1Israelcunapac tucuita Mandac Dios Moab llactamanta rimashpaca:
«¡Aij, Nebo llactaca
tucui tucuchishcami canga!
¡Quiriataimpi causaccunapish
tucuchishpa pingaichishcami canga!
¡Muyundita jarcashca pircacunapish
urmachishcami canga!
2Alli nishca Moab llactaca
yangallami saquirishca.
Hesbón llactapi tandarishpaca:
“Chai llactata chingachingapac
shamuichic” nishpami yuyarinacushca.
Madmena llactalla, cantapish
espadahuan llaquichishpami
chunllata ruhuanga.
3¡Horonaim llactapipish
caparinacushcami uyarin!
¡Tucui tucuchishca
llaquinayaitami siricun!
4Moab llactaca tucuchishcami.
Uchilla huahuacuna
yallita huacashcami uyarin.
5Punzhantami Luhit llacta
huichaitaca huacashpami rincuna.
Horonaim llacta uraitapish llaquita
caparishpa huacashpami ringacuna.
6Cancunapac causaita
quishpichingapac miticuichicyari.
Shitashca pambapi retama yura shina
caichicyari.
7Moab llactalla,
can ima ruhuashcacunapi,
ima charishcacunapi
shunguta churashcamantaca
prezu apashcami cangui.
Quemos diospish paipac curacunandi,
paipac mandaccunandimi
prezu apashca canga.
8Tucuchicca tucui llactacunamanmi
shamunga.
Shuc llactallapish mana atingachu.
Pugru pambacunapish, lomacunapish
Mandac Dios nishca shinami,
llaqui tucunga.
9Moab llacta volashpa richun
alasta cuichicyari.
Chaipi tiyac llactacunaca
shitashca pambami saquirigrin.
Shuc runallapish
mana tiyangachu» ninmi.
10¡Mandac Dios ruhuachun
nishcata mana alli ruhuacca
mana alli nishca cachun!
¡Jatun macanacuita cachacpi,
mana huañuchishpa cutic runapish
mana alli nishca cachun!
11Moab llactapi causaccunaca
huambramanta pachami
cushilla causarca.
Vinoca shuc puñullapi
cashpaca mishquillami.
Sumac ashnaipish mana chingarinchu.
Shinami Moabca shuc puñumanta
shuc puñuman vinota pasachicpi,
sumac ashnaita mana chingachic shina,
shuctac llactaman
mana prezu apashca cashca.
12Mandac Diosca:
«Shina cacpipish, shuc puñumanta
shuc puñuman pasachichun
cachana punzha chayamugrin.
Paicuna shamushpami chai vinotaca
shuc puñuman pasachishpa,
chushacllata saquishpa,
puñucunataca paquinga.
13Shina ruhuacpimi, Moab llactaca
Bet-el diospi shunguta churashcamanta
israelcuna pingai tucushca shina,
Quemos diospi shunguta churaccunaca
pingaihuan canga.
14¿Ima shinatac cancunaca:
“Ñucanchicca alli sinchimi canchic.
Alli macanacuc carimi canchic”
ninguichicyari?
15Ñucaca Jatun Mandacmi cani.
Ñuca shutica tucuita Mandac Diosmi.
Moab llactaca ñami tucuringa.
Llactacunapish tucuimi urmanga.
Huambrarac runacunatapish
cungata pitishpami huañuchinga.
16Moab llacta tucui tucurinapish,
jatun llaqui punzhacunapish
ñami chayamugrin.
17Paipac muyundipi causaccunapish,
paipac shutita tucui ricsiccunapish:
“¡Sinchi sumaimana varaca,
ima shinami paquirishca!”
nishpa llaquirichicyari.
18Dibón llactapi causaccunalla,
sumaimana tiyanamanta uricushpa,
chaquishca pambapi tiyarichicyari.
Moab llactata tucuchicmari
cancunapacman shamushpa
cancunapac jatun pircata
urmachinga.
19Aroer llactapi causaccunalla,
ñanpi shayarishpa ricuichicyari.
Miticushpa callpaccunata:
“¿Imatac tucurcayari?”
nishpa tapuichicyari.
20Moab llactaca llaqui tucushpami
pingai tucushca.
Paimanta caparishpa huacaichicyari.
Moab llacta tucurishcata
Arnón yacu patapi causaccunamanpish
huillaichicyari» ninmi.
21Pugru pambapi tiyac Holón, Jahaza, Mefaat,
22Dibón, Nebo, Bet-diblataim,
23Quiriataim, Bet-gamul, Bet-maun,
24Queriot, Bosra, Moab llacta llactacunatapish, carupi, cuchullapi cac llactacunatapish taripashpa llaquichina punzhami shamushca.
25Mandac Diosca:
«Moab llactapac
fuerzapish, poderpish
chingarishcami» ninmi.
26Moab llactapi causaccunaca
Mandac Diosta mana cazurcachu.
