1 Vtaki 21.6; 22.17 A sa kaya o Jiova,
“Ni lako mai oi kemuni kece o ni viagunu,
Sa tu oqo na wai.
Ni lako mai oi kemuni kece e sega na nomuni i lavo;
Ni mai voli kakana.
Ni lako mai ka mai voli waini kei na sucu,
E sega ni saumi ena dua na ka!
2 Sr 24.19-22 Na cava o ni vakayagataka kina na i lavo
Ena ka e sega ni kakana?
Na cava o ni vakayagataka kina na kemuni i sau
O ni qai sega ni mamau?
Ni vakarorogo vei au o ni na qai rawata
Na kakana vinaka mo ni kania
Na kakana uasivi o ni marautaka ni kania.
3 Caka 13.34 “Ni vakarorogo vei au oqo na noqu tamata ka lako mai vei au:
Ni lako mai vei au mo ni na bula kina.
Au na cakava e dua na veiyalayalati tawa mudu kei kemuni,
Ka solia vei kemuni na veivakalougatataki au a yalataka
Me'u solia vei Tevita.
4Au a buli koya me i vakadinadina vei ira na tamata
Ka me i liuliu ka dau lewa vei ira na veimatanitu.
5O na kacivi ira na veimatanitu o sega ni kilai ira,
Ia era na lako mai me ra duavata kei iko.
Oi au o Jiova na Kalou Yalo Savasava ni Isireli
Sa vakavuna me yaco na ka oqo;
Ka'u na solia vei iko mo lagilagi ka dokai!”
6Ni gole vei Jiova ka masu vua ni sa voleka tiko.
7Laivi ira na tamata ca me ra biuta na nodra i valavala
Ka veisautaka na i tovo ni nodra vakasama.
Laivi ira me ra gole vei Jiova na noda Kalou,
Sa yalololoma o koya ka dau totolo na nona veivosoti.
8A sa kaya o Jiova,
“Na noqu vakasama e sega ni vaka na nomuni vakasama,
Ka sa duidui na noqu sala mai na nomuni sala.
9Me vaka na yawa ni lomalagi mai vuravura
Sa yawa vakakina na noqu sala kei na noqu vakasama
Mai na nomuni sala kei na nomuni vakasama.
10 2Kori 9.10 “Na noqu vosa sa vaka na wai cevata kei na uca
Sa lako sobu mai lomalagi me vakasuasuataka na vuravura,
Ka vakavuna me ra tubu na kau
Ka sa rawa kina me so na sore ni kau vua na daukakaburaki
Kei na kakana me laukana.
11Ena vaka talega kina na noqu vosa sa lako mai gusuqu;
Ena sega ni lesu lala mai vei au;
Ia ena vakayacora na veika ka'u sa nakita,
Ka rawata na veika ka'u a tala kina.
12“O ni na biuti Papiloni ena marau;
Ka liutaki yani ki taudaku ni koro ena vakacegu.
Na veiulunivanua kei na veidelana era na sere mai
Ka ra kaikaila mai na veikau ena marau.
13Ena tubu mai na damanu ena vanua e tu kina na soni,
Ka na tubu mai na co ena vanua e tubu kina na soni.
Sa i koya oqo e dua na i vakatakilakila ena tawa mudu
Me dau nanumi tiko kina na veika au sa cakava.”
Who We AreWhat We EelieveWhat We Do
2025 by iamachristian.org,Inc All rights reserved.
