1 REYES 13 - Biblia Quichua Cañar 2010

Dios ima nishcata huillac Jeroboamta rimashcamanta

1Jeroboam inciensota rupachingapac altar cuchupi shayacucpimi, Mandac Dios mandashcamanta Dios ima nishcata huillac shuc runa Judá llactamanta Bet-el puebloman chayarca.

2Paica, Mandac Dios mandacpimi chai altarta piñarishpaca: «Altar, altar, Mandac Diosca: “Davidpac huahua huahuapuramantami Josías shuti huahua huacharinga. Paimi lomacunapi tiyac altarpipish, cambac jahuapipish inciensota rupachic curacunataca, cambac jahuallapitac huañuchinga. Huañushcacunapac tullucunatapish cambac jahuallapitacmi rupachinga” ninmi» nirca.

3Chai punzhallatacmi, shuc ricuchinata ricuchishpaca: «Mandac Dios rimashca pactanaca cashnami cagrin: Riqui, cai altarca paquiringami, chai jahuapi tiyac uchupapish shic-huaringami» nirca.

4Bet-el pueblopi cac altarta Dios urmachinata Diospaclla runa huillashcata uyashpami, jatun mandac Jeroboamca chai altarmanta maquita chutashpaca: «¡Chai runata japichic!» nirca.

Ashtahuanpish Diospaclla cac runata chutashpa ricuchishca maquica chaquircami. Shina chaquicpimi, maquitaca ña mana tandai pudirca.

5Shina tucucpimi, altarpish paquirirca. Chai altar jahuapi cac uchupapish shic-huarircami. Mandac Dios mandacpi, Diospac cac runa huillashca shinallatacmi tucurca.

6Chaimantami jatun mandacca Diospaclla runataca:

—Ñuca maqui alli tucuchun, canta Mandac Diosta ñucamanta mañai— nirca.

Shina nicpimi, Diospaclla runaca Mandac Diosta mañarca. Shina mañacpimi, jatun mandacpac maquica alli tucushpa, utcapi cashca shinallatac saquirirca.

7Chai quipami jatun mandacca Diospaclla runataca:

—Jacu ñuca huasipi imallata micungui. Imalla convidanatapish cugrinimi— nirca.

8Ashtahuanpish Diospaclla runaca jatun mandactaca:

—Cambac charishcamanta chaupita cusha nicucpipish, cambac huasimanca mana rishachu. Cai llactapica micunatapish mana micushachu, yacutapish mana ubiashachu.

9Mandac Diosca: “Imatapish ama micunguichu, yacutapish ama ubianguichu. Can rishca ñantapish ama cutinguichu” nishpami mandarca— nirca.

10Shina nishpami, Bet-el puebloman rishca ñantaca mana cutishpa shucta ñanta cutirca.

11Bet-el pueblopimi Dios ima nishcata huillac shuc yuyac runa causarca. Paipac churicuna paipacman shamushpami, Diospaclla cac runa, Bet-el pueblopi chai punzha ima ruhuashcata tucui huillarcacuna. Shinallatac jatun mandacta ima nishcatapish, taitaman huillarcacunami.

12Shina huillacpimi paicunapac taitaca:

—¿Maijan ñantatac rirca?— nishpa tapurca.

Shina nicpimi, paipac churicunaca Judá llactamanta shamushca Diospaclla runa maijan ñanta rishcata ricuchircacuna.

13Chashna ricuchicpimi paipac churicunataca:

—Burrota parejaichic— nishpa mandarca.

Burrota ña parejacpimi, paica burropi tiyarirca.

14Shina tiyarishpami, Diospaclla runata catishpa rishpaca, encina yura ucupi tiyacucta japirca. Chaipi tiyacucta japishpaca:

—¿Canchu Judá llactamanta shamushca, Dios ima nishcata huillac runa cangui?— nishpa tapurca.

Shina tapucpi paica:

—Ari ñucami cani— nirca.

15Shina nicpica:

—Jacu, ñuca huasipi imallata micungui— nirca.

16Ashtahuanpish chai runaca:

—Mana canhuan ri pudinichu, cambac huasi yaicunatapish mana pudinichu. Cai llactapica canhuanca mana micushachu, yacutapish mana ubiashachu.

