DEUTERONOMIO 27 - Biblia Quichua Cañar 2010

Rumicunapi quillcashca mandashcamanta

1Moisespish, israelcunata pushac yuyaccunapish israelcunata rimashpaca:

«Cunan ñuca huillashca mandashcacunata pactachinguichic.

2Mandac Dios cushca llactaman ringapac Jordán yacuta pasashca punzhapica jatun rumicunata shayachishpami calhuan yuracyachina canguichic.

3Mandac Dios ñaupa taitacunaman cushami nishca llactaman yaicungapac pasashpaca cai mandashcacunata chai rumipi quillcanguichic. Chai llactaca lechepish, mishquipish yacu shina tiyac llactami.

4Cunan ñuca mandashca shina Jordán yacuta pasashpa, Ebal urcupi rumicunata shayachishpa, calhuan yuracyachinguichic.

5Chaipi rumicunamanta shuc altarta Mandac Diosman ruhuanguichic. Chai rumicunataca ama fierrohuan labranguichicchu.

6Chai mana labrashca rumicunahuan ruhuashca altarpi Mandac Diosman cushpa, animalta tucui rupachinguichic.

7Shinallatac Dios-huan alli tucungapacpish animalta cunguichic. Chaipi micushpa, Mandac Diospac ñaupapi cushicunguichic.

8Chai rumicunapica cai mandashcacunata tucui ricunallata quillcanguichic» nirca.

9Chaimantaca Moises-huan levita curacunahuan israelcunata rimashpaca: «Israelcunalla, upalla caita uyaichicyari. Cunanmi cancunaca Mandac Dios acllashca tucushcanguichic.

10Mandac Dios tucui nishcata cazunguichic. Tucui pai mandashcacunatapish, pactachinacunatapish cazunguichic» nirca.

Ebal urcupi maldiciashcamanta

11Chai punzhapi Moisés israelcunata mandashpaca:

12«Jordán yacuta cancuna pasacpica, Simeonpac, Levipac, Judapac, Isacarpac, Josepac, Benjaminpac aillucunami israelcunata bendiciangapac Gerizim urcupi shayaringa.

13Cutin Rubenpac, Gadpac, Aserpac, Zabulonpac, Danpac, Neftalipac aillucunaca maldiciangapacmi Ebal urcupi shayaringa.

14Levitacunaca israelcunataca:

15“Caspimanta, mana cashpaca fierrota yacuyachishpa imamanpish riccha, Mandac Dios millanayachishca diosta ruhuashpa, pacallapi churacca, llaqui tucushca cachun” nishpa caparicpica, tucui gentecunami: “¡Chashna cachun!” ninga.

16Cutin: “¡Taita mamata mana ricunayachicca, llaqui tucushca cachun!” nicpica, tucui gentecunami: “¡Chashna cachun!” ninga.

17Cutin: “¡Maijanpac allpa linderota yaicurishpa, llaquichicca, llaqui tucushca cachun!” nicpica, tucui gentecunami: “¡Chashna cachun!” ninga.

18Cutin: “¡Ñahui mana ricuc runata ñanta pandachicca, llaqui tucushca cachun!” nicpica, tucui gentecunami: “¡Chashna cachun!” ninga.

19Cutin: “¡Shuctac llactata runacuna, taita mama illaccuna, viudacuna japinata shucman cucca, llaqui tucushca cachun!” nicpica, tucui gentecunami: “¡Chashna cachun!” ninga.

20Cutin rimashpaca: “¡Taitapac huarmihuan sueñushpa, taitata pingaichicca, llaqui tucushca cachun!” nicpica, tucui gentecunami: “¡Chashna cachun!” ninga.

21Cutin: “¡Huarmihuan chayaric shina animalhuan chayaricca, llaqui tucushca cachun!” nicpica, tucui gentecunami: “¡Chashna cachun!” ninga.

22Cutin: “¡Taitamanta, mana cashpaca mamamanta panihuan sueñucca, llaqui tucushca cachun!” nicpica, tucui gentecunami: “¡Chashna cachun!” ninga.

23Cutin: “¡Suegrahuan sueñucca, llaqui tucushca cachun!” nicpica, tucui gentecunami: “¡Chashna cachun!” ninga.

24Cutin: “¡Maijanta pacalla japishpa huañuchicca, llaqui tucushca cachun!” nicpica, tucui gentecunami: “¡Chashna cachun!” ninga.

25Cutin: “¡Mana faltayuc runata huañuchingapac cullquita japicca, llaqui tucushca cachun!” nicpica, tucui gentecunami: “¡Chashna cachun!” ninga.

26Cutin: “¡Cai mandashcapi ima nishcacunata mana cazushpa, mana pactachicca, llaqui tucushca cachun!” nicpica, tucui gentecunami: “¡Chashna cachun!” ninga.