JEREMÍAS 11 - Biblia Quichua Cañar 2010

Dios-huan ari nishcataisraelcuna paquishcamanta

1Mandac Dios Jeremiasta rimashpaca:

2«Ñuca ari nishcata uyashpa, tucui Judá llactapi causaccunamanpish, Jerusalenpi causaccunamanpish huillai.

3Israelcunata Mandac Diosca: “Ñucahuan ari nishcata mana cazuc runaca mana alli nishcami canga.

4Cai rimashcataca cancunapac ñaupa taitacunata Egiptomanta llucchimui punzhami mandarcani. Paicuna fierrota yacuyachina hornopi shina causacucpi, chaimanta llucchimushpami: Ñuca rimashcata uyashpa, ñuca mandashca shina causaichic. Shina causashpaca, ñuca acllashcacunami canguichic. Ñucapish cancunapac Diosmi casha.

5Cunan punzhapi nishca shinallatacmi cancunapac ñaupa taitacunaman lechepish, mishquipish yacu shina callpacuc llactata cusha nishpa, ari nircani. Chaitaca pactachishatacmi nircani” ninmi ningui» nirca.

Shina nicpimi ñucaca: «¡Mandac Dioslla, chashna cachun!» nircani.

6Shina nicpimi, Mandac Diosca: «Cai rimashcataca Judá llactapi tiyac llactacunapi, Jerusalén ñancunapi huillashpa: “Cai ari nishcata pactachichic.

7Ñaupa taitacunata Egiptomanta llucchimushca punzhamanta cunancamanmi: Ñuca mandashcacunata uyaichic nishpa punzhanta mandacurcanilla.

8Shina mandacucpipish, mana cazurcacunachu, mana uyasha nircacunachu. Ashtahuanpish paicunapac shungupi mana allita yuyaricushcatami ruhuashpa catirca. Chaimantami ñuca ari ninacushpa rimashcapi nishca shina, paicunata llaquichigrini. Chai rimashcata pactachichun mandacpipish, mana pactachircacunachu” ninmi ningui» nirca.

9Ashtahuanpish Mandac Diosca: «Judá llactapi, Jerusalenpi causaccunami pacalla ñucata llaquichingapac rimanacushca.

10Paicunapac ñaupa taitacuna shinallatacmi mana allita ruhuashpa, ñuca rimashcata mana cazushpa, shuctac dioscunata servirca. Israelcunapish, Judá llactapi causaccunapish paicunapac ñaupa taitacunahuan ari nishcatami yangapi churarca.

11Chaimantami Mandac Dios ñucaca yallita llaquichigrini. Chai llaquimanta mana quishpiri pudishpami, ñucata caparishpa mañanga. Chashna mañacpipish, manatac uyashachu.

12Judá llactacunapi causaccunapish, Jerusalenpi causaccunapish paicuna inciensota cushnichishpa adorana dioscunata caparishpa mañangapac ringacunami. Chai dioscunaca paicuna llaqui punzhapi cacpica, mana quishpichi pudingachu.

13Judá llactapi causaccunalla, cancunapac llactapi mashna llactacuna tiyashca shinallatacmi dioscunata charinguichic. Jerusalenpi causaccunalla, chaipi mashna callecuna tiyashca shinallatacmi Baal diosman inciensota cushnichina altarcunata shayachircanguichic.

14Canca, cai gentecunamantaca ama mañaichu. Ñucaca paicuna llaquihuan cashpa, ñucata caparishpa mañacui punzhapica mana uyashachu. Chaimanta paicunamantaca ama caparishpa ñucata mañanguichu.

15Ñuca cuyashca huarmi shina

llactalla, cai tucui millana

juchacunata ruhuashpaca,

¿imapactac ñuca huasimanca

shamunguichic?

¿Ñucaman animalta chicanyachishpa

cushpaca, cai llaquimanta,

quishpirishami yuyanguichicchu?

¿Chaita cushpaca cushicushami

yuyanguichicchu?

16Ñucaca: Sumacta pucuc,

alaja ricuric olivos yurami cangui

nicmi carcani.

Shina cacpipish, ninata churashpa,

pangacunata culun nichishpa

rupachicpica,

ramacunaca paquirircami.

17Canta tarpuc tucuita Mandac Dios ñucami canta llaquichinata huillani. Israelcunapish, Judá llactapi causaccunapish Baal diosman inciensota cushnichishpa, mana allita ruhuashpa, ñucata piñachishcamantami chashna ruhuagrini» ninmi.

Jeremiasta huañuchinatayuyarishcamanta

18Ñucata piñaccuna ñucata huañuchinata pacalla yuyarishcataca Mandac Diosmi huillarca.

19Ñucaca, ñucata huañuchinata yuyaricushcata mana yachashpami, huañuchina ucuman ric llaquilla oveja shina carcani. Piñaccuna: «Paipac shutita pipish ama ashtahuan yuyarichun, yurataca pucushca granondi pitishpa, cai pachapi causaccunapuramanta tucuchishunchic» ninacushcami carca.

20Shina cacpimi ñucaca:

«Tucuita Mandac Dioslla,

canca cashcata ruhuacmi cangui.

Tucui gentecunapac yuyaitapish,

shungupi yuyacushcatapish

allita ricucmi cangui.

Ñucata llaquichinata

yuyariccunataca

cambac maquipi churarcani.

Can paicunata llaquichicucta

ricunatami munani» nircani.

21Anatot runacunaca: «Ñucanchic maquipi mana huañungapacca, Mandac Diospac shutipi ama ashtahuan huillaichu» nircami.

22Chaimantami tucuita Mandac Diosca: «Ñucami paicunataca llaquichigrini. Quipa huiñai huambracunaca jatun macanacuipimi huañunga. Paicunapac churicunapish, ushicunapish yarcaihuanmi huañunga.

23Paicunapuramantaca shucllapish mana saquiringachu. Anatot runacunataca llaquichina punzhapica ñucallatacmi yallita llaquichisha» nirca.