1 REYES 16 - Biblia Quichua Cañar 2010

1Chashna cacpimi, Mandac Diosca Baasata llaquichinata Hananipac churi Jehuman huillashpaca:

2«Cantaca ñuto allpamanta jatarichishpami, ñuca acllashca israelcunata mandachun churarcani. Ashtahuanpish canca Jeroboam shinallatac juchata ruhuashpami ñuca acllashca israelcunatapish juchata ruhuachishcangui. Can ruhuashca juchacunahuanmi ñucataca yallita llaquichingui.

3Chaimantami Baasatapish, paipac familiatapish Nabatpac churi Jeroboampac familiatapish tucui chingachigrini.

4Baasapac familiamanta maijan pueblopi huañucpica, allcucunami micunga. Tarpuna pambacunapi huañucpica, jahuata volac animalcunami micunga» nirca.

5Baasapac shuctac ruhuashcacunapish, alli sinchi cashcapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

6Baasa huañushpa paipac ñaupa taitacunahuan tandanacucpica, Tirsa pueblopimi enterrarca. Paipac randica paipac churi Elami mandarca.

7Mandac Diosca pai ima nishcata huillac Hananipac churi Jehumanmi Baasatapish, paipac familiatapish llaquichinata huillarca. Mandac Diospac ñaupapi Baasa paipac maquihuan mana allita ruhuashpa Diosta piñachishcamantami Jeroboampac huasi ucupurata shina tucuchingapac chashna huillarca.

Israel llactata Ela mandashcamanta

8Judá llactata jatun mandac Asa ishcai chunga sucta huatata mandacucpimi, Baasapac churi Elaca Israel llactata Tirsa pueblopi mandai callarirca. Paica ishcai huatatami mandarca.

9Carretacunapi puric chaupi soldadocunata mandac paita servic Zimrimi huañuchingapac shuccunahuan pacalla parlanacurca. Elaca Tirsa pueblopimi paipac mayordomo Arsapac huasipi ubiashpa, machashpa tiyacurca.

10Chashna machashca tiyacucpimi, Zimrica chaiman chayashpa, Elata macashpa huañuchishpa, paipac randi mandai callarirca. Judá llactata jatun mandac Asaca ñami ishcai chunga canchis huatata mandacurca.

11Mandangapac tiyarinapi Zimri tiyarishpaca, Baasapac tucui huasi familiatapish, ricsishcacunatapish shucllatapish mana saquishpami paipac huasi ucupuratapish, tucui huañuchirca.

12Zimrica chashnami Baasapac tucui huasi familiataca tucuchirca. Paica Baasata ima shina llaquichinata Dios ima nishcata huillac Jehuman Mandac Dios huillachishca shinallatacmi llaquichirca.

13Baasapish, paipac churi Elapish juchacunata ruhuashpa israelcunata juchapi urmachishcamantami chashna tucuchirca. Paicunapac yanga dioscunata mañashpami, israelcunata Mandac Diosta yallita piñachirca.

14Elapac shuctac ruhuashcacunapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

15Judá llactata jatun mandac Asa ishcai chunga canchis huatata mandacucpimi, Zimrica mandai callarirca. Paica canchis punzhallatacmi Tirsa pueblopi mandarca. Israelcunaca filisteocunapac llacta Gibetón pueblopi causaccunahuan macanacungapacmi carpa huasicunata shayachishpa chapacurcacuna.

16Gibetón pueblo cuchupi carpa huasicunata shayachishpa, chapac soldadocunaca: «Zimrica pacalla parlanacushpami, jatun mandactaca huañuchishca» nishcatami uyarcacuna. Chaimantami tucui israelcunaca chai macanacuna pamballapitac chai punzhallatac soldadocunata mandac Omrita paicunata jatun mandac cachun churarca.

17Omrica tucui israelcunandi Gibetón pueblomanta huichai rishpami, Tirsa pueblota japingapac muyunacushpa shayarirca.

