Siraki 32 - Vakavakadewa Vou kei na iVola tale eso（FNVDC12）

1Kevaka o digitaki mo iliuliu ni soqo, kua ni vakacerecerei iko; mo maliwai ira na vulagi, qaravi ira vinaka mada qai dabe.

2Nio sa vakayacora na nomu itavi, mai dabe mo marau vata kei ira, era na qai rokovi iko e na nomu veiliutaki uasivi.

3Vosa keo qase; e nomu dodonu, ia mo kila na ka o tukuna, kua tale ga ni tarova koso na ivakatagi.

4Kua ni vosa ni caka tiko na veivakamarautaki; e gauna cala mo vakaraitaka nomu vuku.

5Na ivakatagi e na soqo ni gunu waini e vaka na rupi kabi e na koula.

6Na ivakatagi memela kei na waini vinaka e vaka na emeralita kabi e na koula.

7Vosa keo gone kevaka e gadrevi, ia me kua ni sivia e vakarua, e na gauna wale tale ga o tarogi kina.

8Vosa vakalekaleka, tukuna e levu na ka e na vica ga na vosa; me macala nio kila, mo kubu gusu ga.

9Nio tiko vata kei ira na vakaitutu lelevu, kua ni vakaraitaka nio dua vei ira; kua ni vakaogai ira e na nomu taro vakaveitalia.

10E lidi na yaseyase qai cabolo na kurukuru; e liu vaka kina na nona ciqomi na tamata e yalomalua.

11Mo biuta totolo na soqo, kua ni qai muri duadua. Kua ni wawa e katuba, lako sara i vale.

12Lai marau i kea, lewa na ka mo cakava, kua ga ni valavalaca e na vosa viavialevu.

13E na veika kece qo, vakavinavinaka vei koya a buli iko qai vakacegui iko e na nona isolisoli vinaka.

Vakadewataki ni lawa

14O koya e lomana na Turaga, e na ciqoma nona veivakadodonutaki; o ira era yadra vakamataka mera qarai koya, era na kalougata.

15O koya e qara na lawa, e na vakasinaiti kina, ia na dautukutukuni koya e na tarabe kina.

16O ira era doka na Turaga, e na dau dina nodra lewa; me vaka na rarama, era na vakawaqara na ivalavala dodonu.

17Na tamata valavalaca, e na cata na vosataki, e na muria ga na lewa e taleitaka.

18Na tamata lewa dodonu, e na sega ni vakanadakuya e dua na vakasama; na tamata tabulotu dokadoka, e na rokova ga na nona rai.

19Kua ni cakava e dua na ka nio se sega ni vakasamataka vinaka; nio sa cakava, kua ni leqataka.

20Kua ni muria na sala e levu kina na leqa, kua ni tatacaqe e na vanua veivatu.

21Kua ni yalodei vakasivia e na gaunisala vinaka,

22qarauna vinaka na sala o muria.

23Qarauni iko e na veika taucoko o cakava, ni qo na ka e gadrevi e na ivunau.

24O koya e vakabauta na lawa, e muria na ivunau; o koya e nuidei vua na Turaga, e na sega ni leqa.