Siraki 43 - Vakavakadewa Vou kei na iVola tale eso（FNVDC12）

1E lagilagi na irairai ni lomalagi; sa dua dina na ka totoka.

2Ni cabe na siga, e tukuni koya tu ga, sa dua na ka rairai totoka, na cakacaka nei koya na Cecere Sara.

3E na sigalevu sa vavia na qele, o cei e rawa ni vorata na kena katakata?

4O koya e qarava na ivavi e cakacaka e na katakata, ia na matanisiga e vakama na ulunivanua e na katakata e vakatolutaki;

e cokataka yani na cawa katakata, e boko na mata e na kena serau.

5E cecere dina na Turaga a bulia; e na nona lewa e toso tu kina na kena ilakolako.

6A bulia tale ga na vula e dei tu ga na kena ilakolako, me wasewasea na gauna, me ivakatakilakila tudei.

7E vu e na vula na ivakatakilakila ni siga ni solevu; ni sa taucoko, e tekivu dromu talei.

8Na vula mai lomalagi e vakayacani kina na iwasewase ni gauna; e rairai totoka na duidui ni matana;

e nodra iyaragi na yagilosi mai cake, e rarama tu mai lomalagi.

9Na lagilagi ni kalokalo na totoka ni lomalagi, na iukuuku tatalivaliva ni lomalagi cecere ni Turaga.

10E na ivakaro ni Ledua Yalosavasava, era tu ga kina e na nodra itutu, era sega ni cegu e na nodra itavi.

11Raica na drodrolagi, vakacaucautaki koya a bulia, e rairai totoka sara e na kena serau.

12E mokota na lomalagi e na nona imoko lagilagi; na liga nei koya na Cecere Sara sa vakadreta.

13E na nona ivakaro, e lutu na waicevata, e lidi na livaliva ni nona vakatulewa.

14Era sa dola na lololo ni lomalagi, sa vuka mai kina na o me vaka na manumanuvuka.

15E na nona qaqa, sa vaksoqona vata kina na o, vaqera na uca cevata,

16E na nona basika e sakura na ulunivanua; e na nona ivakaro e liwa na ceva.

17Na domo ni kurukuru e cudruva na vuravura, vakina na cagi ca mai na vualiku kei na covulaca.

E kaburaka na ucacevata me vaka na nodra ro na manumanuvuka, kena miri mai e vaka na nodra ro na yavusa vodre.

18E qoroya na mata na totoka ni kena vulavula, e kurabui na vakasama e na nona lutu.

19E vakamirika na tegucevata e vuravura vaka na masima; ni sa cevata, sa vaka na kau votovotoa.

20E liwa na cagi vualiku batabata, e cevata na delaniwai;

na veitobu ni wai e darama na nona itataqomaki.

21E vakama na ulunivanua kei na vanua talasiga; e vakaraqosataka na co me vaka na katakata ni buka.

22Na kabu e vakabula sara na ka kece; ni basika na tegu, e vakaotia na katakata.

23E na nona lewa a vakaruruya na wasawasa titobu, teya kina na veiyanuyanu.

24Era dau tukuna na dausoko na kena rerevaki na wasawasa, eda qoroqoro e na ka eda rogoca,

25nira tu kina na cakacaka veivakurabuitaki talei, na veimataqali kabula kei na veimanumanu lelevu ni wasawasa.

26E na vukuna era yaco bula na nona italaki kece; e na nona vosa era tudei tu kina na veika kece.

27E dina nida vosa vakalevu, eda sega ni rawa ni yacova na kena iotioti; na isoqoni ni noda vosa: “O koya na veika kece.”

28Meda kunea mai vei na kaukaua meda vakacaucautaki koya? E levu cake o koya mai na nona cakacaka kece.

29E vakadomobula na Turaga, e cecere, veivakakurabuitaki na nona kaukaua.

30Nio vakacaucautaka na Turaga, vakacerecerei koya e na kena levu o rawata, ni na sivita o koya na ka qori.

Nio vakacerecerei koya, solia nomu igu taucoko, kua ni oca, ni sega ni rauta na nomu vakacaucautaki koya.

31O cei beka sa raici koya se vakamacalataki koya rawa? Se o cei e rawa ni vakacerecerei koya, ni sa cecere rawa tu mada ga?

32E levu tale na veika lelevu sara vaqo e se vuni tu, nida sa raica e vica wale ga na nona cakacaka.

33Sa bulia na Turaga na veika kece, sa solia vei ira na tamata yalosavasava na yalomatua.