1 CORINTIOS 9 - Biblia Quichua Cañar 2010

Apóstol Pablo, pai ima shina cashcata huillashcamanta

1Ñucaca apostolmi cani, imatapish ruhuai pudinimi. Ñucanchic Apunchic Jesucristotapish ñucallatacmi ricurcani. Apunchic Jesucristomanta ñuca huillacpimi, cancunaca crircanguichic.

2Shuccunaman mana apóstol cashpapish, cancuna Apunchic Jesusta crishpa, paihuan shuc shinalla tucushcamantaca, apostolmi cani.

3Ñucata juchanchishpa rimaccunataca:

4Ñucanchic huillaccunaca ¿manachu micunatapish, ubianatapish chasquina canchic?

5¿Manachu ñucanchicpish apostolcuna shina, Apunchic Jesuspac huauquicuna shina, Cefas shina, shuc cric huarmita cazarashpa, apai pudinchic?

6¿Bernabellachu, ñucallachu tandanacushca criccunamanta imatapish mana chasquina canchic?

7¿Pitac quiquin cullquihuan soldado tucun? ¿Pitac manapish micungapac uvasta tarpunga? ¿Pitac ovejata michishpapish lecheta mana ubian?

8Caica mana ñucapac yuyaillachu, ashtahuanpish Moisés mandashcacunapipish chashnallatacmi nicun.

9Moisés mandashpa quillcachishcapica: “Trillac huagrataca pacta shimita huatanguiman” ninmi. Diosca mana huagracunata llaquishcamantachu chashna nicun,

10ashtahuanpish ñucanchicta llaquishcamantami chashnaca nicun. Diosca ñucanchicpac allipacmi mandashcacunataca curca. Chaica, yapucpish, trillacpish granota japina yuyaihuan trabajan.

11Ñucanchic tarpuc runa shina, Dios rimashcata cancunaman huillashpaca, ¿manachu cancunamantaca imallatapish chasquina canchic?

12Shuccuna cancunamanta imallatapish chasquishca cacpica, ¿manachu ñucanchiccarin imallatapish japina canchic?

Shina cacpipish, Cristomanta alli huillai ama jarcarichunmi, imatapish mana chasquishpa, llaquita apashpa huillacunchiclla.

13Diosta mañana huasipi serviccunaca, chai huasiman apashca micunatami micun. Chai altarpi serviccunaca Diosman cushcatami micuncuna. Chaitaca cancunallatac yachanguichicmi.

14Chashnallatacmi Apunchic Jesusca maijanpish alli huillaita huillaccunaca, chai huillashcallamanta micuchun nishpa mandashca.

15Shina cacpipish, cancunamantaca imata mana japishcanichu. Cancunamanta imata japingapacpish mana quillcanichu. Pimanta imata mana chasquishpa, alli huillaita huillashpa cushicunata chingachinapac randica, huañunatami munani.

16Alli huillaita huillashpaca, mana jatun tucunachu cani, ashtahuanpish chaitaca huillanallatacmi cani. Mana huillashpaca, ¡aij, imachari tucusha!

17Ñuca munaillamanta huillashpaca, japina cashcataca japishami, ashtahuanpish mandashcallamanta huillashpaca, mandashcallatami ruhuacuni.

18Alli huillaita huillashcamanta japinata saquishpa, imata mana japishpa, cushicushpa Cristomanta alli huillaita huillanami, tucuimanta yalli japinaca can.

19Ñucaca mana pipac servic cashpapish, achca gentecunata Cristopacman chayachingapacmi, tucuipac servic tucuni.

20Israelcunahuan cashpaca, paicuna Cristopacman shamuchunmi israelcuna shina tucuni. Moisés mandashcacunata pactachiccunahuan cashpaca, paicuna Cristopacman shamuchunmi chai mandashcacunata pactachiccuna shina tucuni. Shina cacpipish, ñucaca mana chai mandashcacunata pactachicchu cani.

21Moisés mandashcacunata mana pactachiccunahuan cashpaca, paicuna Cristopacman shamuchunmi paicuna shina tucuni. Chashna ruhuashpaca, Dios mandashcacunata mana saquishpami, Cristo mandashcata pactachicuni.

22Manarac sinchi criccunahuan cashpaca, paicuna Cristopacman shamuchunmi paicuna shina tucuni. Chashnami maijancunallapish quishpirichun tucuilaya tucuni.

23Chashna huillashpaca, chai huillaimanta japingapacmi, chashnaca tucuni.

24Pucllana pambapica tucuimi callpancuna. Shina cacpipish japina cashcataca shucllami japin. Chaitaca cancunallatac yachanguichicmi. Chaimanta chai japinata japingapac, cancunapish callpacuc shina alli causaichic.

25Callpangapac allichiriccunaca chingariclla coronata japingapacmi allichirincuna. Ñucanchiccarin mana chingaric coronata japingapacmi, chashna allichiricunchic.

26Ñucaca maiman chayana cashcata yachashpami callpacuni. Macanacushpapish, mana huairapi huactanichu,

27ashtahuanpish ñuca quiquin cuerpota macashpami cazuchini. Chaica, shuccunaman huillashpa mishachishca jahua, ñucarac huashayashpa mana saquiringapacmi chashnaca ruhuacuni.