18Ashtahuanpish Zimrica chai pueblota ña quichushcata ricushpami, mandana huasillapitac ashtahuan sinchita pircashca ucuman yaicushpa, ninata japichishpa chai ucullapitac huañurca.

19Mandac Diospac ñaupapi mana allita ruhuashpa juchata ruhuashcamanta, shinallatac Jeroboam ruhuashca juchallatatac ruhuashpa, israelcunatapish juchapi urmachishpa causashcamantami chashnaca tucurca.

20Zimripac shuctac ruhuashcacunapish, jatun mandac huañuchingapac pacalla parlanacushcapish, Israel llactata jatun mandaccuna imata ruhuashcacunata quillcashcapimi tiyacun.

Israel llactata Omri mandashcamanta

21Israelcunaca ishcaipimi chaupirircacuna. Shuc chaupica Ginatpac churi Tibnitami jatun mandac cachun churashun nircacuna. Caishuc chaupica Omritami churashun nircacuna.

22Ashtahuanpish Omrihuan cac gentecunami Ginatpac churi Tibnihuan caccunata atircacuna. Shina Tibni huañucpica, Omrimi jatun mandac tucurca.

23Judá llactata jatun mandac Asa quimsa chunga shuc huatata mandacucpimi, Omrica Israel llactata mandai callarirca. Paica chunga ishcai huatatami mandarca. Sucta huatataca Tirsa pueblopimi mandarca.

24Omrica Semermanmi Samaria urcuta ishcai talento cullquipi randirca. Chai urcupi shuc pueblota ruhuashpami, chai urcuta catuc Semer shuti cashcamanta chai pueblotaca Samariata shutichirca.

25Omrica Mandac Diospac ñaupapica mana allita ruhuashpami causarca. Paipac punta tiyashca mandaccuna mana alli ruhuashcatapish yalli mana allitami ruhuarca.

26Paica Nabatpac churi Jeroboam mana allita ruhuashca shinallatacmi ruhuashcalla dioscunata alli nishpa, israelcunatapish chai juchallapitac urmachishpa Mandac Diostaca yallita piñachirca.

27Omripac shuctac ruhuashcacunapish, imacunallata ruhuashcacunapish, sinchi tucushcapish Israel llacta jatun mandaccuna imata ruhuashcacunata quillcashcapimi tiyacun.

28Omri huañushpa, paipac ñaupa taitacunahuan tandanacucpica, Samaria pueblopimi enterrarca. Paipac randica paipac churi Acabmi mandarca.

Acab Israel llactata mandashcamanta

29Judá llactata jatun mandac Asa quimsa chunga pusac huatata mandacucpimi, Omripac churi Acabca Israel llactata mandai callarirca.

30Omripac churi Acabca ishcai chunga ishcai huatatami Samaria pueblopi mandarca.

Omripac churi Acabca Mandac Diospac ñaupapica paipac punta mandaccunata ashtahuan yallimi mana allita ruhuarca.

31Paica Nabatpac churi Jeroboam shinallatac juchacunata ruhuashpapish, ima juchata mana ruhuanichu nishpami yuyarca. Paica Sidón llactata jatun mandac Etbaalpac ushi Jezabelhuanmi cazararca. Ña cazarashpaca Baal diosta alli nishpa, servishpa causangapacmi rirca.

32Baal diosman Samaria pueblopi ruhuashca huasipimi Baal diosman shuc altarta ruhuarca.

33Acabca Asera huarmi diostapish ruhuarcami. Chashnami Acabca Israel llactata paipac punta mandaccunatapish yalli ashtahuan mana allita ruhuashpa, israelcunata Mandac Diostaca yallita piñachirca.

34Acab mandacuc huatacunapica Bet-el pueblopi causacuc Hielmi Jericó pueblota cutin allichirca. Chai pueblo muyundipi jatun pircata shayachingapac callari rumicunata churacucpica, paipac punta churi Abirammi huañurca. Chai pircapi punguta churacucpica, paipac quipa churi Segubmi huañurca. Chashna llaqui tucunataca Nunpac churi Josueman, Mandac Dios huillashca shinami tucurca.