Udite 14 - Vakavakadewa Vou kei na iVola tale eso（FNVDC12）

Na inaki nei Udite

1Sa qai kaya vei ira o Udite, “Ni rogoci yau na wekaqu, ni taura na ulu qo, ni liliga e na bainivalu.

2Ni kida ga na mataka, sa cabe na siga, mera ucu iyaragi nomuni qaqa, ra curu i tuba, me lesi e dua me liutaki ira, me vaka era na sirova na buca mera lai veivala kei ira na yadra ni Asiria; mera kua ga ni siro.

3O ira na yadra ni Asiria, era na ucu iyaragi, ra na cici i na keba mera lai vakayadrati ira na turaganivalu; era na qai curu botolaki i na valelaca nei Oloferenesi, sana yali kina. Na levu ni nodra domobula, era na drovaki kemuni kina;

4o kemuni kei ira kece na lewe i Isireli, oni na qai cemuri ira, oni na ravuravuti ira nira dro tiko.

5Ia ni bera kece qori, moni kaciva mai vei yau na kai Amoni o Akiori me vakadinadinataka e matana na tamata a beca na kawa i Isireli, koya a talai Akiori mai me mate vata kei keda.”

Na tavuki i Akiori

6Sa mani kacivi o Akiori mai na vale i Usia. Ni sa mai raica na ulu i Oloferenesi ni dua e taura tiko e na vanua era soqo tiko kina, sa qavaraki koya, yali sara na yalona.

7Nira sa vakaduri koya, sa tekiduru e yava i Udite, a kaya, “Mo vakalagilagi e na valelaca kece e Juta! E na veimatanitu kece, era na kidroa na rogoca na yacamu.

8Tukuna mada mai na ka o sa cakava e na vica na siga qo.”

Sa qai vakamacalataka vua o Udite e matadra na soqo tiko na ka kece a cakava mai na siga a biubiu kina me yacova na gauna e vosa tiko kina qo.

9Ni sa oti, sa tubu na kaikaila kei na marau e loma ni koro.

10Ni sa raica o Akiori na ka kece sa cakava na Kalou ni Isireli, sa vakabauta dei na Kalou, sa cili, curu me lewe i Isireli me yacova nikua.

Era veilecayaki na mataivalu i Oloferenesi

11Ni qai kida ga na mataka, era sa liliga na ulu i Oloferenesi e na bai, ra qai ucu iyaragi na qaqa, era lako vakailala i na itabale.

12Nira sa raica qo na kai Asiria, era sa tukutuku vei ira na nodra satini, sa qai dewa tale vei ira na jenerali, na kavetani kei ira kece na turaganivalu.

13Era mani lako yani i na valelaca nei Oloferenesi, ra kaya vua na etikoqe, “Vakayadrata na turaga, nira sa viavialevu na kaisi, era sa siro mai mera mai bolei keda, mera sa moku vakadua.”

14Sa mani curu yani o Bakoasi, vakacobocobo e mata ni ilati ni valelaca nei Oloferenesi, ni nanuma nirau moce vata tiko kei Udite.

15Ni sega ni dua e rogo, sa dolava, curu sara i na rumu ni moce, mani raica ni sa davo matemate tu i ra na yago i Oloferenesi, sa yali tu na uluna.

16Sa qai tabalaka na qolou, na tagi, na vutugu kei na kaila, qai dresudresulaka nona isulu.

17Sa qai gole i na valelaca a tiko kina o Udite; ni sega ni kunei koya, sa qai cici yani vei ira na tamata, a kailavaka,

18“Era sa lawakitaki keda na kaisi! E duabulu na yalewa ni Iperiu sa vakamaduataka na kawa i Nepukanesa na tui! Ni raica, sa davo tu qo e ra o Oloferenesi, sa yali tu na uluna!”

19Nira sa rogoca qo na iliuliu ni mataivalu ni Asiria, era sa dresudresulaka na nodra isulu e na lolosi levu, sa qai lalata na loma ni keba nodra kaikaila.