1 CRÓNICAS 12 - Biblia Quichua Cañar 2010

Davidpac soldadocunamanta

1David, Cispac churi Saulmanta miticushpa tiyacucpimi, macanacunata alli yachac sinchi runacuna Siclag pueblopi Davidhuan tandanacungapac shamurcacuna. Paicunaca jatun macanacuipi Davidta ayudacpuramantami carca.

2Chai runacunaca lluqui maquihuanpish, alli maquihuanpish arcohuan flechacunata shitanata, huaracahuan rumicunata shitanatapish alli yachaccunami carca.

3Benjaminpuramanta, Saulpac familiaca Gabaa llactamanta Semaapac churicuna Ahiezer, Joasmi carca. Ahiezermi mandacca carca. Shinallatac Azmavetpac churicuna Jeziel, Pelet, anatotitapuramanta Beraca, Jehumi carca.

4Gabaanitapuramanta Ismaiaspishmi carca. Paica quimsa chunga alli sinchi runacunapurami carca. Chai runacunamantaca paimi yalli sinchi carca. Gederatitapuramanta Jeremías, Jahaziel, shinallatac Johananmi carca.

5Eluzai, Jerimot, Bealías, Semarías, shinallatac harufitapuramanta Sefatiasmi carca.

6Coreitapuramanta Elcana, Isías, Azareel, Joezer, shinallatac Jasobeammi carca.

7Gedor pueblomanta Jerohampac churicuna Joela, shinallatac Zebadiasmi carca.

8Gadpac aillumantapish taucacunami Davidhuan tandanacurca. Davidca shitashca pambapimi miticunapi tiyacurca. Chai runacunaca macanacunata allita yachac, sinchi, shinallatac lanzata, escudota apanatapish alli yachaccunami carca. Paicunapac ñahuica leonpac ñahui shinami carca. Urcucunata taruga callpac shina utca riccunami carca.

9Paicunaca: Puntaca Eze, quipaca Obadías, quimsaniquica Eliab,

10chuscuniquica Mismana, Pichcaniquica Jeremías,

11Suctaniquica Atai, Canchisniquica Eliel,

12Pusacniquica Johanán, Iscunniquica Elzabad,

13Chunganiquica Jeremías, shinallatac chunga shucniquica Macbanaimi carca.

14Paicunami Gadpac huahua huahuapura macanacuc runacunata mandaccuna carca. Ashallata yachac sinchi soldadoca patsac runacunata mandacmi carca. Achcata yachac sinchi soldadoca huaranga runacunata mandacmi carca.

15Chai runacunami punta quillapi, Jordán yacu yallita jundashpa talliricucpipish chaita yallishpa chai pambapi causaccunataca, inti tigrana ladoman, inti llucshina ladoman caita chaita callpachirca.

16Chashnallatac Benjaminpac, Judapac aillupuramanta maijancunapish David miticushcamanmi tandaringapac rircacuna.

17David paicunahuan tupangapac llucshishpaca:

—Cushi causai tiyachun, shinallatac ñucata ayudangapac shamushca cacpica, tucui shunguhuanmi ñucahuan tandarichun chasquisha. Ashtahuanpish ñuca maquihuan ima mana allita mana ruhuashca cacpipish, ñucata piñaccunaman cungapac shamucpica, ñucanchic ñaupa taitacunapac Diosllatac ricushpa, cancunata llaquichichun— nirca.

18Shina nicpimi, quimsa chunga sinchi runacunata mandac Amasai Diospac Espíritu paipacman shamucpica:

«¡Isaipac churi David,

cambacmi canchic.

Cushi causaimi tiyanga!

¡Canpish, canta ayudaccunapish

cushi causaitami charinguichic!

¡Cantaca cambac

Diosmi ayudan!» nirca.

Shina nicpimi, Davidca paicunata chasquishpa, soldadocunata mandaccunahuan churarca.

19David Filisteocunahuan tandarishpa Saulhuan macanacungapac ricpi Manasespac huahua huahuapuramanta ric maijancunapish Davidhuanmi tandanacurca. (Filisteocunata mandaccuna: «Davidca ñucanchicta huañuchishpami paipac amo Saulpac parte tucunga» nishcamantami mana ayudarca.)

