Udite 9 - Vakavakadewa Vou kei na iVola tale eso（FNVDC12）

Na masu nei Udite

1Sa qai davoraki koya o Udite, borodravusataka na uluna, qai luvaluva me vakaraitaka na nona isulutaga. E na gauna sara ga sa cabori kina na mira ni yakavi e na vale ni Kalou mai Jerusalemi, a kailavaka o Udite vua na Turaga,

2Vteki 34.1-31“I Turaga na Kalou ni noqu vu o Simione, oni a solia vua na iselewau me saumi ira kina na vulagi e na nodra luvata na ioro ni daulato mera vaqasei koya, cereka nona isulu mera vakamaduataki koya, vakadukara na nona katonigone mera vakarogocataki koya; oni a tukuna, ‘Me kua’ — era cakava ga.

3Oni a soli ira kina na nodra iliuliu mera vakamatei, kei na nodra loga sa madua e na nodra lawaki ca, me tauvi dra; oni samuti ira vata na bobula kei ira na turaga kei ira na ravouvou e na nodra idabedabe vakatui;

4oni a solia na watidra mera drotaki, nodra goneyalewa mera kau vakabobula, kei na nodra itokinivalu mera wasea na luvemuni lomani era yalodina vei kemuni, era cata ni vakadukadukalitaki nodra dra, era mani kere veivuke vei kemuni. I kemuni na Kalou, na noqu Kalou, moni rogoca tale ga na yada qo.

5“Oni sa cakava na ka qo, na veika sa oti kei na veika e na tarava, oni sa tuva na veika sa yaco tu kei na veika se bera mai. Io, era sa yaco na nomuni inaki,

6era sa vovotu mai na nomuni lewa, ra kaya, ‘Raica, o keimami qo,’ ni nomuni sala kece sa vakarautaki oti tu, oni vakatulewa e na dela ni kila.

7“Ni raica, era sa kaukaua mai na kai Asiria; era sakitaki e na nodra ose kei na kedra itaukei, era boletaka na nodra mataivalu taubale; era nuitaka na isasabai kei na moto, na dakaititi kei na irabo, era sega ga ni kila ni o kemuni na Turaga oni dau muduka na ivalu; na yacamuni na Turaga.

8Ni vakamalumalumutaki ira e na ligamuni qaqa, ni vakaseva nodra kaukaua e na nomuni cudru, nira via vakacacana nomuni loqi tabu, vakadukara na valelaca tabu, na itikotiko ni yacamuni lagilagi, talaka laivi na dudu ni nomuni yaletare.

9Ni raica na nodra viavialevu, me tau vei ira nomuni cudru, ni solia vei yau na yada na kaukaua meu vakayacora na lomaqu.

10E na noqu yameyame, ni samuta mate vata na italai kei na turaga, na turaga kei na nona tamata; ni muduka na nodra dokadoka e na liga ni yalewa.

11“Na nomuni kaukaua e sega ni ka ni le levu; na nomuni qaqa e sega ni qaqa vakatamata; o kemuni na nodra Kalou na beci, nodra veivuke na bikai, nodra itokani na malumalumu, nodra idrodro na vakaloloma, nodra ivakabula na yalolailai.

12Isa isa Kalou nei tamaqu, Kalou mareqeti ni kawa i Isireli, Turaga ni lomalagi kei vuravura, iTaukei ni wai kece, Tui ni nomuni veikabuli kece, ni rogoca na noqu masu!

13Gk Est 1.24,25Noqu vosa veicavilaki, mera mavoa kina, me kedra kuita, nira sa nakicataka na nomuni veiyalayalati, na nomuni vale tabu, na Ulu i Saioni, kei na neimami vale na luvemuni.

14Ni vakatakila i na nomuni matanitu taucoko, vei ira na kena veimataqali, me matata vei ira ni o kemuni na Kalou, na Kalou kaukaua duadua, e sega tale na isasabai ni kawa i Isireli, o kemuni ga!”