1Sa yali yani na tatalivaliva ni koula,
Ka sa veisau na i rairai ni koula dina!
Na veivatu tabu era sa veituyaki
Ena veitolo ni salatu kecega.
2O ira na luve i Saioni vakamareqeti,
Era sai yau levu vei keda me vaka na koula,
Ia oqo era sa vaka wale na kuro qele,
Na cakacaka ni liga i koya na dautuli kuro!
3O koya na tina ni olifa ena soli wainisucu,
Me susugi cake kina o ira na luvena,
Ia o ira na noqu tamata sa vaka na ositeriji,
Era sai tovo kaukauwa vei ira na luvedra.
4Era sa laivi ira ga na luvedra
Me ra ciba ena viakana ka karamaca;
Era sa kere kakana na luvedra,
Ka sega ni dua e vakacegui ira kina.
5O ira sa daukania na kakana digitaki,
Era sa kolaiciba ena viakana e gaunisala;
O ira sa susugi mai na veika sau lelevu,
Era sa davo no ena dravusa sa bini tu.
6Ni sa levu cake na kuita sa tau
Vei ira na noqu tamata ka lailai sobu
Na i totogi sa soli vei Sotoma;
A sa vakarusai ga ena dua na gauna
Mai na liga ni Kalou duadua ga.
7Na neimami ravouvou
Era sa savasava sara
Me vaka na uca vulavula se na sucu;
Era sa levulevu vinaka ka kaukauwa,
Ka bulabula na yagodra taucoko.
8Ia oqo sa loaloa na kedra i rairai
Me vaka na qilaiso;
Era sa sega ni kilai e gaunisala.
Sa kabi na kulidra ena nodra sui,
Ka sa mamaca me vaka na kau madu.
9Sa vinaka cake o ira sa mate ena i valu
Mai vei ira era sa qai mate emuri,
O ira sa mate vakamalua ena viakana,
Ka sa sega na kakana me ra bula kina.
10Na ligadra dauloloma na marama,
Sa vakasaqara tale na luvedra dina;
Era sa yaco kina me kedra kakana,
Ena rusa sa yacovi ira na noqu tamata.
11A sa solia kece o Jiova na nona cudru;
Sa sovaraka na nona cudru katakata,
A sa vakatubura e dua na kama e Saioni,
Ka sa vakamai kina na kena yavu.
12Era sega ni vakabauta na tui kei vuravura,
Sa sega talega ni dua na kai vuravura,
Me na rawa ni curu mai na meca
Ki na matamata ni koro o Jerusalemi.
13Sa yaco ga ena vuku ni i valavala ca
Mai vei ira na nona parofita kei na bete,
O ira sa vakadavea na nodra dra na yalododonu
Ena loma ni vanua.
14Sa vakayayamo me vaka na mataboko
O ira na nona dauveiliutaki ena veisalatu.
Era sa vakadukadukalitaki ena dra,
Ka sa sega ni rawa vua e dua
Me tara na nodra i sulu.
15Era sa kailavaka, “Ni lako tani! Dukadukali!”
Ni toso laivi! Kakua ni tara!
Era sa dauyasa voli kina ka veitokiyaki;
Sa dautukuni kina vei ira na veimatanitu,
“Era na sega ni tiko tale vakadua eke.”
16O Jiova ga e sa vakavuna me ra talabusese,
Ena sega ni kauwaitaki ira tale o koya;
A sa sega ni dokai na bete,
Ka sega ni lomani ira na qase.
17Ni sa sega ni yaco mai na veivuke,
Ka sa oca na mata i keimami ena vakararai.
Keimami a vakararai matua
Ki na matanitu sa rawa ni ia na veivueti.
18Era sa muri we ni yavada na meca
Me da kakua ni lakova kina na noda salatu;
Sa voleka na noda i tinitini; sa wiliki na noda siga;
Ni sa yaco oti mai na noda i vakataotioti.
19O ira na vakacemuri keda tiko sa totolo sara
Ka berabera na ikeli ni lomalagi;
Era cici muri keda ena veiulunivanua
Era sa waraki keda toka mai ena vanua lala.
20Era sa vesuka na i vurevure ni noda bula,
O koya na tui ka sa digitaka o Jiova,
O koya eda sa nuitaka
Me maroroi keda mai vei ira na meca.
21Mo ni reki ga ka marau na kai Itomi,
Oi kemuni sa bula tiko ena vanua o Usu.
Ena lako talega mai na nomuni ka ni rusa;
O ni na lako luvawale kina ena madua.
22Sa oti na cudruvi i Saioni ena vuku ni caka ca;
Ena sega ni veivakabobulataki vakadua o Jiova.
Ia o iko Itomi, ena cudruvi iko o Jiova;
Ena vakavotuya o koya na nomu i valavala ca.
Who We AreWhat We EelieveWhat We Do
2025 by iamachristian.org,Inc All rights reserved.
