ROMANOS 6 - Biblia Quichua Cañar 2010

Cristopac causacushpaca,ña mana juchata ruhuana cashcamanta

1Shina cacpica, ¿imatatac nishun? Dios ashtahuan cuyac cashcata ricuchichunca, ¿ashtahuan juchata ruhuacushunllachu?

2¡Mana chashnachu cana can! Juchata ña mana ruhuangapacmi, huañushca shina canchic. ¿Maitatac juchata ruhuashpa catishunyari?

3¿Manachu bautizarishpaca, Jesucristohuan shuc shinalla tucushpa, paihuan huañungapac bautizarishcata yachanguichic?

4Diosca, paipac poderhuanmi Cristota huañushcacunapuramanta causachirca, chai shinallatacmi ñucanchicpish mushuc causaita causangapac bautizarircanchic. Shinallatac Cristo huañushca shina huañungapac, pai enterrarishca shina enterraringapacmi bautizarircanchic.

5Cristohuan huañungapacmi shuc shinalla tucurcanchic, chai shinallatacmi Dios causachicpica, paihuan shuc shinalla cashun.

6Ñaupa causacushca Cristohuan pacta chacatarishca cashcataca yachanchicmi. Chaica, juchata ruhuana munai ama atichunmi, chai juchacunataca chingachishpa, Cristohuan chacatarishca shina canchic.

7Juchata mana ruhuangapac huañushcaca, juchamanta cacharichishcami.

8Cristohuan huañushpaca, paillahuantac causana cashcatapish,

9Cristo huañushcacunapuramanta causarishpaca, ña mana huañuna cashcatapishmi crinchic. Huañuica paitaca ña imata mana ruhuai pudingachu.

10Cristoca shuc cutinlla huañushpami tucui juchacunata atirca. Ña causarishpaca, Diospacllami causacun.

11Chai shinallatacmi cancunapish juchata ruhuangapacca, huañushca shina, cutin Diospacta ruhuangapacca Cristohuan pacta causacuc shina yuyana canguichic.

12Chaimanta cancunapac huañunalla cuerpopi juchata ruhuana munai tiyachunpish, jucha mandashpa millaita ruhuachichunpish ama saquinguichicchu.

13Ama cancunapac cuerpo ima mana allicunata ruhuachun saquinguichicchu. Chaipac randica huañushcacunapuramanta causarishca shina, Diospacllata ruhuachun paillaman cuichic. Cancunapac cuerpotaca Diospacta ruhuachun saquichic.

14Cancunaca mana Moisés mandashcacuna mandashcachu causacunguichic, ashtahuanpish Diospac cuyaimantami causacunguichic. Chaimanta cancunaca ña mana jucha mandashcachu causacunguichic.

Cashcata ruhuaccuna cashcamanta

15Shina cacpica, ¿imatatac nishun? Shinaca, mana mandashcacuna mandashcachu causacunchic, ashtahuanpish Diospac cuyaimantami causacunchic, nishpaca, ¿juchata ruhuashpa caticushunllachu? ¡Mana chashnachu cana can!

16Maijanpish amota cazungapac yaicushpaca, servicmi tucun. Chaitaca cancunallatac yachanguichicmi. Chai shinallatacmi jucha mandashca causacushpaca, huañuiman apac juchata servicunguichic. Ashtahuanpish Diosta cazushpaca, pai chasquishcami canguichic.

17Cancunaca utcapi jucha mandashca causacushpapish, cunanca Diosmanta yachacushcacunataca tucui shunguhuanmi cazushcanguichic. Chaimantami Diostaca pagui nini.

18Juchamanta cacharirishpaca, allita ruhuangapacmi Diosta serviccuna tucushcanguichic.

19Cancuna mana entendinalla cacpimi, entendinallata rimani. Ima shinami utcaman cancunapac cuerpota imapish millana mana allita ruhuachun saquircanguichic, chai shinallatac cunanca cuerpotaca Diospaclla tucushpa, servichun saquichic.

20Cancunaca jucha mandashca causacushpaca, Diospac munaita mana ruhuarcanguichicchu.

21Chai ruhuashcacunamantaca cunan pingaihuanmi canguichic. Shinaca, ¿ima allitatac japircanguichic? Chaicunaca huañuimanmi apan.

22Cunan juchamanta Dios cacharichicpica, paita serviccunami canguichic. Chaimantaca Diospaclla chicanyarishpa, huiñai causaitami japircanguichic.

23Juchamanta japinaca, huañuimi. Ashtahuanpish Diosca Apunchic Jesucristomantami huiñai causaita yanga cun.