1Mataka cake sa vakarota o Oloferenesi nona mataivalu taucoko kei ira kece nona ito mera sa cavutu mera lai kabati Beculia, mera suguta na itabale kece, mera sa valuti Isireli.
2Sara cavutu kece na sotia e na siga ya, na kedra iwiliwili e 170,000 na sotia taubale, 12,000 na mataivalu vodo ose, salavata kei ira na ivalu usa iyaya, e dua dina na iwiliwili vakaitamera.
3Era keba e na buca volekati Beculia e yasa ni vure, na raba ni keba e roboti Docani me yaco sara i Balapaimi, kena balavu mai Beculia i Siamoni donumaki Esidrailoni.
4Nira sa raica na Isireli na kedra le levu, era sa domobula, era dui kaya, “O ira qo era na quruta vakadua na noda iteitei; na veiulunivanua, na veibuca kei na veidelana e na sega ni vakani ira rawa.”
51M 12.28,29Era sa qai dui ucu iyaragi; ni sa waqa na buka ni sikinala e na valeniyadra, era sa qai yadra e na bogi taucoko ya.
6E na ikarua ni siga, a liutaki ira mai na nona mataivalu ose o Oloferenesi e matadra na Isireli e Beculia,
7a dikeva na sala kece i na koro, taleva tale ga na medra vure, kovea, qai lesi ira e so na sotia mera yadrava tiko, sa qai suka tale vei ira nona mataivalu.
8Era sa qai lako mai vua na nodra tui na yavusa i Isoa kei na nodra iliuliu na Moapi kei na nodra vunivalu na kai baravi, ra mai kaya,
9“Ni rogoca saka mada e dua na vosa de qai druka nomuni mataivalu,
10ni o ira qo na Isireli era sega ni nuitaka duadua na moto, era nuitaka na cere ni veidelana era vakaitikotiko kina, ni kabakabai dredre sara na nodra ulunikoro.
11O koya saka gona, moni kua ni kabati ira vakaivalu, e na qai sega ni dua na lewe ni nomuni mataivalu e na bale.
12Moni tiko ga e na nomuni keba, ra tiko ga vei kemuni na nomuni mataivalu; o ira ga na nomuni italai, mera tawana na vure e ruku ni ulunivanua -
13ni qo na vanua era gunu kece kina na lewe i Beculia. Sana rawati ira ga na viagunu, era na qai solia na koro vei kemuni. O keimami kei ira na neimami, keimami na lai keba toka e veidelana voleka ga qo me keimami qarauna me kua ni dua e biuta na koro.
14Era na kawaboko mai e na viakana, na tagane, yalewa kei na gone. Se bera ni yaco vei ira na iselewau, era sana veidavori e na sala ni nodra koro.
15Oni sana saumi ira kina e na ca e na vuku ni nodra vorati kemuni, nodra sega ni via ciqomi kemuni e na yalovinaka.”
16Era marautaka na vosa qo o Oloferenesi kei ira kece na nona italai, sa mani lewa me vakina.
17Sa mani cavutu na mataivalu ni kai Amoni kei na le 5,000 na kai Asiria, ra lai keba e na buca; era sogota na vure ni medra wai na kai Isireli.
18O ira na luve i Isoa kei na luve i Amoni, era cabe i na veidelana donumaki Docani, ra lai keba kina; era talai ira e so na nodra i na ceva kei na tokalau vaka i Akarava volekati Juri e bati ni wai o Mokimuri. Na vo ni mataivalu ni Asiria era keba e na buca; era robota na vanua taucoko, ni yatuyatuni tu kina na valelaca kei na kareti usa iyaya, sega ni wili rawa na kedra levu.
19Era tagi na kai Isireli vua na Turaga na nodra Kalou, ni sa vuka na yalodra e na nodra sa virikovuti ira na meca, sega na dro bula.
20Sa tolusagavulukava na siga nodra kovuti ira na mataivalu taucoko ni Asiria, kena mataivalu taubale, qiqinivalu, kei na mataivalu vodo ose, me yacova ni sa maca kece na medra saqa na lewe i Beculia.
21Sa macamaca mai na medra toevu, e lailai tu ga na wai e veisiga ni maninitaki tiko.
22Era sa malumalumu na luvedra, era sa rebo na yalewa kei na cauravou e na viagunu, ra sa veibaleyaki e na tolonisala kei na matamata, sa oti sara ga vei ira.
23Era sa mani cabe vei Usia kei iratou na qase ni koro na lewenikoro taucoko, cauravou, yalewa kei na gone, era sa qai kaila e matadratou na qase kece,
24“Me lewa na Kalou se o cei e donu, o kemudou se keimami. Sa vakaleqai keda vakalevu nomudou bese ni soro vei ira na kai Asiria.
25Sa sega ni dua na noda ito qo. Na Kalou sa volitaki keda vei ira, eda sa mai tayana e matadra e na viagunu kei na vakaloloma levu.
26Dou kacivi ira mai, dou solia na koro taucoko mera yanaraka na ilala nei Oloferenesi kei ira kece na nona mataivalu.
27E vinaka cake mera vesuki keda, nida na bobula ga sega ni mate, era na sega tale ga ni mate na luveda lalai e matada se me cavuka na nodra icegu na noda veitinani.
28E beitaki kemudou tale ga o lomalagi kei vuravura kei na noda Kalou, na nodra Turaga na tamada, o koya e dau sauma na noda ivalavalaca kei na nodra ivalavalaca na tamada. Me na kua ni kuitataki keda vaqo nikua!”
29Sa qai tubu na veitagicaki levu e loma ni bose, era kaci domolevu vua na Turaga na Kalou.
30Qai kaya vei ira o Usia, “Ni yaloqaqa na wekaqu! Meda vosota tale mada me siga lima, sana qai lomani keda tale kina na Turaga na noda Kalou, ni na sega ni rawa ni biuti keda vakadua.
31Ia ke sa sivi e lima na siga se sega na veivuke, au na vakayacora na lomamuni.”
32Sa qai vakasukai ira mera dui qarava na nodra itavi e na bainivalu kei na valeniyadra. O ira na katikati a vakasukai ira i vale. Era sa lomabibi na lewenikoro.
Who We AreWhat We EelieveWhat We Do
2025 by iamachristian.org,Inc All rights reserved.
