1Chashna nicpimi, jatun mandac Ezequiasca paipac churanata lliquirishpa, sharpa churanata churarishpa, Mandac Diospac huasiman shamurca.
2Chai quipami mayordomo Eliaquimtapish, quillcac Sebnatapish, curacunata pushac yuyaccunatapish sharpa churanata churachishpa Dios ima nishcata huillac Isaiaspacman cacharca. Isaiasca Amozpac churimi carca.
3Paicunaca:
—Ezequiasca: “Cunan punzhaca yalli llaquichishca, pingaichishca, mai llaquillami canchic. Chaica, sajuarina punzha pactacpi, chai sajuaric huarmi mana fuerzata charic shinami canchic.
4Asiria llactata jatun mandac quipa mandacta Mandac Diosta camishpa rimarishcata uyashpa, llaquichishca cashpachari alli canman. Chaimanta cunanca, caipi maijan saquirishcacunamanta Mandac Diosta mañaiyari” ninmi— nirca.
5Chaita huillangapacmi Ezequiasta serviccunaca Isaiaspacman rirca.
6Isaiasca paicunataca:
—Cancunapac amotaca: “Mandac Diosca: Asiria llactata jatun mandac paita serviccuna camishpa ñucata yallita rimashcamantaca ama manchaichu.
7Riquichic, ñucami paipac shungupica manchai espirituta churasha. Chaimantami ima uyaricpica, manchashpa, paipac llactaman cutinga. Paitaca paipac llactapi huañuchichunmi saquisha” ninmi ninguichic— nirca.
8Quipa mandacca Asiria llactata jatun mandac Laquis llactaman ña rishcata yachashpa cutimushpaca, Libna llactapi causaccunahuan jatun mandac macanacuctami ricurca.
9Chai quipami jatun mandacca: «Etiopía llactata jatun mandac Tirhacami paihuan macanacungapac shamun» ninacucta uyarca. Chaita uyashpami, paipac huillaccunata Ezequiaspacman cachashpaca:
10«Judá llactata jatun mandac Ezequiastaca: “Can shunguta churashca cambac Dios pandachichunca, ama saquinguichu. Paica Jerusalentaca Asiria llactata jatun mandacpac maquipica mana churashachu.
11Asiria llactata jatun mandaccuna tucui llactacunata tucuchishcataca canllatac uyarcanguimi. ¿Chashna cashca jahuachu, canca quishpirigringui?
12Ñucanchic ñaupa taitacuna Gozán, Harán, Resef llactacunapi causaccunatapish, Edén llactapi tiyac Telasar llactapi causaccunatapish tucuchicucpica, ¿maijan dioscuna quishpichi pudircachu?
13¿Maipitac Hamat, Arfad, Sefarvaim, Hena, Iva llactacunata jatun mandaccunaca?” ninguichic» nirca.
14Ezequías jatun mandac cachashca quillcata paicunapac maquimanta japishpa rezashpaca, Mandac Diospac huasimanmi huichai rirca. Chaipimi chai quillcataca Mandac Diospac ñaupapi pascarca.
15Chaita Ezequías ricuchishpa, Mandac Diosta mañashpaca:
16«Israelcunapac tucuita Mandac Dioslla, canca querubincunapac chaupipimi causangui. Canllami tucui cai pachata mandaccunapac Mandac Dios cangui. Jahua pachatapish, cai pachatapish canmi ruhuarcangui.
17Mandac Dioslla, cambac ringrihuan uyaiyari. Mandac Dioslla, cambac ñahuita pascashpa ricuiyari. Senaquerib causac Diosta camishpa rimachun cachashcata uyaiyari.
18Mandac Dioslla, Asiria llactata jatun mandacca shuctac llactacunatapish, allpacunatapish tucuchircami.
19Chaipi tiyac dioscunatapish rupachircami. Chaicunaca mana dioscunachu carca. Ashtahuanpish runacuna caspimanta, rumimanta ruhuashcallami carca. Chaimantami chashna tucuchirca.
20Mandac Dioslla, cunanca tucui cai pacha jatun mandaccuna canlla Mandac Dios cashcata yachachun, ñucanchicta paicunapac maquimanta quishpichiyari» nirca.
21Shina nicpimi, Amozpac churi Isaiasca Ezequiastaca: «Israelcunata Mandac Diosca Asiria llactata mandac Senaquerib mañashcataca uyashcami.
