Lako Yani 38 - Vakavakadewa Vou kei na iVola tale eso（FNVDC12）

Na Kena Caka na i Cabocabonisoro Kama(Lako 27.1-8)

1A sa taya o koya na i cabocabonisoro kama ena kau akasia. Oqo e bulicaki me vaka na sukuwea, ka 2.2 na mita na kena balavu, e 2.2 na mita na kena raba, ka 1.3 na mita na kena cere.

2A sa cakava na ucuna momoto ena tutuna vava, ka sa dua ga na kena kau e vakarautaki mai kina kei na i cabocabonisoro; ka qai ubia ena parasa.

3A sa cakava na i yaya kece ni cabocabonisoro; na sedre, na i sivi ni dravusa, na beseni, na i qaso kei na miqa ni bukawaqa. A sa cakava na kena i yaya kece sara o koya ena parasa.

4A sa cakava o koya na bai lawalawa ni cabocabonisoro ena parasa ka vakabira vata ena ruku ni tutuna me donuya na veimama ni kena cere.

5A sa cakava e va na i daradara ni vua mokimokiti ka vakamautaka ena tutuna vava ni bai lawalawa parasa me dara kina na i vua;

6a taya o koya na i vua ena kau akasia ka ubia ena parasa,

7ka daramaka ena kedra qara vakarautaki ena veiyasa ni cabocabonisoro me dau colati kina. Na i cabocabonisoro sa caka mai na kau raraba sa vakalomana.

Na Kena Caka na Beseni Parasa(Lako 30.18)

8A sa cakava o koya na beseni parasa ni vuluvulu kei na kena i tutu parasa mai na nodra iloilo na yalewa dauveiqaravi ena mata ni vale tabu.

Na Kena Caka na Bai ni Vale ni Veitavaki(Lako 27.9-19)

9A sa cakava o koya na bai ni vale tabu. Na i latilati ena yasana vaka ki na ceva a sa caka ena lineni tali vakamatau, ka 44 na mita na kena balavu;

10na kena duru e ruasagavulu kei na kena i tutu e caka ena parasa, ia na kedra i ruberube kei na kedra i vau sa caka ena siliva.

11Na i latilati ki na yasana vaka ki na vualiku e tautauvata na kena i vakarau.

12Mai na yasana ki na ra, ka donuya na i curucuru, a kena i latilati e 22 na mita na kena balavu, ka tini na kena duru kei na tini na kena i tutu, ia na kedra i ruberube kei na kedra i vau sa caka ena siliva.

13Mai na yasana ki na tokalau, ka donuya na i curucuru, a kena i latilati e 22 na mita talega na kena balavu.

14Na i latilati ena dua na yasa ni katuba sa 6.6 na mita na kena raba, ka toka vata e tolu na kena duru kei na kena qara.

15Sa vakakina na yasana kadua, e 6.6 talega na mita na kena raba, ka tolu na kena duru kei na kena qara.

16Na i latilati kece sara wavokita na bai sa caka mai na lineni qali vakamaqosa.

17Na i tutu ni veiduru sa caka ena parasa, kei na i ruberube ena duru, na kedra i vau kei na i ubi ni deladra sa caka ena siliva.

18Na i latilati ni matamata ni bai sa taliwataki vakaiukuuku ena wa karakarawa, lokaloka, kei na wa damudamu ka sa ukutaki ena wa talitali sa cula vakamatau. E ciwa na mita na kena balavu ka rua na mita na kena cere, me vaka na i latilati ni bai.

19Sa va na kena duru kei na kedra qara parasa; ia na kedra i ruberube, kei na i ubi ni ulu ni duru, kei na kedra i vau sa caka ena siliva.

20Na i vakadei kece ni vale tabu kei na kena bai wavoki sa caka ena parasa.

Na i Yaya ni Vale Tabu

21Oqo na i wiliwili ni yaya sa vakayagataki ena vale tabu ka tiko kina na i vunau a vakarota o Mosese ka ra a cakava na Livai ka liutaki ira o Icama na luve i Eroni na bete.

22A sa cakava o Pesalieli na luve i Uri, na makubui Ua mai na mataqali o Juta na ka kecega sa vakarota vei Mosese o Jiova me cakava;

23a sa vukei koya o Aoliapi na luve i Esimaki mai na mataqali i Tani, e dua na dauceuceu, ka daudroini, ka dautali wa karakarawa, lokaloka, kei na wa damudamu.

24Na levu ni koula ka vakayagataki ena kena tara na vale tabu (oqo na koula a vakacabori vei Jiova) e rauta ni dua na udolu na kilokaramu, me vaka na kena i vakarau sa vakadonui vakalawa.

25Na siliva sa kumuni ena gauna sa wiliki kina na lewenivanua e rauta ni 3,430 na kilokaramu, me vaka na kena i vakarau sa vakadonui vakalawa.Lako 30.11-16

26O ira kece na tamata era okati ena wili lewenivanua era sa dui sauma mai na veika e lavaki vei ira, me vaka na kena i vakarau sa vakadonui vakalawa. Na kedra i wiliwili taucoko na tagane yabaki ruasagavulu ka lako cake e 603,550.Maciu 17.24

27Ena vuku ni siliva, a sa 3,400 na kilokaramu ka sa vakayagataki me caka kina na yavu ni vale tabu kei na i latilati; ka 34 na kilokaramu e caka kina na kena yavu.

28Sa qai vakayagataka o Pesalieli na vo ni 30 na kilokaramu na siliva me cakava kina na i ruberube ni duru, na i ubi ni ulu ni duru kei na kedra i vau.

29Na parasa ka vakacabori vei Jiova sa rauta ni 2,425 na kilokaramu na kena bibi.

30A sa cakava kina o koya na i tutu ni katuba ki na Vale ni Veitavaki, na i cabocabonisoro parasa kei na kena lawalawa, na i yaya kece ni cabocabonisoro,

31na i tutu ni bai wavoki kei na matamata ni bai, na i vakadei taucoko sara ni vale tabu, kei na i vakadei se peki ni bai ni rara sa volita.