20Siclag pueblopi causangapac David shamucpimi, Manasespuramantaca: Adnas, Jozabad, Jediaiel, Micael, Jozabad, Eliú, shinallatac Ziletai Davidhuan tandanacurca. Paicunaca Manasespac huahua huahua huaranga huaranga soldadocunata mandaccunami carca.

21Tucui paicunami sinchi shinallatac soldadocunata mandaccuna carca. Tandanacushca shuhuaccuna llaquichingapac shamucpica paicunami Davidtaca ayudarca.

22Punzhantami Davidhuan tandaringapac achca soldadocuna shamurca. Shinami Diospac soldadocuna shina achca tucurca.

Israel llactapi Davidta mandac cachun churashcamanta

23Mandac Dios mandashca shinallatacmi David Hebrón pueblopi cacpi, Saúl mandanata Davidman cungapac Hebrón puebloman rircacuna. Caicunami soldadocunata mandac macanacungapac allichirishca soldadocunaca carca.

24Judapac aillumantaca sucta huaranga pusac patsac runacunami escudotapish, lanzatapish apashca macanacuiman rinalla carcacuna.

25Simeonpac aillumantaca canchis huaranga shuc patsac runacunami sinchi, imatapish mana manchac, macanacuiman rinalla carcacuna.

26Levipac aillumantaca chuscu huaranga sucta patsac runacunami carca.

27Shinallatac Aaronpac huahua huahuapuramanta mandac Joiadapish, paipac quimsa huaranga canchis patsac runacunahuanmi carca.

28Shinallatac imata mana manchac Sadoc mosopish, paipac huasi ucupurata mandac ishcai chunga ishcai runacunahuanmi carca.

29Benjaminpac huahua huahuapuramanta Saulpac aillumantaca quimsa huarangami carca. Paicunaca chai punzhacamanmi Saulpac huasi ucupurata cazushpa causarcacuna.

30Efrainpac aillumantaca ishcai chunga huaranga pusac patsac imatapish mana manchac runacunami carca. Paicunapac aillupurapica alli nishca runacunami carca.

31Davidta jatun mandac cachun churangapac ric Manasespac chaupi aillucunaca chunga pusac huaranga runacunami carca.

32Isacar aillumantaca ishcai patsac mandaccunami rirca. Paicunaca punzhacuna ima shina cashcata, shinallatac Israelcuna ima ruhuana cashcata yachaccunami carca. Paicunapac tucui huauquicunaca paicuna imata mandashcatami ruhuaccuna carca.

33Zabulonpac aillumantaca pichca chunga huaranga, tucuilaya macanacunahuan macanacungapac rinalla runacunami carca. Paicunaca shuc shungulla macanacungapacmi carca.

34Neftalipac aillumantaca soldadocunata mandac huaranga runacunami carca. Paicunahuanca quimsa chunga canchis huaranga escudohuan, lanzahuan macanacuc runacunami carca.

35Danpac aillumantaca ishcai chunga pusac huaranga sucta patsac macanacuiman rinalla runacunami carca.

36Aserpac aillumantaca chuscu chunga huaranga allichirishca, macanacuiman rinalla runacunami carca.

37Jordán yacu chimba ladomantapish, Rubenpac, Gadpac, shinallatac Manasespac chaupi aillucunamantapish patsac ishcai chunga huaranga runacunami carca. Paicunaca tucuilaya macanacunahuan macanacunata yachaccunami carca.

38Tucui cai macanacuc runacunami macanacungapac allichirishca, shuc shungulla Davidta tucui israelcunata jatun mandac cachun churangapac Hebrón puebloman rircacuna. Shinallatac caishuc israelcunapish, Davidta jatun mandac cachun churangapacmi shuc yuyailla tucurcacuna.

39Davidhuanca quimsa punzhatami micushpa, ubiashpa Hebrón pueblopi carcacuna. Paicunapac aillucunami paicunamanca micunata allichishca carca.

40Shinallatac cuchullapi causaccunapish, Isacarpac, Zabulonpac, Neftalipac aillucunapish harinata, higo tandata, chaquishca uvasta, vinota, aceiteta, burrocunapi, camellocunapi, mulacunapi, huagracunapi apachishpa apamurca. Shinallatac huagracunatapish, ovejacunatapish achcatami apamurca. Israel llactapica yalli cushicuimi tiyarca.