1Dioslla, canllami Sión urcupica
alabashca cana cangui.
Canman imata cusha nishcataca
pactachishunmi.
2Ñuca mañashcataca uyangui.
Tucui runacunami cambacman shamungacuna.
3Ñuca juchacunallatacmi ñucataca aticun.
Shina cacpipish canca perdonanguimi.
4Can acllashpa, cambac cuchuman apamushpa
cambac huasi corredorpi causachun
churashca runaca cushicuchun.
Cambaclla huasipi tiyac sumac allicunata
chasquishpami cushicushun.
5Ñucanchicta quishpichic Dioslla,
ñucanchic mañacpica,
cashcata ruhuashpami cutichingui.
Tucui llactacunapi causaccunapish,
caru mama cucha llactapi causaccunapish
canllatami shuyancuna.
6Canmi urcucunataca cambac poderhuan
sinchita ruhuashcangui.
Podertaca chumbillirishca shinami charingui.
7Mama cucha yalli huaj nicuctapish,
yacucuna manchanayaita jataricpipish
canmi casillata ruhuangui.
Llactacunapi causaccuna caparinacucpipish,
canmi upallachingui.
8Chashna sumaimanata ruhuacta ricushpami,
tucui cai pachapi causaccunapish manchancuna.
Canmi inti llucshinamanta callarishpa
inti tigrana llactacaman cushichingui.
9Cai pachatapish ricungapac shamushpa,
tamyachishpami yallita granota pucuchingui.
Cambac jatun yacuta tallishpami
sumaimana chagrata pucuchingui.
¡Can munashca shinami tucuita ruhuangui!
10Yapushca huachucunatapish tamyachishpami
pambaclla ruhuangui.
Jatun rumiyashca allpacunatapish
ñutuyactami ruhuangui.
Bendiciashpami muyutapish huiñachingui.
11Huatapica achcatami pucuchingui.
Can purishpapish allicunatami cungui.
12Shitashca pambacunapipish,
sumac quihuacunami huiñan.
Lomacunapish cushilla cac shinami tucun.
13Animalcunapish pamba jundami tucun.
Pugru pambacunapish tucui chagrallami.
Yallita cushicushpami caparishpa cantancuna.
Who We AreWhat We EelieveWhat We Do
2025 by iamachristian.org,Inc All rights reserved.
