1A qai sauma o Sofa, na kai Neama, ka kaya,
2I Jope, o sa vakayalocataki au.
Au sa sega ni tiko dei ni'u sa via sauma na veika o tukuna tiko.
3Na ka o sa tukuna oti sa dua na ka ni veibeci,
Ia au sa sega ni kila se me na saumi vakacava vei iko.
4Au vakabauta ni o sa kila tiko,
Ni a tekivu mai na gauna makawa sara,
5E sega ni sa bau dua mada na tamata ca me marau tiko vakadede.
6Ena tubu cake beka na nona rogo ka kilai me yaco ki macawa,
Se me mani rui cere na uluna me tara na veio,
7Ia ena cagina wale ga yani o koya me vaka na kuvu ni qele.
E ra na qai vakataroga o ira era a kilai koya e liu
Se sa lako kivei.
8 Ym 5.14 Ena yali ga yani o koya me vaka e dua na tadra,
Se na raivotu ena bogi,
Ka na sega ni qai raici tale vakadua.
9Sa na qai yali o koya mai na nona i tikotiko;
10Ka ratou na qai sosomitaka na luvena
Na veika sa butakoca o koya mai vei ira na dravudravua.
11Sa dau bulabula ka yavavala na yagodra eliu,
Ia e sega ga ni dede ni sa vuki me kuvu ni qele.
12E kana vinaka vua na i valavala ca ka vunia ena ruku ni yamena;
13Ka kubuta voli ga eso me dau diva voli kina na kena i kanakana.
14Ia ena loma ni nona davuibuco,
Sa la'ki vuki kina me gaga sara na kakana oqo,
Io, me vaka na gaga ni dua na wai ni mate gaga.
15Sa qai luaraka mai na tamata ca na i yau sa butakoca;
Ka sa taura lesu tale na Kalou,
Ka talaucaka talega mai na loma ni nona davuibuco.
16Na ka era sa tiloma na tamata ca sa vaka na wainimate gaga;
Sa vakamatei ira me vaka na i kata ni gata bati gaga.
17Ena sega ni bula tiko o koya me raica na uciwai ni waiwai olive,
Se na veiuciwai sa dave mai kina na sucu kei na oni.
18Sa kena dodonu me biuta laivi o koya na ka e buno kina;
Sa sega na gauna me marautaka kina na nona i yau;
19Baleta ni vakasaurarataki ira ka sega ni qaravi ira na dravudravua,
Ka kovea na veivale era a tara na tani.
20E sega ni vakamamautaki rawa na nona kocokoco.
21E sega sara ga ni vo e dua na ka ni sa kana o koya,
Ia oqo sa mai oti koto na nona tiko sautu.
22Ena gauna vinaka duadua sara ga ni nona rawa ka,
Ena qai vorolaki koya vakadua na bibi kecega ni tiko vakaloloma.
23Me vakalaivi tiko mada me kania na levu ni ka e vinakata!
Ena qai warumisa ni sa kuitataki koya na Kalou ena nona cudru kaukauwa.
24 Ym 5.17-23 Ni tovolea o koya me dro mai na i seleiwau kaukamea,
Ena qai lau gasau ena dua na gasau parasa.
25Ia ni sa ucu laivi mai yagona na gasau o ya,
Sa titiri tu na nona dra mai na matana taliva,
Ka sa qai yacovi koya e dua na rere levu.
26Na i yau kecega e a maroroya rawa tu sa qai vakarusai;
Ka sa qai vakamai o koya kei na nona vuvale
Ena dua a bukawaqa sa sega ni vakawaqara na tamata.
27Sa vakaraitaka o lomalagi na i valavala ca ni tamata oqo,
Ka sa soli i vakadinadina ni nona cala o vuravura.
28Ena qai vakarusai na nona i yau kecega
Ena dobui levu ni cudru ni Kalou.
29Oqo na nodra i tinitini na tamata ca,
Na i tinitini sa lesia vei ira na Kalou.
Who We AreWhat We EelieveWhat We Do
2025 by iamachristian.org,Inc All rights reserved.
