Tobita 5 - Vakavakadewa Vou kei na iVola tale eso（FNVDC12）

Vakarau na itosotoso

1Sa qai sauma o Tobia, “Tamaqu, au na cakava na ka kece o sa vakarota vei yau;

2ia au na lai taura mai vakacava na ilavo, ni keirau sega mada ni veikilai? Na cava meu solia vua me vakabauti yau kina, me solia mai na siliva? Au sega mada ga ni kila na sala i Mitia.”

3Qai sauma o Tobita, “Keirau sainitaka ruarua na kena ivola, au qai kotiva rua me keirau yadua. Nona ivola au maroroya vata kei na siliva. Sa sivi tale qo e ruasagavulu na yabaki noqu tataunaka vua na siliva. Qara e dua na nomu lewenisala, daru na qai dau saumi koya tiko me yacova nomudrau lesu mai; drau lai kauta mai na ilavo.”

A sotavi Rafaele o Tobia

4 Ipe 13.2 Sa qai lai vaqara o Tobia e dua e kila na sala merau veitomani i Mitia. Se qai curu ga i tuba, sa tu sara e matana o Rafaele. E sega ni kila o Tobia ni yagilosi ni Kalou,

5mani taro, “O lako mai vei na wekaqu?” A sauma na yagilosi, “O yau na kai Isireli, daru veiwekani, au mai vaqara cakacaka i Ninive.” Taro o Tobia, “O kila na sala i Mitia?”

6Sauma o Rafaele “Io, au sa taleva vakavica, au kila vinaka kece na kena sala. Au dau lako i Mitia au dau tiko vei Qavaele na wekadaru mai na koro o Rajesi. E rua beka na siga mai na koro turaga o Ekevatana. O Rajesi e tiko e na kena colo.”

7Sa qai tukuna o Tobia, “Wawa mada e ke na wekaqu, meu lai tukutuku vei tamaqu. Au vinakata medaru lako vata, au na saumi iko kina.”

8A sauma yani, “Lako sara, kusa.”

A sotavi Rafaele o Tobita

9A curu i loma o Tobia, kaya vei tamana, “Au sa kunea e dua na kai Isireli me keirau salavata.” Sauma o Tobita, “Kacivi koya me curu mai, meu vaqaqa nona mataqali kei na nona kawa, se ganita me nomu lewenisala se sega.” Sa qai curu i tubu o Tobia, a kaya vei Rafaele, “E kerea o tamaqu modrau veikilai mada.” Curu mai o yagilosi, a vakabula vua o Tobita. Sauma sara o Rafaele, “Au nuitaka ni daumaka na ka kece.” Sauma o Tobita, “Isa, me daumaka vakacava na ka kece niu mataboko tu, au sega ni raica e dua na ka. E vaka meu mate tu, sa tabogo vei yau na rarama. Sa vaka au bulu bulabula tu, au rogoca na domo, au sega ni raica na mata.” Kaya na yagilosi, “Mo yalovakacegu, na Kalou e na rogoci iko e na vakabulai iko.” Kaya o Tobita, “Na luvequ o Tobia e via lako tiko i Mitia. Modrau veitomani mada, mo vakaraitaka vua na sala. Au na saumi iko.” Sauma o Rafaele, “Au makutu na veitomani. Au sa talevi Mitia vakavica, au kila kece na kena sala, e veidelana kei na veibuca.”

10Sa qai taroga o Tobita, “Na wekaqu, o cei nomu mataqali, nomu matavuvale? Tukuna mada.”

11Ia a sauma, “O vaqara tiko e dua na mataqali, dua na matavuvale, se e dua mo sauma me lewenisala i luvemu?” A kaya o Tobita, “Au via kila, na wekaqu, na nomu mataqali kei na yacamu.”

12A sauma, “O yau o Asaria, na luve i Anania levu, daru veiwekani.”

13Qai kaya o Tobita, “Bula vinaka na wekaqu. Kua ni cudru niu via kila nomu mataqali kei nomu matavuvale. O iko na wekaqu, kawa vinaka vakaturaga. Keitou a veikilai kei Anania kei Jacani na luve i Semaia levu ni keitou a lai sokalou vata i Jerusalemi, keitou cabora na isevu ni manumanu kei na vuaniqele. Erau a sega ni cala me vakataki ira na wekadaru e so. Na wekaqu, o iko o kawa vinaka.

14Ia tukuna mada se me vica na kemu isau - e dua na drakema dua na siga, kei na isau ni veika odrau na volia?

15Au na qai kuria na kemu isau keodrau lesu bula mai.”

16Vteki 24.7,40Sa qai sauma na yagilosi, “Au na tomani koya. Ni kua ni leqa, keirau na lesu bula mai. E sega ni rerevaki na sala.” Kaya o Tobita, “Mo kalougata na wekaqu.” Sa qai gole vei luvena, kaya, “Luvequ, vakasosolo sara modrau sa lako. Me maroroi kemudrau mada na Kalou mai lomalagi e na nomudrau ilakolako, modrau lesu bula mai. Me vakatawani iko tiko na nona yagilosi, luvequ.” Sa qai curu i tuba o Tobia, a reguci rau o tamana kei tinana. Kaya o Tobita, “Cagidonu mada na ilakolako!”

17Sa tagi o Ana na tinana, kaya vei Tobita, “Na cava o tala kina na luvedaru me lako? E sega beka ni nodaru gone nuitaki daru dau veitalayaka?

18Kua ni binia na ilavo; na ilavo e ka wale, dredre ga na luvedaru.

19Sa rauti kedaru vinaka na bula sa solia na Turaga.”

20Sa qai tukuna o Tobita, “Kua ni leqa na watiqu; e na lesu bula mai, o na raici koya tale.

21Erau na salavata e dua na yagilosi vinaka; e na katoa na nona ilakolako, e na lesu bula mai.” Sa qai dula.