1Mama cucha patapi tiyac shitashca pamba llaqui tucunamanta huillashcami:
Shitashca pamba Neguevmanta
acapana huaira shamuc shinami,
manchana llactamanta shitashca
pambata shamunga.
2Muscuipi shina ricuchishpaca
sinchitami ricuchirca.
Mana cazuc runaca
mana cazushpami catin.
Huañuchishpa tucuchic runaca
tucuchishpami catin.
¡Elam llactapi causaccunalla,
macanacungapac huichai richicyari!
¡Media llactapi causaccunalla,
Babiloniata muyunacuichicyari!
Ña mana llaquihuan
caparinacui tiyangachu.
3Chaimantami ñuca huashaca nanacun.
Shuc huarmita sajuarina nanai japic
shinami llaqui japirca.
Yallita llaquilla cashpami,
mana uyai pudini.
Yallita manchaihuan cashpami
mana ricui pudini.
4Ñuca shunguca upayanmi.
Manchaillami causani.
Ñuca munashca tutayana chishica
manchanami tucun.
5Mizapi mantelta churashpami,
micushpa, ubiashpa tiyacun.
¡Soldadota mandaccuna jatarichic,
escudocunata aceitehuan cahuichic!
6Mandac Diosca: «Tucui ima ricushcata
huillachunmi shuc chapacta churagri.
7Burrocunapi, camellocunapi
ric soldadocunata, carretata
ishcai caballocuna aisashcata
ricushpaca, allita ricuchun,
allita uyachun» ninmi.
8Chai chapac león shina caparishpaca:
«¡Mandac Dioslla, ñucaca tucui punzha,
tucui tutami chapana torrepi shayacuni!
9¡Riqui, ishcai caballocuna aisashca
carretapimi runacuna shamun!» nirca.
Shina nishca quipaca:
«¡Babilonia llactaca
urmarcami, urmarcami!
¡Tucui paicunapac yanga dioscunapish
pambaman urmashpami
paquirirca!» nirca.
10Shina nicpimi ñucaca:
«Trillashpa huairachishca shina,
ñuca llactapi causaccunalla,
israelcunata Mandac Dios
rimashcata uyashpami cancunamanca
huillani» nircani.
Duma llacta llaqui tucunamanta11Duma llacta llaqui tucunamanta huillashcami. Seir llactamantaca:
«Chapac runa, ¿ñachu pacarimun?
Chapac runa, ¿ñachu achicyagrin?»
nishpami caparirca.
12Shina nicpimi, chapac runaca:
«Ñami achicyagrin, achicyashpapish
ña tutayangami.
Imata tapusha nishpaca,
tapuc shamunguilla» nirca.
Arabia llacta llaqui tucunamanta13Arabia llactata llaquichinamanta huillashpaca:
Dedán llactamanta shamuccunalla,
tutaca Arabia llacta
sacha chaupipi miticushpa pacarichic.
14Tema llactapi causaccunalla,
yacunayaihuan huañucuccunata
yacuhuan tupagrichic.
Miticushpa puriccunata
micunahuan tupagrichic.
15Paicunaca espadata llucchishpa
huañuchingapac caticushcamanta,
flechahuan shitangapac
caticushcamanta,
jatun macanacuimantami
miticushpa llucshin.
16Mandac Diosca ñucataca: «Caimanta huata quipaca Cedar aillupac huahua huahuacuna sumac cashcaca, caipi chaipi trabajashpa puric runapac huata shinami chingaringa.
17Cedar runapac huahua huahuacuna, flechahuan macanacuc sinchi runacunapish ashallami saquiringa. Chaitaca israelcunata Mandac Diosmi nin» nirca.
Who We AreWhat We EelieveWhat We Do
2025 by iamachristian.org,Inc All rights reserved.