APOCALIPSIS 20 - Biblia Quichua Cañar 2010

Huaranga huatacunamanta

1Chai quipaca jahua pachamanta shuc ángel jatun jutcuta llavina llaveta jatun cadenandi paipac maquipi apashpa urai shamucuctami ricurcani.

2Chai angelmi chai dragón nishca ñaupa rucu culebrataca, huaranga huatapa cadenahuan huatarca. Paillatacmi diablo nishcapish, Satanás nishcapish can.

3Chashna huatashpaca, jatun jutcuman shitashpami punguta huichcashpa, sellashpa churarca. Chaitaca huaranga huatacuna tucungacamanmi, gentecunata ama crichichun chashnaca ruhuarca. Chai quipaca ashacaman cacharishcami canga.

4Chai quipaca mandashpa tiyarinacunapi taripanata chasquiccuna tiyacuctami ricurcani. Shinallatac Diosmantapish, Jesucristomantapish huillashpa mana cungarishpa catishcamanta, cungata pitishpa huañuchishca almacunatapish ricurcanimi. Paicunaca chai manchana animaltapish, paiman ricchata ruhuashcatapish mana alli nircacunachu. Shinallatac chai manchana animalpac shutita frentepi cashpa, maquipi cashpa churachunca, paicunaca mana saquircacunachu. Paicunaca cutin causarishpami, huaranga huatata Cristohuan mandarcacuna.

5Paicunami punta causariccunaca carca. Shina cacpipish chaishuc huañushcacunaca chai huaranga huatacuna pactangacamanca mana causarircacunachu.

6Maijanpish chai punta causarinapi causariccunamanca, ¡mai cushicuimi canga! Paicunaca Diospaclla cac acllashcacunami can. Quipa huañuica imata paicunataca mana ruhuangachu, ashtahuanpish paicunaca Diospactapish, Cristopactapish ruhuac curacunami canga. Shinallatac paicunami Cristohuanca huaranga huatata mandangacuna.

Diablota chingachinamanta

7Huaranga huatacuna pactacpica Satanasca prezumanta cacharishcami canga.

8Paimi gentecunaman llullashpa crichingapac, tucui cai pachapi tiyac llactacunata puringa. Shinami Gog nishca, Magog nishca soldadocunatapish macanacungapac tandachinga. Chai soldadocunaca mama cuchapi tiyac tiyu shinami can.

9Chaicunaca tucui cai allpata quillpashpami, Diospaclla caccuna causana Dios cuyashca pueblota muyushpa shayarircacuna. Ashtahuanpish jahua pachamanta nina urmashpami, tucui tucuchirca.

10Chai llullashpa crichic diablotaca azufrehuan rupacuc nina cuchamanmi shitashca carca. Chaillapitami llullashpa huillacpish, manchana animalpish shitashca carca. Chaipica tutapish, punzhapish huiñaitami llaquichishca canga.

Mandashpa tiyarinapac ñaupapi taripana cashcamanta

11Chai quipaca shuc jatun yuranlla mandashpa tiyarinapi shuc tiyacuctami ricurcani. Paipac ñaupamantaca cai pachapish, jahua pachapish tucui chingarishpami maipi mana ricurirca.

12Chaipica huañushcacunatami jatuncunatapish, uchillacunatapish mandashpa tiyarinapac ñaupapi shayacucta ricurcani. Shinallatac librocunapish pascashcami carca. Huiñaita causangapac rina libropi quillcashcatapish pascashcatami ricurcani. Chai huañushcacunaca paicuna imata ruhuashca librocunapi quillcashca cashca shinami taripashca carca.

13Huañushcacunataca mama cuchapish, huañuipish, hadespish paicuna imata ruhuashca shinallatac taripashca cachunmi llucchirca.

14Chai quipaca, Huañuipish, Hadespish rupacuc nina cuchapimi shitashca carca. Chaica quipa huañuimi.

15Huiñaita causangapac rina libropi mana quillcashca cacca, rupacuc nina cuchapimi shitashca carca.