Chaimanta paicunata machachichic.
Chashnami paicuna arcadashca
jahuallapitac singushpa,
burlashpa asina tucunga.
27Moab llactapi causaccuna,
¿cancunaca manachu israelcunataca
shuhuacucta japishpa burlac shina
asircanguichic?
28¡Moab llactapi causaccunalla,
chaimanta llucshishpa,
rumi quingraicunapi,
jatun patapi paloma shina,
cuzhata ruhuashpa causagrichic!
29Moab llactapi causaccunataca
jatun tucushca cashcata,
yallita cariyashca,
yallita sinchi tucushca,
pitapish mana manchac
cashcatami yachanchic.
30Mandac Diosca: «Paicuna
piña cashcataca yachanimi.
Shina cashpapish,
paicuna jatun tucushcapish,
paicuna imata ruhuashcapish
yangallami» ninmi.
31Chaimantami ñucaca
Moabmantapish,
chaipi causaccunamantapish,
Kir-hares llactapi causaccunamantapish
yallita caparishpa huacagrini.
32Jazer yacumanta huacashca shinami,
Sibma pambapi cac uvas chagramantaca
caparishpa huacagrini.
Cambac ramacunaca
jatun cuchata pasashpami
Jazer cuchacaman chayarca.
Shina cacpipish,
cosechana punzhacunami
tucui chagrata tucuchirca.
33Moabitacunapac alli pucuc
pambacunapi cushicushpa
caparinaca tucuringami.
Vinota ruhuana tanquecunapipish,
vinoca mana tiyanchu.
Cantashpa uvasta sarunapish
tucuringami.
Cushicushpa caparinaca
ña mana tiyangachu.
34Hesbón runacuna caparishpa huacashcaca Eleale llactacaman, shinallatac Jahaza pueblocamanmi uyarirca. Zoarmantaca Horonaimcaman, Eglat-selisiyacamanmi uyarirca. Nimrim yacucunapish chaquishcami.
35Mandac Diosca: «Moab llactapi causaccunataca tucuchigrinimi. Paicunaca, paicunapac dioscunamanmi lomacunapi animalta cushpa, inciensotapish rupachin» ninmi.
36Chaimantami Moab llactapi causaccunamantapish, Kir-hares llactamantapish ñuca shunguca flauta huacac shina huacanga. Shinami yallita chayucyashpapish tucui tucuchirca.
37Tucuimi acchatapish, barbastapish pitishpa, maquicunatapish chugririshpa, sharpa churanata churashca purincuna.
38Ñucami Moabpi causaccunataca yalli maucayashca puñuta ñutuchic shina llaquichisha. Shina ruhuacpica, huasi jahuacunapipish, callecunapipish caparishpami huacanga.
39¡Llaquirishpa huacaichicyari! ¡Moab llactapi causaccunaca yallita llaqui tucushcami! ¡Pingaihuanmi cutishpa callpancuna! Moabitacunaca tucui muyundipi causaccunapac burlashpa asina, tucuipac mancharinami tucushca.
40Mandac Diosca:
«Moab llactapi causaccunata
llaquichingapacca
piñaccunaca alasta pascashpa
jatun anga shinami shamunga.
41Chashna shamushpami,
tucui llactacunatapish mishashpa,
muyundita jatun pircashca
llactacunatapish atishpa japinga.
Chai punzhapica sinchi
runacunapac shunguca
sajuaric huarmi shinami tucunga.
42Moab llactaca
Mandac Diosta mana cazushpa,
jatun tucushcamantami
tucuchishca canga.
Ña mana ashtahuan llactachu canga.
43Moab llactapi causaccunalla,
cancunamanca yalli manchaipish,
urmana jutcupish, mitcarina
tucllapishmi shuyacun.
44Moab llactapi causaccunataca
yallitami llaquichigrini.
Manchaimanta miticushpa
callpacca jutcupimi urmanga.
Jutcumanta llucshicca
tucllapimi japi tucunga.
45Shaicushca callpaccunaca
Hesbón llactapimi miticugringa.
Ashtahuanpish Hesbonmantapish,
Sehonmantapish nina llama llucshishpami,
Moab llactataca
muyundi llactacunandi rupachinga.
Yallita cari tucushca
gentecunatapish rupachinga.
46¡Aij, Moablla!
Quemos diosta yuyaric
gentecunaca tucurishcami.
Churicunapish, ushicunapish
shuctac llactamanmi
prezu rishcacuna.
47Shina cacpipish,
tucuri punzhacunapimi
Moab llactapi causaccunataca
prezumanta cutin cutichimusha.
Chaitaca Mandac Dios ñucami nini»
ninmi.
Moab llactata llaquichina cashcata huillashcaca caicamanllami.
Who We AreWhat We EelieveWhat We Do
2025 by iamachristian.org,Inc All rights reserved.
