1 Samuela 11 - Vakavakadewa Vou kei na iVola tale eso（FNVDC12）

Vakabula o Saula na Koro Levu o Jepesi

1Ni oti e rauta ni dua na vula, a sa liutaka yani na nona mataivalu o tui Neasi na Amonaiti me la'ki valuta na koro o Jepesi ena vanua o Kiliati. Era a qai kaya na kai Jepesi vei Neasi, “Mo cakava mada e dua na noda veiyalayalati, ka keimami na vakaio ki na nomu veiliutaki.”

2A sa kaya vei ira o Neasi na luve i Amoni, “Au na veiyalayalati kei kemuni, ia ena vakatautaki oqo ki na duabulu na ka: o ya me'u leuta tani kece sara na matamuni i matau me kauta mai na madua vei ira kecega na Isireli.”

3Era sa kaya vua o ira na dauniveiliutaki e Jepesi, “Mo solia mada vei keimami e vitu na siga me keimami tala eso me ra vakau i tukutuku ki na vanua o Isireli. Ia kevaka sa sega ni dua me mai vakabulai keimami, keimami na qai soli keimami yani vei iko.”

4Era sa yaco yani na talai ki na i tikotiko i Saula mai Qibea, ka ra vakadewataka na i tukutuku, ka ra a tabalaka cake na domodra ena tagi na tamata kecega.

5A lesu tiko mai o Saula mai na i teitei kei na nona bulumakau, ka taroga sara, “A cava e manati ira na tamata ka ra tagi tiko kina?” Era a qai tukuna vua na i tukutuku mai vei ira na kai Jepesi.

6Ni sa rogoca oqo o Saula, a sa curumi koya na Yalo ni Kalou, ka sa waqa vakalevu na nona cudru.

7A qai taura e rua na bulumakau ka musumusuka vakalailai, ka solia ena ligadra na tamata talai eso me ra vakauta ki na veiyasana kecega e Isireli, ka kaya, “O ira yadua sa sega ni lako mai me muri Saula kei Samuela ena vakayacori vakakina na ka oqo ki na nodra bulumakau!”

A sa bikai ira na tamata na rere ena vuku ni ka ena cakava o Jiova, ka ra sa duavata kece ni ra sa lako kece mai.

8A vakasoqoni ira vata o Saula mai Peseki: era a lewe 300,000 na Isireli, ka ra lewe 30,000 na Juta.

9Era a qai kaya vei ira na tamata era a talai mai Jepesi, “Ni la'ki tukuna vakaoqo vei ira na nomuni tamata ni ra na vakabulai ni bera na sigalevu ni mataka.” Ena gauna era rogoca kina na i tukutuku oqo na kai Jepesi, sa tuburi ira na marau levu

10ka ra kaya vei Neasi, “Keimami sa na soli keimami yani vei iko ni mataka, ka mo qai lewa ga na ka o via cakava vei keimami.”

11Ena bogi o ya, a wasei ira na nona tamata o Saula me tolu na i wasewase vakaivalu, ka ra lako vakamataka lailai sara ki na nodra keba na meca ka valuti ira na Amonaiti. Era a vakadrukai na meca ena sigalevu tutu, ka ra sa dro ena vaqaqara bula o ira na vo-ni-bula.

12Era sa qai kaya vei Samuela na Isireli, “Evei sara mada o ira na tamata era tukuna voli me kakua ni noda tui o Saula? Mo soli ira mai na tamata oqori me keimami vakamatei ira!”

13Ia a sa kaya o Saula, “Ena sega ni dua ena vakamatei ena siga oqo, ka ni oqo na siga sa vakabulai Isireli kina o Jiova.”

14A sa kaya vei ira na tamata o Samuela, “Me da mai lako kece ki Kilikali ka la'ki vakataudeitaka tale ni o Saula sa noda tui.”

15Era a lako na tamata kecekece ki Kilikali, ka ra vakataudeitaka ena tikina tabu mai kea ni sa nodra tui o Saula. Era sa vakacabora na nodra i madrali ni veivinakati, ka solevutaka o Saula kei ira kecega na Isireli na veika sa yaco oqo.