EZEQUIEL 38 - Biblia Quichua Cañar 2010

Jatun mandac Gogta llaquichinamanta

1Mandac Dios ñucata rimashpaca:

2«Huañunalla runa, Magog llactata ricushpa, Mesec, Tubal llactacunata jatun mandac Gog llaqui tucunata

3huillashpa: “Mandac Diosca: Mesec, Tubal llactacunata jatun mandac Goglla, canhuanca piñarishcami cani.

4Cantaca jazhapi fierro ganchota churashpami, cambac soldadocunandi, caballocunandi, caballopi ric soldadocunandi llucchisha. Tucui cancunami jatun escudocunahuan, uchilla escudocunahuan, espadacunahuan canguichic.

5Shinallatac Persia, Etiopía, Libia llactacunapi causaccunapish canhuanmi ringa. Paicunapish escudocunahuan, cascocunahuanmi cancuna.

6Shinallatac Gomer llacta gentecunapish, paicunapac soldadocunandi, jahua ladopi cac Bet-togarma llacta gentecunapish, paicunapac soldadocunandimi canhuan ringa. Shuctac gentecunapish canhuanmi canga.

7Canpish, canhuan tandanacushca soldadocunapish allichirichic. Canmi paicunataca pushangui.

8Achca punzhacuna quipaca Israel llacta urcucunaman richunmi mandasha. Chai llactaca unai huatacuna quipami llaquimanta quishpiringa. Chai llactamanmi tandanacushpa ringui. Israel llacta urcucunaman shamungui. Chaipi causaccunaca llaquinayaita tucuchishcami carca. Shina cashpapish, cunanca shuctac llactacunamanta llucshimushpami, imata mana manchashpa causan.

9Canca huairahuan tamya ric shina ringui. Cambac tucui soldadocunahuan, achca gentecunahuan rishpa, puyu shina, chai llactata tapangui.

10Mandac Dios ñucaca: Chai punzhami cambac shungupica mana allita ruhuanata yuyaringui.

11Chaimantami canca: ‘Muyundita mana pircashca, punguta mana aldabashca, macanacunata mana yachac llactacunaman rishpa, chai cushilla causac gentecunata llaquichingapacmi rigrini.

12Paicunaca shuctac llactamanta cutimushpami, llaquinayai shitashca llactata allichishpa causacun. Cunanca animalcunatapish, ima charishcacunatapish achcatami charin. Chashnami llacta chaupipi causacun’ nicunguimi.

13Sabá, Dedán llactacunapi causaccunapish, Tarsis llactamanta randishpa catushpa causaccunapish, tucui mandaccunapish cantaca: ‘¿Ima charishcacunata quichungapacchu shamurcangui? ¿Cullquitapish, curitapish, animalcunatapish, tucuita apangapacchu, cai tucui gentecunahuan shamurcangui?’ ningami” ningui.

14Chaimanta huañunalla runalla, jatun mandac Gog llaqui tucunata huillashpa: “Mandac Diosca: Chai punzhapimi canca ñuca acllashca israelcuna imata mana manchashpa causacushcataca yachangui.

15Cambac llactamantapish, jahua lado caru llactacunamantapish sinchi gentecunahuan tandanacushpami caballocunapi chayangui.

16Puyu shina rishpa, ñuca acllashcacunata tucuita tapashpa llaquichingui. Jatun mandac Goglla, quipa punzhacunapimi shuctac llactacunapi causaccunapac ñaupapi ñuca jucha illac cashcata ricuchichun, ñuca acllashcacunata llaquichichun cantaca ñucallatac cachasha.

Jatun mandac Gog ima tucunatahuillashcamanta

17Mandac Diosca: Ñaupa huatacunamanta canmanta ñucata serviccunata Israel huillaccunata huillachircani. Chai huillaccunami israelcunata ñuca llaquichinamanta huillarca. Chaitaca pactachishatacmi.

18Israel llactata jatun mandac Gogta llaquichicui punzhacunallatacmi ñucaca nina japiric shina yallita piñarisha. Chaitaca Mandac Dios ñucami nini.

19Chai punzhacunapi nina japiric shina ñuca piñaricpimi, Israel llactapica yallita allpa chucchui tiyanga.

20Mama cuchapi causac challuacunapish, volac animalcunapish, sacha animalcunapish, allpapi llucashpa puric animalcunapish, cai pachapi causac gentecunapish ñuca ñaupapimi chucchunga. Urcucunapish tuñiringami, quingraicunapish urmangami, pircacunapish tucuimi pambayanga.

21Tucui ñuca urcucunamantami jatun mandac Gog huañuchichun, jatun macanacuiman cayasha. Chaipica huauquinditami espadahuan huañuchinga. Chaitaca Mandac Dios ñucami nini.

22Jatun mandac Gogtaca ungüihuan huañuchishpami, yallita llaquichisha. Paipac soldadocunatapish, paihuan cac gentecunatapish manchana tamya runduhuan, nina azufrehuanmi yallita llaquichisha.

23Shina ruhuashpami, ñucaca jatun cashcata, jucha illac cashcata shuctac llactacunaman ricuchisha. Shina ruhuacpimi, ñucataca Mandac Dios cashcata yachangacuna” ninmi ningui.