1Ni sa raica o Jonacani ni sa kena gauna, sa qai talai rau e le rua i Roma me vakadeitaki, vakavoutaki kina na veiwekani.
2A volavola tale ga vaka kina vei ira na kai Sipata kei na vanua tale e so.
3Erau mani gole i Roma, curuma na seneti, rau kaya, “Sa talai keirau mai o Jonacani na betelevu kei na yavusa Jiu me keirau vakavoutaka na noda veiwekani kei na noda tovata.”
4Era qai solia na kai Roma vei rau na ivola ni veitokoni merau solia vei ira na lewe ni veivanua era na lakova, mera qai maroroi rau na italai merau yaco sara i Juta.
5Qo na lavelave ni ivola i Jonacani vei ira na kai Sipata:
6“O yau o Jonacani na betelevu, o keimami na seneti ni matanitu, na bete kece kei na kai Jiu kece vei kemuni na weka i keimami na kai Sipata, ni bula.
7E na dua na gauna sa oti, a vakau ivola kina vei Oniasi na betelevu o Ario, nomuni tui e na gauna ya, a volai tiko kina nida veiwekani, me vaka e laurai e na kena lavelave sa vakau tiko yani qo.
8A kidavaka na italai o Oniasi e na vakarokoroko, ciqoma na ivola e sereki tu kina na noda tovata kei na veiwekani.
9Koya gona, e dina ni keimami tu vinaka tu, ni sa tu e liga i keimami na ivola tabu me dau veivakauqeti,
10keimami talatala ga yani me buki tale na wa ni noda veiwekani kei na veilomani, me kua tale ni tasere, ni se vakau makawa mai na nomuni ivola.
11Keimami dau nanumi kemuni wasoma gona e veigauna, e na neimami solevu kei na veisiga tale e so, e na neimami vakacabo isoro kei na neimami masu, ni dodonu ga meda veinanumi vakaveiwekani.
12Keimami cibitaka na kemuni irogorogo.
13Ia o keimami, keimami sa bikai tu e na leqa kei na ivalu; era dau valuti keimami na tui ni neimami yasayasa.
14Keimami a sega ni via vakasosataki kemuni kei ira na neimami ito tale e so e na ivalu qo,
15ni tu vei keimami na veivuke mai lomalagi; keimami mani vakabulai vei ira na meca, era vakadrukai o ira.
16Keimami sa lesi rau kina o Numenio na luve i Adioko kei Adipatere na luve i Jesoni, talai rau i Roma merau lai bukia tale na neimami veiwekani kei na neimami tovata.
17Keimami sa vakaroti rau merau cabe tale ga vei kemuni merau solia na neimami ivola qo me baleta na vakavoutaki ni noda veiwekani.
18Ni yalovinaka moni sauma mai na ivola qo.”
19Qo na ivola era a vakauta vei Oniasi:
20“O yau o Ario na tui Sipata, vei Oniasi na betelevu, bula vinaka.
21Sa kune e na kedra ivola na kai Sipata kei na kai Jiu nira veiwekani e na mataqali i Eparahama.
22Nida sa mai kila qo, vola mada mai nomuni itukutuku ni tiko vinaka;
23ia o keimami mada, keimami sa vola yani qo ni nomuni bulumakau kei na iyau sa neimami, na neimami sa nomuni. Keimami sa talai iratou na mata meratou tukutuku vakina vei kemuni.”
Nodrau ivalu o Jonacani kei Saimoni24Sa rogoca o Jonacani nira sa lesu tale mai na turaganivalu nei Demetirio kei na mataivalu e levu cake me mai valuti koya.
25Sa mani cavutu mai Jerusalemi me tavaki ira e na yasayasa o Amaca, mera kua kina ni curuma nona vanua.
26A tala yamata i nodra keba, eratou qai mai tukuna vua nira sa tuvai tu na meca mera kabati ira na Jiu e na bogi.
27Ni sa dromu gona na siga, sa vakaroti ira nona tamata o Jonacani mera qaqarauni, me tu voleka nodra iyaragi, mera vakarau tu e na bogi taucoko mera vala, qai lesi ira e so mera yadra wavoki tu e na keba.
28Nira sa rogoca na meca ni sa vakarau tu na mataivalu i Jonacani mera vala, era sa rere, ra domobula sara; era mani vakawaqa buka e na keba, ra mani vakasuka.
