2 Veigauna 25 - Vakavakadewa Vou kei na iVola tale eso（FNVDC12）

O Amasaia na Tui Juta(2Tui 14.2-6)

1A sa 25 na yabaki ni bula i Amasaia ni a buli me tui, ka veiliutaki mai Jerusalemi me 29 na yabaki. Ia na yaca i tinana o Jioatani mai Jerusalemi.

2A cakava na ka dodonu o koya ena mata i Jiova, ia a sega ga ni vinaka taucoko na yalona.

3Ia ni tudei ki ligana na kaukauwa vakatui, a qai vakamatei rau na tamata ka rau a labati tamana o Joasa na tui.

4Vrua 24.16Ia a sega ni vakamatei iratou na luvedrau, me vaka ga na ka a volai ena i vunau i Mosese, ena tikina a vakarota kina o Jiova ka kaya, Era na sega ni vakamatei na tama ena vukudra na luvedra, se me ra vakamatei na gone ena vukudra na tamadra; ia ena mate ga na tamata yadua ena vuku ni nona i valavala ca.

Na Valuti nei Itomi(2Tui 14.7)

5A vakasoqoni ira vata na Juta o Amasaia ka lesi ira ena nodra i wasewase vakayavusa me ra komada ni yayaudolu kei na yayadrau me baleti Juta kei Penijamini taucoko. A wiliki ira o koya era yabaki ruasagavulu na nodra bula ka lako cake, ka kunea ni ra sa lewe 300,000 na tamata vinaka ni valu, ka ra sa kila na tauri moto kei na i sasabai.

6A sa la'ki saumi ira talega mai e lewe 100,000 na bati qaqa ni Isireli ka rauta ni 3,4000 na kilokaramu na siliva na kedra i sau.

7Ia a sa lako mai e dua na tamata ni Kalou, ka kaya, Kemuni na tui, me ra kakua ni lako vata kei kemuni na nodra mataivalu na Isireli, ni sa sega ni tiko kei ira kece na Ifereimi oqo o Jiova.

8Ia kevaka o ni nanuma ni o ni na kaukauwa vakaivalu ena sala oqo, ena vakabalei kemuni na Kalou e matadra na meca, ni sa tiko ga vua na Kalou na kaukauwa me veivuke, se me veivakabalei talega.

9A sa kaya o Amasaia vua na tamata ni Kalou, Ia, ena qai vakaevei na siliva ka'u sa solia oti ki na nodra mataivalu na Isireli?

A qai sauma na tamata ni Kalou ka kaya, Sa rawa vei Jiova me sauma lesu vakalevu cake sara vei kemuni.

10A sa qai vakasukai ira lesu na mataivalu mai vei ira na Ifereimi o Amasaia, me ra lesu ki na nodra veivale. Ia era a cudruvi ira vakalevu sara kina na Juta, ka ra lesu yani ki na nodra veivale ena cudru waqawaqa.

11A sa vakaukauwataki koya me yalo doudou o Amasaia, ka liutaki ira yani na nona tamata; a sa lako yani ki na Buca ni Masima ka ravuti ira ka vakamatea e lewe 10,000 na sotia ni Itomi.

12Era a qai vesuki ira bulabula talega e lewe 10,000 na tamata, ka ra kauti ira cake ki na dela ni uluvatu ena koro o Sela ka qai viritaki ira sobu mai kina, me ra raramusumusu ka mate ena veivatuvatu e ra.

13Ia o ira na lewe ni mataivalu ni Ifereimi ka vakasukai ira o Amasaia me ra kakua ni lako vata ki na i valu, era a qai ravuravu ena nodra veikoro na Juta, me vakatekivu mai Samaria me yaco ki Peci Oroni; era a vakamatea e lewe 3,000 na tamata ka kauta e levu sara na i toki.

14Ia ni lesu mai o Amasaia mai na nona ravuti ira na kai Itomi, a kauti ira talega mai eso na nodra kalou na kai Sia, vakaduri ira cake me nodra kalou, qaravi ira, ka cabora na i soro eso vei ira.

