1 Makabe 6 - Vakavakadewa Vou kei na iVola tale eso（FNVDC12）

Na bale i Adioko na ikaVa

1A lakova tiko o Tui Adioko na veiyasana e na vualiku, qai rogoca ni o Elimaisi e Peresia e koro rogo e na levu ni siliva kei na koula.

2E vutuniyau tu na kena valenisoro e na isasabai koula, itaube civa kei na iyaragi se biuta tu kina o Alekisada, na luve i Filipe, na Tui Masetonia, na isevu ni nodra tui na kai Kirisi.

3A mai via kabakoro me nona na kena iyau, dreve nira sa mai kila na lewenikoro na nona inaki

4ra qai vorati koya e na ivalu. A mani dro e na rarawa levu me lesu i Papiloni.

5Sa tiko mai Peresia, qai lai tukuna vua e dua nira sa vakadrukai vakaloloma na mataivalu era a lako i na vanua o Juta;

6ni a liutaka o Lisiasi e dua na mataivalu levu ia era loki buidra vei ira na Jiu; nira sa kaukaua sara na Jiu e na levu ni iyaragi, kakana kei na itokinivalu era sa rawata vei ira na mataivalu era sa lai druka vei ira; nira sa basuraka na ka vakasisila a vakaduria e na yaletare e Jerusalemi;

71M 1.54nira sa viri bai cecere ni valenisoro me vaka e liu, vakina e Becisuri, nona koro.

8Ni sa rogoca na tui na itukutuku qo, sa kidroa qai veilecayaki vakalevu. E lai davotaka sara ga na nona rarawa, ni a sega ni yaco na nona inaki.

9A siga vica vata nona davo tu, ni sa bikai koya tu ga na rarawa vakaitamera, mani nanuma ni sa vakarau mate.

10A mani kacivi ira kece nona itokani, kaya vei ira, “Sa sega niu moce rawa, au sa lomaocaoca sara ga. Au kaya lo, ‘Sa duatani na noqu lomaleqa! Au sa kuitaki e na dobui levu!

11Au se veiliutaki tiko, au dau loloma, au dau lomani.

12Ia qo au sa nanuma na veika ca au vakayacora mai Jerusalemi. Au kovea kece na bilo siliva kei na koula; au talatala mera vakawabokotaki wale na kai Juta.

13Au kila ni sa sauti yau; au sa voleka ni mate e na rarawa bibi e vanua tani.”

14Sa qai kacivi Filipe, e dua nona itokani, a lesi koya me iliuliu ni nona matanitu kece.

15A solia vua na isala vakatui, na isulurabe kei na mama me na tubera na luvena, nona yaca, me tui.

16Sa mani mate e kea o Adioko na tui e na ika149 ni yabaki (163 BSK).

17Ni sa rogoca o Lisiasi ni sa mate na tui, sa vakatikori Adioko na luve ni tui me veiliutaki. Se susugi koya o Lisiasi ni se gone, vakatokai koya me o Iupatore.

Nodrau ivalu o Adioko na ikaLima kei Lisiasi

18Ia o ira na tawana tiko na koronivalu, era sa lati ira na kai Isireli e yasa ni valenisoro. Era saga tiko e na kena iwalewale kece mera vakaleqai ira na kai Isireli, ra tokoni ira na kaitani.

19Sa mani lewa o Jutasa me vakawabokotaki ira, qai soqoni ira kece na tamata mera kovuti ira.

20Era soqoni vata, qai kovuta na koronivalu e na ika150 ni yabaki. A tara vale ni kabakoro kei na misini tale e so ni ivalu.

21Ia era drusa e so vei ira na kovuti tu, e so na kai Isireli tawalotu ra qai tovata kei ira.

22Era lako vua na tui, ra kaya, “E naica oni na qai vakatulewa vakadodonu kina moni sauma kina nodra dra na weka i keimami?

23Keimami dau makutu na qaravi tamamuni, na muria nona vosa, vakayacora nona lewa.

24Na ka qo na luve i keimami era sa kovuta kina na koronivalu, era sa keimami meca tale. Nira sa vesuka e dua vei keimami, era sa vakamatea, ra sa kovea na neimami iyau.

25E sega ni o keimami ga era valuta, o ira kece na vanua era veitikivi.

26Nikua era sa kovuta na koronivalu kei Jerusalemi mera vakavua; era sa viribaita ruarua valenisoro kei Becisuri.

27Keoni sega ni tarovi ira vakatotolo, e na tubu ga nodra vakacaca, era na sega ni lewai rawa.”

28Sa katakata na tui ni sa rogoca qo. Sa soqoni ira kece na nona itokani, nona turaganivalu kei ira na veiliutaki.

29Era lako mai vua na mataivalu saumi mai na veimatanitu kei na veiyanuyanu.

30Na iwiliwili ni nona mataivalu e dua na drau na udolu na mataivalu taubale, ruasagavulu na udolu na mataivalu vodo ose kei na tolusagavulukarua na elefadi ni ivalu.

31Era muri mai vaka e Itumea, ra kovuti Becisuri, vica vata na siga nodra vala tiko, ra tara misini ni ivalu, ia era ravuravu lesu vakailala e so na Jiu, ra vakama na misini, ra vala e na yaloqaqa.

