1¡Ñuca almalla,
Mandac Diosta alli niyari!
¡Ñucata Mandac Dioslla,
canca yallita jatun Diosmi cangui!
Canca achic nicuc-huan,
sumaimanahuan churarishca
shinami cangui.
2Canca churanata churarishca shinami
luz-huan jahuata pillurishca cangui.
Canmi jahua pachataca
lienzota chutac shina tendishcangui.
3Can causana huasitaca
yacucuna jahuapimi churashcangui.
Puyupimi carretapi shina puringui.
Huaira jahuatami puringui.
4Huairataca canmanta huillachun,
culun nicuc ninataca
canta servichunmi ruhuangui.
5Allpataca callari rumicuna jahuapimi
sinchita ruhuarcangui.
Chaimantaca pipish mana cuyuchingachu.
6Cai pachataca mama cucha yacuhuanmi
churanahuan pilluc shina pillurcangui.
Urcucunapish yacupimi taparirca.
7Can rimacpica anchurircami.
Can tulun nishpa uyaricpica,
utcashpami anchurirca.
8Lomacunata tapashpami
pugru pambacunacaman urai rirca.
Can churashca pushtullapitacmi tandarirca.
9Maicaman can churashca pushtumantaca
mana pasangachu.
Allpatapish mana cutin tapangachu.
10Canmi urcupi tucyac yacucunata ruhuashpa,
jatun yacucuna tucuchun ruhuashcangui.
11Chai yacutami pambapi causac
animalcunaca ubiancuna.
Sacha burrocunapish chai yacuta
ubiashpami yacunayaita pasachincuna.
12Volac animalcunapish
chai yacu uricunapimi causan.
Yura ramacunapi tiyarishpami
cushilla silbancuna.
13Jahua pachapi cac cambac huasipi
tiyarishpami urcucunapi tamyachingui.
Cambac tamyahuanmi allpaca
sumacta pucushpa jundan.
14Canmi animalcunamanca quihuata,
gentecunamanca micunata pucuc
chagracunata huiñachingui.
15Gentecunata cushichic vinopish,
ñahuita sumacyachic aceitepish,
micuna granopish canmantami tiyan.
16Can Mandac Dios churashca yuracunapish,
Líbano urcupi can tarpushca
cedro yuracunapish,
yacusapa verdinlla yuracunami tucun.
17Chai yuracunapimi zhutacunaca causan.
Ciprés yuracunapimi cigüeñacunaca
cuzhata ruhuashpa causan.
18Jatun urcucunataca sacha chivocuna
causanatami ruhuashcangui.
Rumi quingraicunataca conejocuna
huachanatami ruhuashcangui.
19Quillataca ima quillacuna
cashcata ricuchunmi churashcangui.
Intitaca ima horas tigranata
yachachunmi churashcangui.
20Can amsayachicpica tutayanmi.
Tutayacpimi sacha animalcunaca
callpancuna.
21Leoncunaca micunata
mana tarishpami huacancuna.
Chashnami Diosta mañancuna.
22Inti llucshicpica tandanacushpami,
paicuna causana jutcuman yaicuncuna.
23Runacunaca imatapish
ruhuangapac llucshishpaca,
tutayangacamanmi trabajancuna.
24¡Mandac Dioslla,
can ruhuashcacunaca mana yupaipacmi!
Tucui chaicunataca
allita yachac cashcamantami ruhuarcangui.
Cai pachapica can ruhuashcacunami jundan.
25Caica yallita ancho mama cuchami.
Caipimi mana yupaipac jatun,
uchilla challuacunaca tiyan.
26Chai yacutami jatun barcocunapish purin.
Chaipimi pucllachun churashca
Leviatán animalpish causan.
27Chai tucui animalcunami micuna horaspi,
can carachun shuyacun.
28Can micunata cacharicpimi,
paicunaca tandan.
Cambac maquita pascacpica,
sacsactami micuncuna.
29Can mana micunata caracpica
imata mana micui pudincunachu.
Can samaita quichucpica
ña mana causancunachu.
Chashnami allpaman cutincuna.
30Cambac Espirituta cachacpimi
cutin miran.
Shina ruhuashpami allpapi tiyactaca
mushucyachingui.
31¡Mandac Diospac sumaimanaca
huiñaita cachun!
¡Mandac Diosca
pai ruhuashcacunahuan cushicuchun!
32Pai allpata ricucpica chucchunmi.
Urcucunapi tuparicpica cushninmi.
33Ñuca causaipica Mandac Diostami cantasha.
Ñuca causacushcacamanca
Diostami salmocunahuan cantasha.
34Mandac Diosta shungu ucupi
yuyarishpaca cushicunimi.
Ñucaca Mandac Dios-huanmi
yallita cushicuni.
35Juchata ruhuaccunaca
cai pachamanta chingachishca cachun.
Diosta mana manchaccunaca tucuchishca cachun.
¡Ñuca almalla, Mandac Diosta alli niyari!
¡Mandac Diostaca alli alabaiyari!
Who We AreWhat We EelieveWhat We Do
2025 by iamachristian.org,Inc All rights reserved.
