2 CRÓNICAS 16 - Biblia Quichua Cañar 2010

Asahuan Ben-adadhuan ari nishcamanta(1 R 15.16-22)

1Jatun mandac Asa quimsa chunga sucta huatata mandacucpimi, israelcunata jatun mandac Baasaca Judá llactapi causaccunahuan macanacungapac huichai rishpa, Judá llactata jatun mandac Asapacman ama richun, Ramá pueblo muyunditaca jatun pircata ruhuarca.

2Chaimantami Judá llactata jatun mandac Asaca Mandac Diospac huasimanta, mandashpa tiyana huasipi imapish yalli valishcacunata huacaichinamanta cullquita, curita llucchishpa Siria llactata jatun mandac Damascopi causac Ben-adadman cuchun cacharca.

3Shina cachacpimi paica: «Ñuca taitahuan, cambac taitahuan ari nishca shina, ñucanchicpish ari ninacushun. Riqui, canmanmi cai cullquitapish, curitapish cachani. Cunanca Israel llactata jatun mandac Baasapacman rishpa, can ari nishcata paqui. Chashna ruhuacpimi, ñucata llaquichinamanta saquinga» nichun cacharca.

4Ben-adadca jatun mandac Asa mañashcata ari nishpami Israel llacta pueblocunapi causaccunahuan macanacuchun, paipac soldadocunata mandaccunata cacharca. Paicunami Ijón, Dan, Abe-maim pueblocunatapish Neftalí llactapi ima tiyashcacunata huacaichina pueblocunatapish quichurca.

5Chaita uyashpami, Baasaca Ramá pueblota shayachicushcatapish saquishpa rirca.

6Chaimantami jatun mandac Asaca Judá llactapi tucui causaccunata pushashpa, Ramá pueblopi Baasa shayachicushca rumicunata, caspicunata tucui aparca. Chaicunahuanca Geba, Mizpa pueblocunatami shayachirca.

7Chai huatapimi, Dios ricuchishcata huillac Hanani Judá llactata jatun mandac Asapacman shamushpaca: «Canca, canta Mandac Diosta ayudachun mañanapac randica, Siria llacta jatun mandactami ayudai nishpa mañarcangui. Chaimantami Siria llactata jatun mandacpac soldadocunaca cambac maquimanta atishpa rirca.

8Etiopía, Libia llactamanta cac soldadocunaca macanacuna carretacunandi, caballopi ric soldadocunandica achcami carca. Shina cacpipish, Mandac Diosta ayudachun, can mañashcamantami paicunataca cambac maquipi churarca.

9Mandac Diosca alli shunguhuan allita ruhuashpa, paita cazuccunaman tucui imatapish ruhuashpa ayudangapacmi tucui cai pachata ricucun. Canca mana yuyaita charic shinami ruhuashcangui. Chashna ruhuashcamantaca cunanmanta pachami ashtahuan canhuan macanacungapac shamungacuna» nirca.

10Shina nicpimi, Asaca yallita piñarishpa, Dios ricuchishcata huillactaca carcelpi churarca. Chai huatacunapica yallitami Judá llactapi causaccunataca llaquichirca.

Asa huañushcamanta(1 R 15.23-24)

11Ñaupa punzhacuna, quipa punzhacuna Asa imata ruhuashcaca Judá llactata, Israel llactata jatun mandaccuna imata ruhuashcacunata quillcashcapimi tiyacun.

12Asa quimsa chunga iscun huatata mandacucpimi, chaquipi ungüi japirca. Chai ungüihuanca huañunallami tucurca. Shina tucushpapish, Mandac Diosta mañanapac randica jambiccunatami mashcarca.

13Asaca chuscu chunga shuc huatata mandacushpami, huañushpa paipac ñaupa taitacunahuan tandanacugrirca.

14Pai huañucpica, Davidpac pueblopi paita enterrachun, paillatac ruhuachishca jutcupimi enterrarca. Paita churashca ataudpica chican chican mishquilla ashnacuccunatami jundachirca. Chai jambicunaca mishquilla ashnacucta ruhuanata alli yachaccuna ruhuashcami carca. Chai quipaca paita yuyarishpami, achca ninata japichircacuna.