1A qai vosa o Ilivasi na kai Temani, ka kaya,
2 Jope 35.6-8 Sa yaga beka li na tamata vua na Kalou?
Ena rawa li vua na tamata vuku duadua sara me yaga vua?
3E dua beka na betena vua na Kalou na nomu caka dodonu,
Se ena vukei koya beka na nomu caka vinaka?
4E sega ni bale ki na nomu rerevaka na Kalou
Na nona veilewaitaki iko ka totogitaki iko.
5E sega ni vaka o ya!
Sa bale duadua ga ki na sivia ni nomu i valavala ca
Vata kei na levu ni ca o sa cakava!
6O sega ni dau solia wale e dua na ka me dinautaka na wekamu
Kevaka e sega na ka o taura mai vua me i vakadei ni dinau;
O taura mai vua na ka kei na i sulu
Me qai dravudravua ka tu wale sara o koya.
7O bureitaka na wai ni gunu vei ira era oca,
Ka bese ni vakani ira era viakana voli.
8O vakacolasautaka na nomu kaukauwa kei na nomu i tutu
Me rawa kina ni nomu na vanua taucoko.
9E sega wale ga ni o besetaka na vukei ira na yada,
O butakoci ira talega ka vakatotogani ira na luveniyali.
10Oqo na vuna era sa tuva wavoliti iko kina na veika mo tacori kina,
Ka yacovi iko vakasauri na rere levu.
11Sa toro cake na butobuto ka sa sega na ka o raica rawa;
Ka sa qai luvuci iko na waluvu.
12E sega beka ni tiko na Kalou mai na lomalagi e cake sara,
Me qai irovi ira sobu mai na veikalokalo
Ka veitalia na kedra yawa ki lagi?
13Ia o se taroga ga, A cava sara mada e kila na Kalou?
E rawa vakacava vua me vakatau lewa vei keda
Ni ra tabonaki koya tani tu na veio?
14O nanuma ni veio vavaku ena vakalatia na nona rai,
Ena nona veilakoyaki voli ena ruku ni dela i lomalagi.
15Sa lomamu dina li mo muria tikoga
Na sala era a dau muria tu e liu na tamata ca?
16O ira oqori era a mate dole
Ka kuitaki ira laivi yani na dobui.
17Oqori o ira na tamata era besetaka na Kalou
Ka ra vakabauta ni sega na ka e cakava rawa vei ira o koya.
18Ia na Kalou ga vakaikoya e a vakavutuniyautaki ira.
Au sa drukataka dina na nodra vakasama na tamata ca.
19Era marau na tamata dodonu ka ra dredre na tamata vinaka
Ni ra raica ni ra sa totogitaki na tamata ca.
20Sa qai vakarusai na nodra i yau kecega na tamata ca,
Ka vakamai ena bukawaqa na nodra i yau sa vo.
21Ena gauna oqo, Jope, mo drau veiyaloni mada kei na Kalou
Ka muduka na nomu raici koya tiko me vaka na kemu meca;
Ke o cakava oqo, ena qai vakalougatataki iko o koya.
22Mo ciqoma na i vakavuvuli sa solia vei iko;
Ka tugana sara ki lomamu na nona vosa.
23Io, e dodonu mo lesu sara ga vua ena yalo malumalumu,
Ka muduka vakadua na ca kecega ka vakayacori tiko ena nomu vale.
24Kolotaka laivi na nomu koula;
Kolotaka na nomu koula talei duadua ki na veivatu ni wai drodro.
25Me qai nomu koula ga na Kalou Kaukauwa,
Ka nomu siliva talei duadua talega o koya.
26Ia o na qai dinata kina na Kalou ena gauna kece,
Ka vakadinadinataka ni sai koya ga na Kalou na i takataka ni nomu reki.
27Ni o qai masu vua, sa na qai sauma mai o koya;
Ia mo vakayacora sara na ka o sa yalataka vua.
28Na ka kece o cakava o na rawata vakavinaka,
Ka na serauna na nomu sala na rarama.
29Sa vakalolovirataki ira na viavialevu na Kalou
Ka taqomaki ira na yalo malumalumu.
30Ena vakabulai iko o koya ke sega na nomu cala,
O ya kevaka e dodonu na ka o cakava?
Who We AreWhat We EelieveWhat We Do
2025 by iamachristian.org,Inc All rights reserved.
