1¿Alli yachaica manachu cayacun?
¿Alli yuyaipish manachu
sinchita caparicun?
2Ñan lado patacunapimi,
ñan tupanacuicunapimi shayarin.
3Pungu ladocunapi,
puebloman yaicuna pungu
huashacunapi caparishpaca:
4«¡Tucui gentecunalla,
cancunatami cayacuni!
¡Huañuclla aichayuc runacunamanmi
sinchita huillacuni!
5Yuyai illac runacuna
alli yuyarishpa purinata
yachacuichicyari.
Mana entendic runacunapish,
alli yuyarishpa purichicyari.
6Ñucaca sumac rimaicunatami rimagrini.
Ñuca shimihuanca allita ruhuanatami
yachachigrini.
Chaitaca uyaichicyari.
7Ñuca shimihuanca
mana llullashpami yachachigrini.
Ñuca shimica llullanataca millanayachinmi.
8Ñuca shimihuan tucui yachachishcaca
chashnatacmi.
Cai rimashcapica ima mana allipish,
ima pandapish mana tiyanchu.
9Tucui cai rimashcacunaca entendic
runapacca allimi.
Alli yachaccunapacca
yuyaita japinalla rimashcacunami.
10Cullquipac randica,
ñuca yachachishcata chasquichic.
Alli curipac randica,
alli yachanata mashcaichic.
11Alli yachaica
perlas rumicunatapish yallimi.
Tucuimanta yalli munashca sumac
charinacunahuanpish
mana chimbapuraipacchu.
Yachaimanta rimashcamanta12Alli yachai, ñucaca, alli yuyaita
chariccunahuanmi causani.
Chaimantami allita yachachishpa
cunani.
13Mandac Diosta manchaccunaca
mana allita ruhuaccunata piñanmi.
Jatun tucunatapish,
yallita jatun tucunatapish
mana alliman apac ñantapish
mana munanichu.
14Cunanapish, allita yuyarishpa
yachac canapish ñucapacmi.
Allita yachac canapish,
sinchi canapish ñucapacmi.
15Ñucamantami jatun
mandaccunapish mandacun.
Ñucamantami imatapish,
cashcata ruhuashpa mandancuna.
16Ñucamantami mandaccunapish
mandancuna.
Ñucamantami alli ricushpa,
allichincuna.
17Ñucata cuyaccunataca cuyanimi.
Ñucata mashcaccunaca tarinmi.
18Alli nishca canapish,
charic canapish ñucahuanmi.
Mana tucuriclla charinacunapish,
cashcata ruhuanapish ñucahuanmi.
19Ñuca yachachishcaca,
alli curitapish yalli allimi.
Chuyanlla jagan nicuc cullquitapish
yalli allimi.
20Allita ruhuaccunapac ñanta
cashcata ruhuana ñantami pushasha.
21Ñucata cuyaccuna paicuna japina
cashcata japichunmi, chashnaca pushasha.
Alli valishcacunatapish
huacaichinapi jundachishami.
22Mandac Diosmi punta huatacunamanta
pacha imata manarac ruhuashpa
ñucata ruhuarca.
23Huiñaimanta pacha,
callarimanta pacha,
cai pacha manarac tiyacpimi,
ñucaca ña tiyarcani.
24Manarac mama cucha tiyacpi,
tucyac yacu junducuna manarac
tiyacpimi ña tiyarcani.
25Urcucunapish, lomacunapish
manarac tiyacpimi
ñucaca ña tiyarcani.
26Cai pachapish, pambacunapish,
cai pachapi chaquishca allpapish
manarac ruhuashcachu carca.
27Jahua pachata ruhuacpica
ñucapish chaipimi carcani.
Manchana ucu yacucunata,
jahuata muyundita churacpica
chaipimi carcani.
28Puyuta huairapi churacpi,
mama cucha yacu tucyanata
churacpipish chaipimi carcani.
29Mama cucha yacu maiman richun,
mandacucpipish chaipimi carcani.
Cai pacha callari rumicunata
churacucpipish chaipimi carcani.
30Tucui chaicunatami
Dios-huan allichircani.
Punzhantami paitaca cushichicurcani.
Tucui causaipimi paipac ñaupapi
cushicushpa causarcani.
31Gentecuna causana cai pachahuanmi
cushicuni.
Huañuclla runacunahuanmi cushicuni.
32Cunanca huahuacuna uyaichic:
Ñuca yachachishcacunata
cazuccunaca cushicunmi.
33Ñuca rimashcacunata uyashpa,
alli yachaisapa caichic.
Chaitaca ama yangapi churaichicchu.
34Ñuca yachachishcata uyangapac,
ñuca huasi pungupi
punzhanta shuyacuc runaca
yallita cushicuchun.
Paica ñuca huasi pungu pilar
ladopimi shuyacun.
35Ñucata caticca causaita charingami.
Shinallatac Mandac Diospac cuyaitapish
chasquingami.
36Ashtahuanpish ñucamanta caruyacca
paillatacmi causaita chingachin.
Ñucata tucui piñaccunaca huañuitami
cuyacun» nishpami caparicun.
Who We AreWhat We EelieveWhat We Do
2025 by iamachristian.org,Inc All rights reserved.
