Yalomatua 5 - Vakavakadewa Vou kei na iVola tale eso（FNVDC12）

Na veivutuni ni tamata valavalaca

1Na tamata yalododonu e na qai duri e na yalodei e matadra na dau vakararawataki koya, kei ira na beca nona cakacaka.

2Nira na raici koya, era na sokonu e na domobula, era na kurabuitaka na nona vakabulai sega ni namaki.

3Era na veivosaki e na veivutuni, era na vutugu e na yalorarawa, era na kaya,

4“O koya qo eda dau becabeca tu, eda dau veiwalitaka - sabu na lialia! Eda kaya ni lialia tu qai mate vakasakasaka.

5Na cava sa mai wili kina vei ira na luve ni Kalou? Na cava sa mai maliwai ira kina na yalododonu?

6O keda bagi eda sa sese mai na sala ni dina, e sega ni cilavi keda na rarama ni yalododonu, sega ni cabe vei keda na matanisiga.

7Eda a muria na sala kece ni basulawa kei na vakacaca, eda a lakova na vanua lala sega na kena sala, ia na sala ni Turaga eda sega ni bau kila.

8Na cava na kena yaga vei keda noda viavialevu? Na cava sa betena vei keda na iyau eda dau sakitaka?

9“Na ka kece qori era sa yali yani vaka na yaloyaloda, era sa tasiri vaka na itukutuku vuka;

10vaka na waqa e sokota na biau ni wasawasa, sa yali vakadua, sa sega ni kune na kena o, sega ni kune na kena ua;

11se vaka ni vuka na manumanu e macawa, e sega ni kune na wena; na cagi e samulaki e na yavavala ni tabana, kabote e na igu ni nona cokataki koya, ia ni sa oti, sa sega tale na kena o;

12se vaka e vanataki na gasau i na takete, e wasei oti ga na cagi, sa sema tale, sa yali na kena sala.

13O keda tale ga, nida sucu oti ga, eda sa mate tu, e sega vei keda na vinaka, sa ologi keda ga na noda ca.”

14Na vakanuinui ni tamata ca e vaka na qaniwiti cagina, e vaka na seniua liwavi cagi; e seyavu vaka na kubou e na cagi, e sivi yani vaka na noda vakananuma na vulagi siga dua.

15Ia o ira na yalododonu, era bula tawamudu, na kedra isau e tu vua na Turaga; o koya na Cecere Sara e maroroi ira.

16O koya gona e na solia vei ira na Turaga na isala vakatui lagilagi kei na kena iukuuku totoka. E na roqoti ira e na ligana veitaqomaki.

17Efe 6.11-17Na gumatua ni Turaga sana nona isulu ni ivalu, e na vakaiyaragitaka na veikabuli kece me valuti ira kina na kena meca;

18na yalododonu e na nona civavonovono, nona isala na lewa dodonu,

19nona isasabai vodivodi na yalododonu,

20nona iselewau gata na cudru kaukaua, era na tovaki koya na veikabuli kece mera valuti ira na lialia.

21E na lidi na yaseyase, qai vakadodonutaka yani na takete me vaka ga e vanataki mai na dakaititi e loloci vakavinaka mai na veio;

22na uca qereqere cudrucudru, e na vaka e rabocaki mai; e na vorati ira na ua lelevu ni wasawasa, e na kuitaki ira tu ga na dobui;

23e na labati ira na cava kaukaua, e na vukataki ira tani. Na beca na lawa e na qeyavu kina na vuravura taucoko, na itovo ca era na vakatoboicu kina na veiliutaki.