NÚMEROS 27 - Biblia Quichua Cañar 2010

Zelofehadpac ushicuna herenciata mañashcamanta

1Zelofehadca Heferpac churimi carca. Heferca Galaadpac churimi carca. Galaadca Maquirpac churimi carca. Maquirca Manasespac churimi carca. Manasespac aillucunaca Josepac churicunami carca. Zelofehadpac ushicunaca Magla, Noa, Hogla, Milca, Tirsami carca.

2Chai pichca ñañandimi Mandac Dios-huan tupana huasi yaicunaman shamushpa Moisestapish, Eleazar curatapish, israelcunatapish rimashpaca:

3«Ñucanchic taitaca shitashca pambapimi huañurca. Paica mana Corepac gentecunahuan tandanacushpa, Mandac Diosta llaquichishcamantachu huañurca. Ashtahuanpish paica, paipac juchamantami huañurca. Churicunatapish mana charircachu.

4¿Imamantatac ñucanchic taitaca cari huahuata mana charishcallamanta quiquin aillupuramanta anchuchishca canga? Ñucanchic taitapac huauquicunaman cuc shinallatac ñucanchicmanpish allpata cuichicyari» nirca.

5Chashna mañacpimi, Moisesca Mandac Diosta huillarca.

6Shina huillacpimi, Mandac Diosca Moisestaca:

7«Zelofehadpac ushicunaca paicunapac cashcatami mañacun. Paicunapac taita japina cashca allpata paicunaman cui. Paicunapac taitapac huauquicuna japishca allpamanta ashata chaupishpa paicunaman cui.

8Shinallatac israelcunataca: “Maijanpish cari huahuata mana charishpa huañucpica, ushicunaman allpata cungui.

9Ushitapish mana charishpa huañucpica, chai huañuc runapac huauquicunaman cungui.

10Huauquicunapish mana tiyacpica, taitapac huauquicunaman allpata cungui.

11Paipac taitapac huauquicuna mana tiyacpica, cuchulla familiacunaman allpata cungui. Mandac Dios Moisesta mandashca shinallatacmi cai mandashcataca tucui israelcuna pactachina can” ningui» nirca.

Josueta Moisespac randi mandachun churashcamanta

12Mandac Diosca Moisestaca:

—Cai Abarim urcuman huichai rishpa, israelcunaman ñuca cushca allpata ricui.

13Chaita ricushca quipaca cambac huauqui Aarón shinallatacmi huañushpa, cambac ñaupa taitacunahuan tandarigringui.

14Cancunaca Zin shitashca pambapi cashpa, yacu mana tiyacpi, israelcuna ñucata llaquichicpica, ñucata mana cazurcanguichicchu. Meriba yacupica ñuca jucha illac cashcataca mana paicunapac ñaupapi ricuchircanguichicchu— nirca.

Yacumantami Cades ladopi tiyac shitashca pamba Zinpi piñarirca.

15Chaimantami Moisesca Mandac Diostaca:

16—Mandac Dioslla, canca tucui causaita chariccunapac Diosmi cungui. Cai gentecunata pushachunca shuc runata churaiyari.

17Chai runami israelcunapac ñaupata yaicuna cacpica pushashpa yaicunga. Cutin llucshina cacpica pushashpa llucshinga. Chashna cacpimi, cambac acllashcacunaca michic illac oveja shina mana canga— nirca.

18Shina nicpimi, Mandac Diosca Moisestaca:

—Nunpac churi Josuemi chaicunata ruhuangapac alli, paita acllashpa, uma jahuapi maquita churai.

19Chai quipaca Eleazar curapacman shinallatac israelcunapac ñaupaman pushamushpa, paicunapac ñaupapi pushachun churai.

20Shinallatac tucui israelcuna paita cazuchunca cambac mandana asha yuyaita paiman cui.

21Josué imata ruhuangapacca Eleazar curapacmanmi ringa. Paimi Urim nishcahuan suerteta ruhuashpa, ñucaman tapunga. Josué israelcunata macanacungapac llucshichun nicpica llucshingacunami. Shinallatac cutichun nicpica, cutingacunami— nirca.

22Moisesca Mandac Dios nishca shinallatacmi Josuetaca Eleazar curapac, israelcunapac ñaupaman pushamurca.

23Chaiman pushamushpaca Mandac Dios mandashca shinallatacmi Moisesca Josuepac uma jahuapi maquita churashpa, paipac randi tucui israelcunata mandachun churarca.