29Era lecava o Jonacani kei nona mataivalu me yacova na mataka, nira raica ni waqa tu na buka.
30Sa qai cemuri ira o Jonacani, ia a sega ni tarai ira, nira sa takosova na uciwai o Eleucero.
31O Jonacani sa qai golevi ira na kai Arapea vakatokai na Savateo, samuti ira, qai butakoci ira.
32Sa qai cavutu me gole i Tamasiko, curuma na yasayasa kece ya.
33O Saimoni tale ga sa curuma na vanua kece, yaco sara i Esikaloni kei na kena koronivalu. A golevi Jopa, qai kabata vakasauri,
34ni sa rogoca nira sa voleka ni solia na koro vei ira na tamata nei Demetirio. Sa qai lesia kina e dua na matasotia me yadrava.
35Ni sa lesu mai o Jonacani, sa soqoni ira na qasenivanua, ra bosea mera tara na koronivalu e Jutia,
36mera kuria na cere ni bai kei Jerusalemi, mera viria na bai cecere me wasei rau na koronivalu kei na loma ni koro mera kua kina ni veivoli na sotia.
37Era mani soqo vata mera vakaukautaka na koro; sa kasura e dua na iwase ni bai vatu e na buca mai cake, a tuva tale vakavinaka na iwase ni bai e vakatokai o Jafenaca.
38O Saimoni a tarai Atita mai Sefela; a viribaitaka, qai vaqataka e na samugakagaka.
Vesuki Jonacani o Tirifo39Sa qai saga o Tirifo me Tui Esia, me nona na kena isala, me rawati Adioko na kena tui.
40A leqataka de na sega ni vakadonuya o Jonacani, de na valuti koya ga; sa saga tu gona ga me vesuki koya qai vakamatei koya, mani cavutu me yaco sara i Becisani.
41A cavutu o Jonacani kei na le 40,000 na sotia digitaki mera valuti koya, era mani yaco i Becisani.
42Ni sa raica o Tirifo ni kauta tiko mai e dua na mataivalu levu, sa rere na valuti koya.
43Sa mani ciqomi koya e na vakarokoroko, tataunaki koya vei ira kece na nona itokani, soli iloloma vua, qai vakaroti ira nona itokani kei nona mataivalu mera vakarorogo vua me vaka ga nodra vakarorogo vei koya.
44Sa qai tukuna vei Jonacani, “Na cava o vakaocai ira kece kina qo nidaru sega tiko mada ni veivaluvaluti?
45Vakasukai ira i vale, digitaka e le vica meratou nomu ilala, tou qai lako vata i Tolemaisi. Au na solia me nomu, kei na koronivalu tale e so, kei ira na vo ni mataivalu kei na vakailesilesi kece. Au na saumaki meu lesu tale i vale, ni qori sara ga na vu ni noqu lako mai.
46A vakabauti koya o Jonacani, vakayacora na ka e tukuna, vakasukai ira na mataivalu, era mani lesu tale i na vanua o Juta.
47A vakavoca ga e le 3,000 - e le 2,000 mera tiko ga e Kaleli, e le 1,000 mera nona ilala.
48Ia ni sa curu yani i Tolemaisi, era sogota na matamata na lewenikoro, ra vesuki koya, vakamatei ira kece e na iselewau na nona ilala.
49O Tirifo sa qai talai ira na sotia kei na mataivalu vodo ose i Kaleli kei na Buca Levu mera samuti ira kece na sotia i Jonacani.
50Ia era sa kila ni sa vesu o Jonacani, ni sa mate vata kei ira kece nona tamata, era sa qai veivakayaloqaqataki, ra maji veidrigidrigi tiko mera vakarau tu e na vala.
51Nira sa raica na meca nira na vala mera bula, era sa suka.
52Era mani yaco bula kece na Jiu i Juta, era qai lolositaki Jonacani kei ira nona itokani, ra sa domobula ga vakalevu; sa lolosi vakalevu na vanua taucoko o Isireli.
53Era sa qai saga na veimatanitu voleka mera samuti ira nira kaya, “Sa sega nodra iliuliu. Meda valuti ira gona qo, meda bokoca laivi vakadua na kedra itukutuku vei keda.”
Who We AreWhat We EelieveWhat We Do
2025 by iamachristian.org,Inc All rights reserved.
