1Ni mai cava na bula i Apimeleki, sa basika cake mai o Tola na luve i Pua ka makubui Dodo me vakabulai ira na Isireli. E cavutu mai na yavusa o Isakari o Tola ka tiko mai Samiri ena vanua cecere vaka-Ifereimi.
2A yaco me dauveilewai e Isireli me ruasagavulu katolu na yabaki. A sa qai vakacegu yani ka la'ki bulu e Samiri.
3Ni oti o Tola, a taravi koya sara yani o Jairi na kai Kiliati. A sa lewai ira na Isireli me ruasagavulu karua na yabaki.
4E tolusagavulu taucoko na luvena tagane ka ra vodoka e tolusagavulu na asa. Era taukena e tolusagavulu na koro lelevu ena loma ni vanua o Kiliati, ka ra se vakatokai tikoga me ra veikorokoro nei Jairi.
5A sa mate o Jairi, ka sa bulu mai Kamoni.
Veivakalolomataki o Ira na Amonaiti6Era sa vakayacora tale na ka ca o ira na Isireli ena mata i Jiova ni ra sa qaravi Peali kei Aseteroci, kei na nodra kalou na kai Siria, Sitoni, Moapi, Amoni, kei Filisitia. Era sa biuti Jiova ka sega ni qaravi koya.
7Sa qai cudruvi ira vakalevu na kai Isireli o Jiova, ka soli ira yani ki na ligadra na kai Filisitia kei ira na Amonaiti.
8A tinikawalu taucoko na yabaki na nodra vakasaurarataki ira tiko na Isireli ka ra tiko ena tai ka dua ni Joritani ena nodra vanua na Amoraiti, mai Kiliati.
9Era sa takosova talega na Joritani o ira na Amonaiti me ra vala kei ira na Juta, kei ira na Penijamini, ka vakakina o ira na Ifereimi. Na ka oqo sa vakaleqai Isireli sara vakalevu.
10Era sa qai tagi vei Jiova o ira na Isireli ka kaya: “Keimami sa cala vei kemuni, ni keimami a biuti kemuni, ka cuva vei ira na Peali.”
11A sa kaya o Jiova vei ira na Isireli: “Au a sega li ni sereki kemuni mai vei ira na kai Ijipita, na Amoraiti, na Amonaiti ka vakakina mai vei ira na Filisitia?
12O ira talega mai Saitoni, na Amalekaiti kei ira na Maonaiti, era a vakasaurarataki kemuni, o ni a tagi vei au, au a qai sereki kemuni mai na ligadra.
13Ia, o ni a vakanadakui au ga ka cuva ki na veikalou, ia oqo au na sega ni sereki kemuni tale.
14Ni lako ni la'ki tagi vei ira na veikalou o ni sa digitaka me ra qai sereki kemuni ena nomuni leqa.”
15Era a qai kaya na Isireli vei Jiova, “Keimami sai valavala ca. Mo ni vakayacora vei keimami na ka sa vinaka vei kemuni, ia mo ni vakabulai keimami ena siga oqo.”
16Era sa qai biuta tani na veikalou tani ka qaravi Jiova; ka sa yaco mai na gauna me sa kauwaitaka tale kina o Jiova na nodra rarawa na Isireli.
17Era sa soqoni vata mai na Amonaiti me ra vakacibi i valu, ka la'ki tara keba toka mai Misipa e Kiliati.
18Mai kea era sa veitarogitaka na nodra i liuliu na lewenivanua e Kiliati, ka kaya, “O cei na tamata ena tekivuna na nodra valuti na Amonaiti? O koya oqo me na qai liutaki ira kecega na kai Kiliati.”
Who We AreWhat We EelieveWhat We Do
2025 by iamachristian.org,Inc All rights reserved.
