1A qai sauma o Sofa na kai Neama, ka kaya,
2E sega beka ni dua me na sauma rawa na vosa lialia oqo?
Ena vakadodonutaka rawa beka e dua na tamata na levu ni vosa e cakava?
3O nanuma beka, Jope, ni keitou na sega ni sauma rawa na nomu vosa?
Me na vagalui keitou li na nomu vosa ni veivakalialiai?
4O suguraka tiko ni dina na ka o tukuna;
O qai tukuna ni o sega na nomu cala ena mata ni Kalou.
5Au diva ga me sauma sara ga vei iko na Kalou na nomu vosa!
6Ena tukuna vei iko ni vuku e vuqa tu na kena basoga;
Era tu na veika titobu ka dredre ni kila na tamata.
E lailai tiko na i totogi e solia vei iko na Kalou mai na ka e dodonu mo sotava.
7E rawa beka ni o bau raica na i yalayala ni vanua
E yaco kina na rogo levu ni Kalou kei na nona kaukauwa?
8Na macawa e cake e curu basikata o koya,
Ia o iko o sega sara ga ni bau yacova rawa.
E kila na Kalou na nodra vuravura na mate,
Ia na vuravura oqori o sega sara ni kila o iko.
9Na kilai levu ni Kalou e sivia na raraba ni vuravura,
Ka raraba cake mai na wasawasa.
10Ke vesuki iko ka veilewaitaki iko na Kalou,
O cei ena tarovi koya rawa?
11E kilai ira vinaka na Kalou na tamata sega na betedra;
Ka raica rawa na ca kecega era cakava.
12Kevaka sara era sa manoa na luve ni asa ni veikau ni ra
Sa qai sucu mai, era sa na qai yalomatua rawa na tamata lialia.
13Vakadodonutaka mada na lomamu, Jope.
Dodo liga yani vua na Kalou.
14Biuta tani na i valavala ca kei na ka cala mai na nomu vale.
15Ni oti oqori, mo qai tudei sara ka yalo qaqa
Mo veiqaravi tale kei na vuravura.
16Sa na qai seyavu na nomu leqa kecega mai na nomu nanuma,
Me vaka na dobui sa sivi ka guileca sara yani.
17Ena qai daumaka cake na nomu bula
Mai na rarama ni siga ena sigalevu tutu,
Ka na qai rarama mai me vaka na kida ni mataka
Na gauna ni oca kei na vakaloloma levu duadua ena nomu bula.
18O sa na qai tiko vakacegu ka sinai ena vakanuinui;
Ka sa qai viribaiti iko ka vakacegui iko na Kalou.
19O na sega ni rerevaka e dua na meca;
Ka na vuqa sara na tamata era na mai kere veivuke vei iko.
20Era sa na qai veiraiyaki tu na tamata ca ena nuiqawaqawa,
Ia era sa sega ni kunea na sala me ra dro rawa kina.
Na nodra i nuinui duadua ga sai koya me yaco mai o mate.
Who We AreWhat We EelieveWhat We Do
2025 by iamachristian.org,Inc All rights reserved.