15Ia ni vaka tu oqo, a cudruvi Amasaia o Jiova, tala vua e dua na parofita, ka kaya vua, A cava li o ni la'ki goleva kina na nodra kalou na tamata ka sega ni rawa me vakabulai ira na nodra tamata mai na ligamuni?

16Ia ni vosa tiko o koya, a qai sauma na tui ka kaya, E a keitou lesi iko beka li mo dua vei ira na lewe ni matabose vakatui? Tikolo mada! A cava na vuna me keitou vakamatei iko kina?

E a qai tiko lo na parofita, ia ni bera ni tiko lo sa kaya taumada, Ia oqo au sa qai kila ni sa loma ni Kalou me vakarusai kemuni, baleta ni o ni sa kitaka na ka oqo, ka sega ni vakarorogo ki na noqu i vakasala.

Vakadrukai Juta o Isireli(2Tui 14.8-20)

17A sa bucina e dua na i naki vere me baleti Isireli o Amasaia na tui Juta kei ira na nona daunivakasala. Sa qai vakauta na nona i tukutuku vei Joasa na tui Isireli, na luve i Jioasi ka makubui Jeu, ni sa bolei koya me rau vala.

18E a vakau i tukutuku lesu mai o Joasa na tui Isireli vei Amasaia na tui Juta, ka kaya, Ena dua na gauna, a vakau i tukutuku e dua na kau vakavotona ni Lepanoni ki na dua na kau sitari ni Lepanoni, ka kaya, Mo solia mada mai na luvemu yalewa me vakawati kei na luvequ tagane. Ia sa lako mai e dua na manumanu kila ni Lepanoni ka buturaka sobu na kau vakavotona.

19O iko Amasaia o sa dokadokataka na nomu sa ravuti ira oti na kai Itomi, ia au sa vakasalataki iko mo tiko ga e vale. A cava li o via vakavu ca kina, ni na kauta ga mai na leqa vei iko kei ira na Juta?

20Ia sa bese ni vakarorogo o Amasaia. A sa lewa ni Kalou me na vakadrukai o Amasaia, baleta ni a goleva na kalou ni Itomi.

21A sa lako cake o Joasa na tui Isireli ka valuti Amasaia na tui Juta. E rau a veiqedravu mai Peci Semesi ena vanua o Juta.

22A vakamalumalumutaki ira na Juta o ira na Isireli, ka ra dui veiseyaki na tamata yadua ki na nona vale.

23A vesuki Amasaia na tui Juta o Joasa na tui Isireli, ka kauti koya ki Jerusalemi. Mai kea, a sa basuraka sobu kina na bai kei Jerusalemi me vakatekivu mai na Matamata kei Ifereimi ki na Matamata ki Tutuna, ka voleka ni 200 na mita na kena balavu.

24A taura o Joasa, na tui Isireli, na koula kei na siliva kecega, kei na i yaya a kunea ena Vale ni Kalou, a taura talega o koya na i yau ena valenitui, vesuki Opeti Itomi kei ira na tamata, ka lesu yani ki Samaria.

25A bula tiko me yabaki tini kalima tale o Amasaia na luve i Joasa na tui Juta, ni oti na nona mate o Joasa, na luve i Jioasi na tui Isireli.

26Ia na vo ni cakacaka i Amasaia, mai na kena i vakatekivu, ki na kena i otioti, era sega li ni volai ena Kedra i Vola na Tui Juta kei Isireli?

27Me vakatekivu mai na gauna a gole tani kina mai vei Jiova, era a buki kena vere mai Jerusalemi, ka dro o koya ki Lakisi. Ia era a qai muri koya ki Lakisi, ka vakamatei koya mai kea.

28Era a vakavodoki koya mai ena ose; ka la'ki bulu vata kei ira na nona qase ena koro i Tevita.