EZEQUIEL 10 - Biblia Quichua Cañar 2010

Diospac huasimanta sumaimanaachic nicuc anchurishcamanta

1Querubincunapac uma jahuapica shuc zafiro rumimanta ruhuashca mandashpa tiyarinaman ricchatami ricurcani.

2Chaimantami Mandac Diosca lino churanata churarishca runataca: «Querubincunapac ucupi tiyacuc rueda ucuman yaicushpa, rupacuc carbonta maqui jundata japishpa, pueblo jahuata shic-huai» nirca. Shina nicpimi, chai runaca ñuca ricucucpi yaicurca.

3Chai runa yaicucpica, querubincunaca Diospac huasi ura ladopimi carca. Shinallatac ucupi tiyac canzha pambapica puyumi jundarca.

4Mandac Diospac sumaimana achic nicucca querubincunapac jahuamantaca pungupimi tiyaringapac huichai rirca. Diospac huasipica puyu, cutin ucupi tiyac canzha pambapica Mandac Diospac sumaimana achic nicucmi jundarca.

5Shinallatac querubincunapac alascuna patac nishcapish Mandac Dios rimashca shinami, paipac huasi ucupi tiyac canzha pambacaman uyarirca.

6Shinallatac Mandac Diosca lino churanata churashca runataca: «Querubincunapac ruedacuna ucumanta ninata japi» nirca. Chaimantami chai runaca ninata japingapac yaicushpa, ruedacuna ladopi shayarirca.

7Chai querubincunapuramanta shucca paicunapac chaupimanta ninata japishpami, lino churanata churashca runapac maquipi churarca. Chai runa ninata japishpaca llucshircami.

8Querubincunapac alascuna ucupica gentepac maqui shinatami ricurcani.

9Chai querubincunapac cuchupica chuscu ruedacunatami ricurcani. Cada querubincunapac cuchupimi shuc rueda carca. Chai ruedacunaca crisólito rumi shina jagan nicucmi carca.

10Tucui ruedacunami chailayallatac carca. Shuc rueda ucupi shuctac rueda churashca shinami carca.

11Chai ruedacunaca chuscu ladomantami mana muyurishpa, ric carca. Punta rueda maiman ricpica, caishuc ruedacunapish caticmi carca. Maijan ladoman ricushpapish mana muyuricchu carca.

12Chai querubincunaca cuerpopipish, huashapipish, maquicunapipish, alascunapipish, muyundita ñahui jundami carca.

13Ñucaca chai ruedacunata: “¡Carreta!” nishpa, shutichictami uyarcani.

14Tucui querubincunami chuscu ladoman ñahuita charirca. Shuc lado ñahuica querubinpac, caishuc lado ñahuica gentepac, caishuc lado ñahuica leonpac, caishuc lado ñahuica aguilapac ñahui shinami carca.

15Chai querubincunaca Quebar jatun yacu cuchupi ñuca ricushca causaita chariccuna shinami carca. Chai querubincunaca jatarishpa rircami.

16Paicuna puri callaricpica, ruedacunapish puri callarircami. Chai querubincuna jahuata jataricpica, chai ruedacunapish jatarircami.

17Paicuna shayaricpica, ruedacunapish shayarircami. Paicuna jahuata ricpica, ruedacunapish jahuatami paicunahuan rirca. Chai ruedacunapica causaita chariccunapac espiritullatacmi carca.

18Chai quipami huasi umbral jahuapi tiyacuc Mandac Diospac sumaimana achic nicucca querubincunapac jahuapi tiyarirca.

19Ñuca ricucucpimi, chai querubincunaca alascunata alzashpa allpamanta rirca. Paicuna jatarishpa ricpica, ruedacunapish jatarishpa rircami. Chaimantaca Mandac Diospac huasiman rishpa, inti llucshina ladoman cac pungupimi shayarirca. Israelcunapac Diospac sumaimana achic nicucca paicunapac jahuapimi carca.

20Chaicunaca Quebar jatun yacu cuchupi israelcunapac Dios tiyacuc ucupi ricushca causaita chariccunallatacmi carca. Chaipimi querubincunallatac cashcata ricsircani.

21Tucuimi chuscu ñahuita, chuscu alasta charirca. Paicunapac alas ucupica gentepac maquiman ricchami carca.

22Paicunapac ñahuicunaca Quebar jatun yacu cuchupi ricushca shinallatacmi carca. Tucuimi mana muyurishpa, ñaupaman purirca.