22Chaimantami Mandac Diosca chai jatun mandactaca:
“Carihuan manarac chayarishca
soltera shina Sión llactalla
burlashpa asishcami cangui.
Jerusalenpi causaccunaca
can cutishpa callpacpica,
umata cuyuchishpami asinga.
23¿Pitatac camishpa rimarcangui?
¿Pitatac jatun tucushpa,
llaquichishpa, ñahuita
alzashpa rimarcangui?
¡Israelcunapac jucha illac
Diostami chashna rimarcangui!
24Canta serviccunatami
Diosta camichishcangui.
Chashna cachashpaca:
‘Ñucapac carretacunahuanmi
urcu lomacunaman,
Líbano urcu jahuaman rircani.
Chaipimi cedro yuracunata,
ashtahuan alli ciprés yuracunata
tigrachircani.
Ashtahuan jahua urcu lomaman,
sumac quihua pambamanmi rircani.
25Ñucaca shuctac llactacunapimi
junduta allashpa,
yacuta ubiarcani.
Egiptopi tiyac jatun yacucunataca
ñuca chaquihuan sarushpami
chaquichircani’ nishcanguimi.
26Chaicunataca utca
huatacunallatac ruhuasha nishcata,
utca punzhacunallatac
yuyaricushcata,
¿manachu yacharcangui?
Chaicuna cunan pactachunmi munani.
Canmi muyundita jarcashca
llactacunataca urmachishpa,
rumi montonllata saquingui.
27Chai llactapi causaccunaca
cumurichishca cashpami,
imatapish mana ruhuai pudincuna.
Paicunaca pambacunapi micunalla
llullu quihua shina, huasi jahuapi
manarac alli huiñashpa,
chaquic quihua shinami.
28Can ima shina cactaca
tucuitami yachani.
Can maiman llucshictapish,
cutictapish, can ñucata
yallita piñarishcatapish
yachanimi.
29Canca ñucata yallita
piñarishpami, jatun tucushpa
ñuca ringriman uyaricta
rimarcangui.
Cambac singapica argollata,
shimipica frenota churachishpami,
can maita shamushca ñanllatatac
cutichishpa cachasha” ninmi.
30Jatun mandac Ezequiaslla,
caimi canmanca shuc señal canga:
Cai huatapish, shamuc huatapish
paillatac huiñashpa,
pucushca granotami micunguichic.
Ña quimsa huata tucucpica,
tarpushpa cosechaichic.
Uvastapish tarpushpa,
pucuchishpa micunguichic.
31Judá llactapi puchushca
gentecunamanta maijan
saquirishcacunaca allpa ucupi
sapi saquirishpa, huiñashpa
cutin pucuc shinami miranga.
32Maijan saquirishcacunaca
Jerusalenmanta,
Sión urcumantami llucshinga.
¡Tucuita Mandac Dios
yallita cuyashcamantami
chaitaca pactachinga!
33Mandac Dios Asiria llactata
jatun mandacta rimashpaca:
“Mana cai llactaman yaicungachu.
Cai llactapica
shuc flechallatapish
mana shitangachu.
Mana cai llacta ñaupapi
Escudota shayachingachu.
Baluartetapish mana ruhuangachu.
34Cai llactaman mana yaicungachu.
Maita shamushca ñanllatatacmi
cutinga.
Chaitaca Mandac Dios ñucami nini.
35Ñucallatac cuyarishcamanta,
ñucata servic Davidta
cuyashcamantami cai llactapi
causaccunata ayudashpa
quishpichisha” ninimi» nirca.
36Chai tutallatacmi Mandac Diospac angelca asiriocunapac carpacunaman rishpa, patsac pusac chunga pichca huaranga soldadota huañuchirca. Cayandi tutamanta jatarishpaca, tucui huañushpa siricuctami ricurca.
37Chaimantami Asiria llactata jatun mandac Senaqueribca Nínive llactaman rishpa, chaipi causarca.
38Shina cacpipish, Senaquerib paipac dios Nisrocpac huasipi paita adoracucpimi, paipac churicuna Adramelec, Sarezer espadahuan huañuchirca. Shina huañuchishpaca Ararat llactamanmi miticushpa rirca. Paipac randica paipac churi Esarhadonmi mandai callarirca.
Who We AreWhat We EelieveWhat We Do
2025 by iamachristian.org,Inc All rights reserved.
