Siraki 51 - Vakavakadewa Vou kei na iVola tale eso（FNVDC12）

Sere ni vakavinavinaka

1Au na vakavinavinaka saka vei kemuni na Turaga na Tui, au na vakacaucautaki kemuni na Kalou na noqu iVakabula.

Au vakavinavinaka vua na yacamuni

2nioni sa dau taqomaki yau, dau vukei yau, dau vagalalataki yau mai na rusa, na vosa vakacacani kei na lasu. E na matadra na wavokiti yau oni a vukei yau,

3vagalalataki yau, e na cecere ni nomuni loloma kei na yacamuni, mai na nodra kati bati o ira na kequ meca, mai na ligadra o ira na via vakamatei yau, mai na leqa e vuqa au sotava mai,

4mai na katakata vakatubu mate e wavokiti yau, mai na loma ni buka au sega ni waqaca,

5mai na botosauloa kei Etesi, mai na yame duka kei na vosa lasu -

6na yame lasulasu e vakacacani yau vua na tui.

Au voleka sara ni mate, vovoleka na yagoqu me siro i Etesi.

7Era vakavolivoliti yau kece e na veiyasana, sega ni dua me vukei yau. Au vaqara me dua, e sega sara ga.

8Au sa qai nanuma na nomuni yalololoma Turaga, kei na ka oni dau cakava e liu,

nioni dau vakacegui ira era vakanuinui vei kemuni, oni vakabulai ira vei ira na meca.

9Au sa qai kerekere cake yani vei kemuni e vuravura, au masulaka na vakabulai mai na mate.

10Au vakamamasu vua na Kalou na Tama ni noqu turaga me kua ni biuti yau e na gauna ni noqu leqa, e na gauna e sega kina na veivuke e na vorati ira na viavialevu.

11Au na dau vakacaucautaka tu ga na yacamuni, au na seretaki kemuni e na vakavinavinaka.

A rogoci na noqu masu,

12nioni a vakabulai yau mai na rusa, vueti yau mai na ca.

Au na vakavinavinaka gona vei kemuni, au na vakacaucautaki kemuni, au na vakalagilagia na yaca ni Turaga.

Vaqara na yalomatua

13Niu ase gone au se bera ni veilakoyaki voli, au a kerea sara ga na yalomatua e na noqu masu.

14Au kerei koya e mata ni valenisoro, au na vaqarai koya tiko ga me yacova na noqu mate.

15Mai na noqu gauna ni cauravou me yacova na noqu qase, au dau taleitaki koya,

au dau butuka na sala dodonu; mai na noqu gauna vakacauravou, au dau muria na mawena.

16Niu vakarorogo ga vakalailai vua, au kilai koya sara, mani levu kina na noqu kilaka.

17Au sa tubu vakalevu kina, au na vakalagilagi koya gona a solia vei yau na yalomatua.

18A lomaqu meu bula e na yalomatua, au mani gumatua e na caka vinaka, au na sega ni vakamaduataki.

19Au vala meu rawata na yalomatua, au qarauna matua me dodonu na noqu ivalavala.

Au dodoka i lomalagi na ligaqu e na masu, au tagicaka na noqu sega ni kilai koya.

20Au vagolea vua na yaloqu, au mani kunei koya e na noqu vakasavasavataki yau.

Au sa tubu e na kilaka mai na noqu sa kunei koya, e na sega gona ni biuti yau o koya.

21A gu na yaloqu meu qarai koya, sa dua sara kina noqu iyau vinaka.

22Sa solia vei yau na Turaga na isolisoli ni vosa me kequ isau, au na taurivaka meu vakacaucautaki koya kina.

23Ni toro mai vei yau o kemuni na sega ni vuli, ni curu e na noqu koronivuli.

24Na cava oni tukuna kina ni sega vei kemuni na ka qo, na cava sa rui karamaca kina na yalomuni?

25Au sa dolava na gusuqu, au sa kaya: ni taura na ka qo me nomuni, e sega ni saumi.

26Ni cola na ivua, ni tu vakarau moni vuli, sa voleka tu.

27Ni raica sara ga: au sega ni vuli sara vakaukaua, sa levu ga na noqu vakacegu.

28Moni sauma e levu na siliva e na vuli, oni na rawata kina e levu na koula.

29Me marautaka na yalomuni na loloma ni Turaga; moni kua ni vakamaduataki nioni vakacaucautaki koya.

30Ni cakava nomuni cakacaka ni bera na kena gauna, e na qai saumi kemuni na Kalou e na nona gauna.