1Era sa la'ki vakoro tiko mai Jerusalemi o ira na nodra i liuliu na Isireli, ka ra sa vakawiri madigi na vo ni lewenivanua me digitaki kina e dua na vuvale mai na veiyatini na vuvale me la'ki tiko ena koro tabu o Jerusalemi, ia o ira na kena vo me ra tiko ga ena veikoro lelevu kei na veikoro lalai tale eso.
2O ira na lewenivanua era sa vakacaucautaki ira na tamata era bolea me ra sa toki ki Jerusalemi ka tiko kina.
3Mai na veikoro lelevu kei na veikoro lalai tale eso, era sa tiko ga ena nodra veitikotiko e loma ni nodra veikoro vakaoqo o ira na Isireli, o ira na bete, o ira na Livai, o ira na dauveiqaravi ena vale tabu, kei ira na kawa ni tamata cakacaka i Solomoni.
Oqo o ira mai na yasana o Juta ka ra vakaitikotiko e Jerusalemi:
4Mai vei ira na yavusa o Juta: o Ataia na luve i Usaia ka makubui Sakaraia. O ira tale na vo ni nona qase o Amaraia, o Sefataia, kei Mealaleli, ka ra kawa i Peresi na luve i Juta tagane.
5O Maseia, na luve i Baruki ka makubui Kolosea. O ira tale na nona qase o Asaraia, o Ataia, o Joaripi, kei Sakaraia, ka ra kawa i Sela na luve i Juta tagane.
6Mai vei ira na kawa i Peresi, era sa lewe 468 taucoko na tagane qaqa era a vakaitikotiko e Jerusalemi.
7Mai vei ira na yavusa o Penijamini: o Salu na luve i Mesulame ka makubui Joeti. O ira tale na vo ni nona qase o Petaia, o Kolaia, o Maaseia, o Eceli, kei Jesaia.
8O Kapai kei Salai e rau veiwekani voleka sara kei Salu.
Era sa lewe 928 taucoko na kawa i Penijamini era a vakaitikotiko e Jerusalemi.
9A nodra i liuliu o Joeli na luve i Sikiri tagane, ka nona i vukevuke o Juta na luve i Asenua tagane.
10Mai vei ira na bete: o Jitaia na luve i Joaripi tagane, kei Jakini.
11O Siraia, na luve i Ilikaia tagane ka makubui Mesulame. O ira na vo ni nona qase o Setoki, o Meraioci, kei Aitupi na Bete Levu.
12Era lewe 822 taucoko sara na i wiliwili ni yavusa oqo ka ra veiqaravi ena Valenisoro.
O Ataia, na luve i Jiroame ka makubui Pilalaia. O ira na vo ni nona qase o Emasi, o Sakaraia, o Pasuri, kei Malikaia.
13Era lewe 242 taucoko sara na i wiliwili ni yavusa oqo ka ra i liuliu ni nodra veivuvale.
O Amasai, na luve i Esareli tagane ka makubui Asai. O ira na vo ni nona qase o Mesilemoce kei Ima.
14Era lewe 128 taucoko na i wiliwili ni yavusa oqo ka ra sotia qaqa. A nodra i liuliu o Sapetieli na luve i Ekidolimi tagane.
15Mai na yavusa i Livai:
O Simaia, na luve i Asupi tagane ka makubui Asirikama. O ira na vo ni nona qase o Asapaia kei Puni.
16O Sapetai kei Josapati, e rua na turaga dokai vei ira na Livai ka rau liutaka na cakacaka e tautuba ni Valenisoro.
17O Matanaia, na luve i Maika tagane ka makubui Sapati, ka nona qase o Esava. A sa liutaka o koya na matasere ni Valenisoro ena kena lagati na masu ni vakavinavinaka.
O Pakipukia, o koya ka i vukevuke i Matanaia.
O Apita, na luve i Samua tagane ka makubui Kalali, ka nona qase o Jetucuni.
18Era sa lewe 284 taucoko na kawa i Livai era vakoro ena koro tabu o Jerusalemi.
19Mai vei ira na dauyadrava na Valenisoro:
O Akupi, o Talimoni, kei ira na wekadrau era lewe 172 taucoko.
20O ira na vo ni Isireli, o ira na bete kei ira na Livai era a dui tiko ga ena veikoro e Juta ena nodra dui vanua a votai vei ira.
21Ia o ira na dauveiqaravi e Valenisoro era a la'ki tiko mai na dela i Ofeli ka rau nodra i liuliu o Saia kei Kisipa.
22E nodra i liuliu ni cakacaka e Jerusalemi na kawa i Livai o Usai, na luve i Bani, na luve i Asapaia, na luve i Matanaia, na luve i Maika mai na kawa i Esava, na kawa ka dau nodra i tavi na laga sere ena Valenisoro.
23Sa koto oti e dua na i vakaro vakatui ka vakaroti kina me dau liutaka na laga sere e Valenisoro e dua na vuvale ena veisiga yadua.
24Na veika kece e baleti ira na Isireli sa la'ki kena mata tiko mai vale ni Tui Perisia o Peceaia na luve i Mesesapeli mai na vuvale i Sira na luve i Juta.
Na Veikoro ena Taudaku i Jerusalemi25Era a qai tiko na kai Juta ena nodra veikoro kei na nodra veivanua ni teitei. Era a vakatawana na veikoro lelevu vakataki Kiriaci Aripa, o Taiponi kei Jikapeseli kei na kedratou veikoro lalai;
26o Jesua, o Molata kei Pecipeleti,
27o Asarisuali, o Perisepa kei na kena veikoro lalai;
28o Sikilaki, o Mikona kei na kena veikoro lalai;
29o Enirimoni, o Sora, o Jarimuci,
30o Sanoa, o Atulama kei na kedratou veikoro lalai; o Lakisi kei na kena veivanua ni teitei; o Aseka kei na kena veikoro lalai. Na vanua era a tawana na kawa i Juta a tekivu mai Perisepa ena ceva ka kauta ki na buca o Inomi mai na vualiku.
31Ia o ira na kawa i Penijamini era a tawana na veikoro tekivu e Kipa ka lako yani: o Mikimasi, o Aija, o Peceli kei na kena veikoro lalai;
32o Anacoci, o Nopi, o Ananaia,
33o Asori, o Rama, o Kitaimi;
34o Atiti, o Sipoimi, o Nipalati;
35o Lota kei Ono, na nodra buca na matai liga maqosa.
36Ia vei ira na Livai, sa so na nodra i votavota e Juta mai Penijamini talega.
Who We AreWhat We EelieveWhat We Do
2025 by iamachristian.org,Inc All rights reserved.