17Mandac Diosca ñucataca: “Chai llactapica imatapish ama micunguichu, yacutapish ama ubianguichu. Can rishca ñantapish ama cutinguichu” nishpami mandarca— nirca.

18Shina nicpimi, caishuc runaca:

—Ñucapish can shinallatac Dios ima nishcata huillacmi cani. Mandac Dios cachashca shuc ángel shamushpami ñucataca: “Tandata micuchun, yacutapish ubiachun, cambac huasiman pushamugri” nishpa cacharca— nirca.

Cai rimaicunataca llullashpami nirca.

19Shina nicpimi, paihuan cutimushpa, paipac huasipi micurca, yacutapish ubiarca.

20Ña chashna mizapi micushpa tiyacucpimi, cutichishpa apashpa ric runata mandac Dios rimarca.

21Shina rimacpimi, Judá llactamanta shamushca Dios ima nishcata huillac runataca:

—Mandac Diosca: «Ñuca mandashcataca mana cazushcanguichu, mana pactachishcanguichu.

22Ashtahuanpish chai llactapi micunatapish ama micunguichu, yacutapish ama ubianguichu nishpa ñuca mandashca jahua cutimushpa micunatapish micushcangui, yacutapish ubiashcangui. Shina cashcamantami can huañushpaca, cambac ñaupa taitacunata enterrashcapica mana enterraringui» ninmi— nirca.

23Diospaclla runa micushpa, ubiashpa tucuchicpica, chai cutichimuc runami burrota parejarca.

24Shina parejacpica, burropi montashpa ñanta ricucpimi, shuc león ñanpi tupashpa huañuchirca. Ña huañucpica, chaupi ñanpimi paipac cuerpoca siricurca, burropish, leonpish chai huañushca ladopimi shayacurca.

25Tauca gentecuna chai ñanta ricushpami, huañushca siricucta, chai huañushcapac ladopi león shayacuctapish ricurca. Shina ricushpami, chai pueblopi causac Dios ima nishcata huillac yuyac runaman huillarcacuna.

26Ñanmanta cutichimuc Dios ima nishcata huillac runa caita uyashpaca: «Diospaclla runami canga, paica Dios mandashcatami mana cazushca. Chaimantami Mandac Diosca shuc leonman cushca canga. Chai leonmi Mandac Dios nishca shinallatac pitinacushpa huañuchishca canga» nirca.

27Chashna nishpami paipac churicunataca: «Burrota parejaichic» nirca. Shina nicpimi, paicunaca burrota parejarca.

28Chai burropi rishpami, Diospaclla runataca ñanpi huañushca siricucta tarirca. Shinallatac burropish, leonpish chai huañushcapac ladollapimi shayacushca carca. Leonca huañuchishpapish mana micushcachu carca. Burrotapish mana imata ruhuashcachu carca.

29Chaimantami Dios ima nishcata huillac runaca Diospaclla runa huañushcataca burropi churashpa apamurca. Dios ima nishcata huillac yuyac runaca huacashpa enterrangapacmi puebloman shamurca.

30Puebloman chayashpaca, paita enterrangapac ruhuashca jutcupimi enterrarca. Ña enterrashpaca: «¡Aij, ñuca huauquilla!» nishpami huacarca.

31Chashna enterrashca quipami, paipac churicunataca: «Ñuca huañucpica, Diospaclla runata enterrashca jutcullapitac enterranguichic. Ñuca tullucunataca paipac tullu ladollapitac churanguichic.

32Mandac Dios mandashcamanta Bet-el pueblopi tiyac altarpish, Samaria llacta pueblocunapac lomacunapi tiyac tucui altarcunapish urmangami nishpa caparishpa huillashcaca pactangami» nirca.

33Tucui caicuna chashna tucucpipish Jeroboamca pai mana allita ruhuashpa causacushcataca mana saquircachu. Ashtahuanpish lomacunapi tiyac altarcunapi curacuna cachunmi, israelcunapuramanta acllashpa churarca. Paica maijanpish chai munaita charictaca lomacunapi cac altarcunapi cura cachun churarcallami.

34Jeroboam chashna millaita ruhuashcamantami paipac huasi ucupuracunapish millaita ruhuarcacuna. Chashna cashcamantami paipac huasi ucupuraca tucui tucurishpa, cai pachamanta chingarircacuna.