1Mama cucha ladopi cac tio allpapi shayacushpami yacumanta shuc manchana animal llucshicta ricurcani. Chai animalca canchis umayuc, chunga gachuyucmi carca. Chai gachucunapica coronatami charirca. Shinallatac umacunapica, Diosta piñachishpa quillcashcacunatami charirca.
2Chai ñuca ricushca manchana animalca leopardoman ricchami carca. Chaquica osopac chaqui shina, shimica leonpac shimi shinami carca. Dragonmi pai shina mandashpa tiyarinatapish, poderyuc canatapish, shinallatac mandanatapish chai manchana animalman curca.
3Chai animalpac umacunapuramanta shuc umaca yallita chugrishca huañunallami carca. Chashna cacpipish chai chugri alli tucucpimi, tucui cai pachapi causaccunaca mana amirishpa chai animalta catircacuna.
4Chai animalman poderta cushcamantami, dragontaca “allimari cangui” nircacuna. Shinallatac chai manchana animalta alli nishpaca: «Cai manchana animal shinaca pipish mana tiyanchu. ¿Paihuanca pitac macanacungayari?» nircacuna.
5Chai manchana animalmanca Diosta piñashpa rimanata, shinallatac chuscu chunga ishcai quillata mandanatapish, curcami.
6Shina cucpimi Diostapish piñashpa, paipac huasitapish, shinallatac jahua pachapi causaccunatapish mana alli nishpa mapata rimarca.
7Shinallatac Diospaclla caccunahuan macanacushpa, mishachun, tucui aillucunata, tucuilaya rimaita rimaccunata, tucuilaya gentecunata, shinallatac tucui cai pacha llactacunata mandachunpish saquircami.
8Tucui cai pachapi causaccunami chai animaltaca “allimari cangui” nircacuna. Chaicunaca cai pachata Dios ruhuashca punzhamanta pacha huiñaita causangapac rina, huañuchishca cac Pactalla Oveja charicuc libropi shutita mana quillcashcacunami can.
9Maijanpish ringrita charicca caita uyaichic:
10«Maijanpish prezu apana cacca
prezu apashcami canga.
Espadahuan huañuchina cacca
espadallahuantacmi huañuchishca canga».
Chashna tucucpica mana piñarishpami Diospaclla caccunaca Diosta crishpa catina can.
11Chai quipaca cutin shuc manchana animaltami allpa ucumanta llucshicta ricurcani. Chai animalca ovejapac gachu shina ishcai gachucunatami charirca, shinallatac dragón shinami rimarca.
12Chai animalca punta animal shinallatacmi paipac ñaupapica poderyuc carca. Shinallatac huañunalla chugrishca alli tucushca punta animaltami cai pachapi causaccunataca “allimari cangui” nichun nirca.
13Pi mana ruhuaipaccunatapish ruhuashpa ricuchishpami, jahua pachamantapish ninata tucuipac ricuipi urmachirca.
14Cai manchana animalca punta shamuc animalpac ñaupapi chashna ruhuashpa ricuchishpami cai pachapi causaccunata umarca. Chaipac quipaca, chai punta animalca espadahuan huañunallata chugrichishca cashpapish, causashpa catinmi, chaimanta chai animalman ricchata ruhuaichi nishpami mandarca.
15Diosca quipa animaltaca punta animalman ricchata ruhuashca animalman causaita cuchun, rimachichun, shinallatac paita mana “allimari cangui” niccunata huañuchichunmi saquirca.
16Shinallatac uchillacunata cashpa, jatuncunata cashpa, huacchacunata cashpa, chayuccunata cashpa, alli lado maquipi, mana cashpaca frentepi sellota churachunmi mandarca.
17Maijanpish chai sellota mana charicca catunatapish, randinatapish mana pudircachu. Chaica, chai animalpac señal, mana cashpaca shuti, mana cashpaca chai animalpac shutipac yupaimi carca.
18Maijanpish alli yachacllami, chai animalpac yupai ima nicushcataca yachanga. Chai animalpac yupaica sucta pasac sucta chunga suctami. Chai yupaica shuc runapac shutitami nisha nin. Chaitaca alli yachaccunallami yachac chayanga.
Who We AreWhat We EelieveWhat We Do
2025 by iamachristian.org,Inc All rights reserved.
