
«Canca cashcata ruhuacmi cangui»
nictaca tucui gentecunami maldicianga.
Shinallatac shuctac llactapi causaccunapish
piñangacunami.
25Ashtahuanpish chai llaquichiccunataca
cuyangacunami.
Paicunaca bendiciashcami canga.
26Alli rimaicunahuan
cutichic runapac shimitaca
muchac shinami alli ninga.
27Canzha ruhuaicunatarac ruhuangui.
Cambac allpacunapi ruhuaitarac yuyaringui.
Chai quipaca cambac huasita shayachingui.
28Ama pitapish llullashpa,
huillashpa llaquichinguichu.
Cambac shimihuanpish ama llullanguichu.
29Ama: «Pai imata ruhuashca shinallatacmi
ruhuasha, pai llaquichishca shinallatacmi
llaquichisha» ninguichu.
30Quilla runapac allpa ladotami pasacurcani.
Yuyaita mana charicpac
uvas chagra ladotami ricurcani.
31Chai pambacunapica chinicuna,
cashacuna huiñashpa jundashcami carca.
Chai pamba muyundi pircacunapish
tucui urmashcami carca.
32Chaita ricushpami,
ñuca shungupi yuyarishpa
cai yachachinata yuyarircani:
33Ashata sueñushpa,
umata caiman chaiman cuyuchishpa,
ashata samaringapac maquita cruzashpa
siricucpica,
34huaccha cana punzhacunaca
yanga puric runa shinami chayamun.
Shinallatac imapish illac canaca
macanacuc runa shinami shamun.
Who We AreWhat We EelieveWhat We Do
2025 by iamachristian.org,Inc All rights reserved.
