Roma 10 - Vakavakadewa Vou kei na iVola tale eso（FNVDC12）

1Kemuni na veiwekani, au sa gadreva mai na vu ni yaloqu taucoko ka masulaka vua na Kalou me ra vakabulai kece na kai noqu.

2Au sa rawa ni vakadinadinataka ni ra sa dau gumatua dina sara ena nodra qarava na Kalou, ia sa sega ga ni yavutaki ena rarama dina na nodra veiqaravi vakayalo.

3Era se sega ni kila na sala e vakadonui ira kina na tamata na Kalou, ia era sa dau qara ga na nodra sala vakai ira; ka ra sa mani sega kina ni vakamuria na sala sa dau veivakadonui kina na Kalou.

4Ni sai cavacava ni Lawa na Karisito, me yaco rawa kina vei ira kecega sa vakabauta me ra vakadonui mai vua na Kalou.

Sa Baleti Keda Kece na Veivakabulai

5Sa i koya oqo na ka sa vola o Mosese me baleta na nona veivakadonui na Kalou ena noda muria na Lawa: “Na tamata e vakayacora na ka sa vakarota na Lawa ena bula kina.”

14Ia ena rawa beka vakacava me ra masu vua kevaka era sega ni vakabauta? Era na qai vakabauta rawa vakacava kevaka era se bera ni rogoca na i tukutuku? Era na rogoca rawa li vakacava kevaka e sega ni dua me la'ki vunautaka vei ira na i tukutuku?

15Ena la'ki vunautaki rawa vakaevei na i tukutuku kevaka era sa sega ni talaki o ira na i talai? Me vaka sa volai, “Sa ka lagilagi dina na nodra yaco mai na i talai ni ra kauta voli mai na i Tukutuku Vinaka!”

19Au sa qai taroga tale: Era a sega beka ni kila o ira na Isireli? A sa sauma taumada o Mosese vakaoqo ne,

“Au na vakavuna mo ni vuvutaka ira era sa sega ni dua na matanitu;

Ka'u na vakacudrui kemuni mai vua na dua na matanitu lialia.”

20Ia o Aisea sa doudou cake sara e nona kaya,

“Era sa kunei au o ira era a sega ni vakasaqarai au;

Ka'u sa rairai vei ira era a sega ni vakatarogi au.”

21Ia me baleti Isireli, a sa kaya, “Au sa dodoka tu na ligaqu ruarua ena siga taucoko me'u kidavaka e dua na kawa tamata talaidredre ka dau vakayaco lomadra.”