32Sa qai cavutu mai na koronivalu o Jutasa, mai vakeba e Becisakaraia, donuya na keba ni tui.

33E yadra vakamataka na tui, liutaki ira nona mataivalu mera tabalaka na maji e na sala i Becisakaraia, era qai uvu biukila mera vakarau vala.

34Era vakaraitaka vei ira na elefadi na wai ni vaini kei na malaveri mera makutu na vala.

35Era veivotayaka na manumanu vei ira na mataivalu, e dua na elefadi e dua na udolu na sotia vakaisulu kaukamea tali kei na isala varasa; na elefadi yadua e yalima na drau na sotia vodo ose digitaki.

36Era tomana voli na elefadi; na vanua ga e gole kina, era gole tale ga kina, era sega vakadua ni biuta.

37E vakadre e dakudra na elefadi na valekau rewa vakadelana eratou vala mai kina e lewe va na sotia, tiko tale ga kina na kena draiva kaidia.

38Era tuva na vo ni mataivalu vodo ose e na yasa ruarua ni mataivalu mera veitaqomaki, ra vakasosataki ira tiko na meca.

39Ni sa cilava na siga na isasabai koula kei na varasa, e tatatibitibi na veidelana, e caudre me vaka na vuru.

40E dua na iwase ni mataivalu ni tui era muria na veidelana cecere, e so era muri buca; era tosotoso vata vakamalua.

41O ira kece na rogoca na vadugu ni ilala vakaitamera qo — nodra maji na lewe oba kei na tatamelamela ni nodra iyaragi — era sautaninini e na kena levu kei na kena kaukaua.

42Ia na mataivalu i Jutasa, era toso ga yani, era mani bale e ono na drau na sotia ni tui.

43A qai raica o Iliesa, vakatokai me o Avarani, ni dua na elefadi e vakaisulu ni ivalu ni tui, qai ka balavu duadua, mani nanuma ni vodo kina na tui,

44qai cabo bula me vakabulai ira na kainona, me rogo tawamudu kina na yacana.

45A cicibotea vakadoudou yani na mataivalu ni ravuravu tiko mawi matau, era tawase ga e matana.

46A dara yani e ruku ni elefadi, suaka cake na ketena me mate; qai bikai koya tale, mani mate sara.

47Nira sa raica na Jiu na qaqa ni tui kei na raravisa ni nodra vala na sotia, era vakanadaku mera dro.

48Na mataivalu ni tui era sa muri ira cake i Jerusalemi era qai keba mai Jutia kei na Dela i Saioni.

49Era veisaututaki kei na kai Becisuri, ra qai vagalala mai na koro na kai Becisuri, ni sa sega na kedra mera bula kina ni kovuti na koro, ni qo na ikavitu ni yabaki era dau cegu kina na teitei.

50Sa qai tauri Becisuri na tui, lesia e dua na kena matayadra.

51Sa qai siga vica vata nodra kovuta na valenisoro. A vakaduri vatavata ni ivalu, na irabo kei na misini ni ivalu me vanataki kina na bukawaqa, na vatu, kei na gasau.

52Era tara misini ni ivalu tale ga na Jiu me veiveisa, qai siga vica vata nodra vala.

53Ia sa lala na lololo, ni qo na ikavitu ni yabaki; o ira na drovaki ira mai na kaitani ra mai vakaruru e Jutia, era sa vakaotia na lewe ni lololo.

54E lewe lailai sara era sa vo e na valenisoro, ni sa rawai ira na viakana, era sa dui suka i na koro.

55Sa rogoca o Lisiasi ni o Filipe, koya a lesia o Adioko na tui ni se bula me tuberi Adioko na luvena me tui,

56sa lesu mai Peresia kei Mitia vata kei ira na mataivalu era a tomana na tui, me sa mai suguta na matanitu.

57Sa mani lewa sara o Lisiasi mera sa cavutu, sa tukuna vua na tui kei iratou na vunivalu kei ira na sotia, “Eda sa malumalumu mai e veisiga, sa lailai sara na keda, e kaukaua na vanua eda valuta tiko, sa veileqayaki na noda matanitu.

58Meda dodo liga ni veiyaloni vei ira qo, meda veisorosorovi kei ira kei na nodra lewenivanua kece;

59meda vakadonuya mera muria ga nodra lawa me vaka e liu, ni noda a bokoca ga nodra lawa era sa cudru kina, ra sa cakava na ka kece qo.”

60Eratou marautaka na vosa qo na tui kei iratou na vunivalu, qai tala mata na tui vei ira na Jiu mera veisorosorovi, ra mani ciqoma.

61Saratou mani bubului vei ira, na tui kei iratou na vunivalu. Na veidinadinati qo era qai biuta kina na koronivalu na Jiu.

62Ia ni sa curumi Dela i Saioni na tui qai raica ni viribaiti vinaka tu, sa lasu tale, sa lewa me talaraki vakadua na bai.

63Sa qai vakusakusa me lesu tale i Adioki. Nona kila ni sa lewa tu na koro o Filipe, rau sa mani veivala, qai nona na koro.