2 Makabe 1 - Vakavakadewa Vou kei na iVola tale eso（FNVDC12）

iVola vei ira na Jiu e Ijipita

1“O keimami na Jiu veiwekani e Jerusalemi kei na vanua o Jutia, vei kemuni na weka i keimami mai Ijipita: Ni bula vinaka, me nomuni na vakacegu.

2“Me lomani kemuni na Kalou, me nanuma nona veiyalayalati kei iratou nona dauveiqaravi yalodina o Eparahama, Aisake kei Jekope.

3Me solia vei kemuni kece na yalo moni cuva vua, moni vakayacora na lomana e na yalodei kei na yalorawarawa.

4Me dolava na yalomuni moni kila nona lawa kei na nona ivakaro, me nomuni kina na vakacegu.

5Me rogoca nomuni masu, me vosoti kemuni, me kua ni biuti kemuni e na gauna ni ca.

6Keimami sa veimasulaki tiko yani e ke.

7“E na dela ni veiliutaki nei Demitirio e na ika169 ni yabaki, keimami a volavola yani kina na Jiu vei kemuni e na vuku ni leqa levu a yacovi keimami e na gauna ya e na nona vuki o Jesoni kei na nona ilala mera valuta na vanua tabu kei na matanitu,

8era a vakama kina na matamata, vakamatei ira na tabu cala. Keimami a masuta na Turaga, qai rogoci. Keimami a vakacabo isoro kei na vuaniqele, keimami a vakawaqa cina ni valenisoro, tuva madrai.

9Ni qarauna qo moni solevutaka na vale vakacevaceva e na vula o Jisilevi e na ika188 ni yabaki.”

IVOLA VEI ARISITOVULO Mate o Adioko na Tui

10“O keimami na Jiu e Jerusalemi kei Jutia, na seneti, o Jutasa, vei Arisitovulo, na lewe ni vuvale vakabete lumuti, qasenivuli nei Tolemi na tui, kei kemuni na Jiu e Ijipita: Ni bula, nuitaki nioni bula vinaka tiko.

11Ni sa vakabulai keimami na Kalou mai na leqa bibi, keimami vakamuduo vua e na nona tokoni keimami e na neimami saqata na tui,

12ni Kalou a vakasavi ira na valuta na koro tabu.

131M 6.1-4; 2M 9.1-10E na nona yaco nodra iliuliu e Peresia vata kei na mataivalu e rai sega ni vorati rawa, era a tatalaki e na valenisoro nei Nanea e na nodra ilawaki na kena bete.

14A nona iulubale o Adioko ni via vakamautaki Nanea, mani curuma na vanua ya kei ira na nona itokani e so me mai taura kece na kena iyau me ikaukau nei yalewa.

15Nira sa tuva oti na bete ni valenisoro nei Nanea na iyau, qai curuma o Adioko kei iratou e vica nona tamata na valetabu, era sa sogosogo sara na bete.

16Era dolava na katuba vuni e na siligi, ra qai virilaki iratou, ra vakamatei iratou kece; era tatalaki iratou, musuka laivi na uludratou, viritaka vei ira na tamata i tuba.

17Me vakalagilagi na noda Kalou e na sala kece, ni sa lewai ira na tamata itovo ca.

Kama yavu na isoro i Niemaia

18Keimami na solevutaka e na ikaruasagavulukalima ni Jisilevi na vakasavasavataki ni valenisoro, keimami mani nanuma kina me keimami vakaraitaka yani moni solevutaka tale ga kina na vale vakacevaceva kei na buka a soli ni a vakacabo isoro tiko o Niemaia, koya a tara na valenisoro kei na yaletare.

19E na gauna era kau vakavesu tiko kina na noda qase i Peresia, eratou a vunitaka na buka e na dua na taqe maca na bete yalododonu e so e na gauna ya, eratou qarauna me kua ni kilai na kena ivunivuni.

20Ia ni sa oti e vica vata na yabaki, ni sa lomana na Kalou, o Niemaia sa talai ira na kawa ni bete era a vunitaka na buka mera lai kauta mai, e na lewa ni tui Peresia. Nira sa mai tukuna tale vei keimami nira sega ni kunea na buka, e dua ga na mataqali wai sosoko, a vakaroti ira mera takiva mai.

21Ni sa tuvai oti tu na isoro, sa vakaroti ira na bete o Niemaia mera kureitaka na wai e dela ni buka kei na ka e taqa kina.

22Sa mani vakayacori; dede vakalailai, ni sa veisau na rugurugua me cila ni siga, sa caudre levu na buka, era qai qoroqoro kece.

23Ni sa kama tiko na isoro, era vakacabo masu na bete kei ira na tamata kece. A liutaka o Jonacani, era camana na kena vo, wili kina o Niemaia.

Masu i Niemaia

24E vaqo na masu: “I kemuni saka na Turaga na Kalou, na Dauveibuli, na dauveivakurabuitaki, qaqa, yalododonu, dauloloma, o kemuni duadua oni Tui oni yalololoma,

25o kemuni duadua oni vu ni sautu, o kemuni duadua ni lewa dodonu, oni Kalou sau tawamudu, oni vakabulai Isireli mai na ca kece, oni a digitaki ira neimami qase, oni vakatabui ira.

26Ni ciqoma na isoro qo e na vukudra na nomuni tamata na Isireli, ni taqomaka na nomuni ivotavota, ni vakatabuya.

27Ni vakasoqoni keimami na veituyaki tu, ni sereki ira na bobula tu vei ira na kaitani, ni lomani ira na cati kei na beci tu, mera kila kina na kaitani ni o kemuni na neimami Kalou.

28Ni kuitataki ira na veibikai kei na qaciqacia.

29Ni vakatikori keimami na nomuni tamata e na nomuni vanua tabu, me vaka a kaya o Mosese.”

Rogoca o Tui Peresia na itukutuku ni buka

30Era sa qai laga serenilotu na bete.

31Ni sa kama yavu na isoro, sa vakarota o Niemaia me sova e dela ni vatu lelevu na vo ni wai.

32Ni sa caka qo, a caudre sara; ia ni sa caudre tale na cina mai na yaletare, sa boko.

33Ni sa kilai na ka qo, sa tukuni vei Tui Peresia ni vanua era a vunitaka kina na buka na bete vakatalai, sa kune kina na wai, era qai vakama kina o Niemaia kei nona itokani na isoro;

34sa vaqaqa na tui, qai viribaita na vanua ya me vakatabui.

35Era veisautaka e levu na iloloma uasivi na tui kei ira nona itokani taleitaki.

36Era vakatoka na wai qo o Niemaia kei ira nona itokani me ‘nefatara’, kena ibalebale na veivakasavasavataki, ia e levu era cavuta me ‘nefata’.