1E na ika172 ni yabaki, a vakasoqoni ira kina nona mataivalu o Demetirio na tui, era cavutu i Mitia mera kere ivalu me valuti o Tirifo.
2Ni sa rogoca o Arasake Tui Peresia kei Mitia ni sa curubotea nona vanua o Demetirio, a tala e dua nona turaganivalu me lai vesuki koya mai.
3A lai vakadruka na mataivalu nei Demetirio, tauri koya, kauti koya vei Arasake, mani lewa o Arasake me yadravi tu.
4Sa cegu na vanua o Juta e na gauna kece ni veiliutaki nei Saimoni.
A saga tu ga me vinaka nona matanitu,
a taleitaki nona veiliutaki,
rokovi e na veisiga ni nona bula.
5Qai kena ilutua na nona tauri Jopa me ikelekele ni waqa,
mani dola kina na sala i veiyanuyanu.
6A tosoya na iyalayala ni nona vanua,
qai nona taudua na lewa ni vanua.
7A soqoni ira e levu na bobula,
a veiliutaki e Qasara, Becisuri kei na koronivalu e Jerusalemi,
qai savata laivi na kena dukadukali;
a sega ni dua me saqati koya.
8Era teitei e na vakacegu;
e vuavuai vinaka na qele kei na kau vuata e na buca.
9Era dadabe e gaunisala na qase,
era veitalanoataka na ka vivinaka;
na cauravou era vakaisulu e na iukuuku ni ivalu.
10A soli kedra na veikoro,
kei na iyaragi ni tataqomaki,
me yacova ni sa roboti vuravura na kena irogorogo.
11A vakasaututaka na vanua,
ra marau vakalevu na kai Isireli.
12Era dui dabe e ruku ni nodra vu ni vaini kei na vu ni lolo,
e sega ni dua e vakarerei ira.
13E sega tale ni dua e vo me valuti ira,
era sa qaqiraki kece na tui e na gauna ya.
14A vueti ira kece na nona era malumalumu;
a tutaka na lawa,
kauti ira laivi kece na dau beca, kei ira na tamata ca.
15A ukutaka na loqi tabu,
Qai kuria na kena iyaya tabu.
16Ni sa rogo i Roma, rogo sara i Sipata ni sa mate o Jonacani, era sa rarawa vakalevu.
17Nira sa rogoca ni o Saimoni na tuakana sa sosomitaki koya me betelevu, ni sa liutaka tu na vanua kei na kena veikoro,
181M 8.22era volavola vua e na ivola parasa mera lesuva na veiwekani kei na tovata era se bukia e na gauna nei Jutasa kei Jonacani na tacina.
19Sa qai wiliki e matadra na lewe i Jerusalemi.
20Qo na ilavelave ni ivola era vakauta na kai Sipata: “O keimami na iliuliu kei na lewenikoro o Sipata, vei Saimoni na betelevu kei kemuni na qase kei na bete ni yavusa Jiu, na weka i keimami, ni bula vinaka.
21Erau sa mai tukuna na nomuni mata, na nomuni lagilagi kei na rokovi; keimami marautaka nodrau tadu mai.
22Na nodrau itukutuku keimami sa vola e na neimami ivola itukutuku, vaqo: ‘O Numenio na luve i Adioko kei Adipatere na luve i Jesoni, nodra mata na Jiu, erau sa mai vakalesuva nodra veiwekani kei keimami.
23E ka ni marau vei ira na neimami, na ciqomi rau e na vakarokoroko, me keimami maroroya tale ga na ilavelave ni nodrau itukutuku e na tabana ni ivola maroroi, me tu ga kina vei keimami na lewe i Sipata. Era sa vakauta tale ga e dua na kena ilavelave vei Saimoni na betelevu.’ ”
24Ni oti qo, sa talai Numenio i Roma o Saimoni me kauta e dua na isasabai koula levu, kena bibi e 1,000 na mina, me ivakadei ni nodra tovata kei Roma.
25Nira sa rogoca na lewenivanua na ka qo, era sa kaya, “Eda na vakavinavinaka rawa vakacava vei Saimoni kei iratou na luvena”,
26niratou sa tudei na veitacini, vakina o ira na kawa i tamadratou, era sa vorati ira na meca kei Isireli, sa mani galala vakadua kina.
27Era mani volaitukutukutaka e na vatu parasa, qai vakabira e na duru e dela i Saioni.
Qo na ka era vola: “E na ika18 ni siga i Eluli, e na ika172 ni yabaki, na ikatolu ni yabaki nei Saimoni na betelevu,
28e Asaramela, e matadra na lewe ni matabose ni bete, lewenivanua, veiliutaki vakamatanitu kei na qase ni vanua, qo na ka e kacivaki mai.
29“Me vaka ni dau tubu vakalevu na ivalu e na vanua, o Saimoni luve i Matacayasi, dua na bete luve i Joarivi, kei iratou na tacina, eratou bolemate e na vorati ira na meca ni nodratou vanua me taqomaki kina na vale tabu kei na lawa; eratou vu ni lagilagi ni nodratou vanua.
30A soqoni ira na lewenivanua o Jonacani, yaco me nodra betelevu me yacova ni mate.
31Nira sa lewa na meca mera kabakoro mai mera vakatara na vale tabu,
32sa tu o Saimoni me valataka na nona vanua. E vakayagataka e levu nona ilavo me ivoli ni iyaragi, kei na kedra isau na mataivalu.
33A viribaita na veikoro e Jutia kei Becisuri e na iyalayala kei Jutia, na vanua a maroroi tu kina e liu na iyaragi ni meca, qai lesia kina e dua na matayadra kai Jiu.
34A viribaiti Jopa tale ga e bati ni waitui, kei Qasara e na iyalayala kei Asoto, nodra itikotiko na meca e liu. A vakatikori ira kina na Jiu, qai vakacokotaki ira.
35“Era sa raica na lewenivanua na yalodina nei Saimoni kei na dei ni yalona me sa lagilagi nona matanitu, era mani buli koya me iliuliu, betelevu, baleta na nona vakayacora na ka kece qo, kei na nona lewa dodonu kei na yalodina e na vuku ni nona vanua. A dau saga e na levu na sala mera vakacerecerei na kainona.
36A sautu kina na vanua e na nona gauna; era cemuri na kaitani, kei ira na tawana tu na koro nei Tevita o Jerusalemi. O ira qo era a tara tu na koronivalu levu ra dau veicicivi mai kina mera vakadukadukalitaka na vale tabu kei na vanua e volekata ra mani vakaseva kina na kena savasava.
37A vakatikori ira kina na Jiu, viribaita me maroroi kina na vanua kei na koro, kuria na cere ni bai kei Jerusalemi.
38“E na vuku ni veika qo, sa vakadeitaka kina o Tui Demetirio na nona betelevu,
39buli koya me iTokani ni Tui, a rokovi koya vakalevu.
40Sa rogoca nira sa wiliki ira na Jiu na kai Roma mera nodra itokani, tovata, wekadra, era sa ciqomi rau tale ga na mata nei Saimoni e na vakarokoroko.
41Era sa duavata na Jiu kei na nodra bete me sa nodra iliuliu, betelevu tawamudu o Saimoni, me yacova ni sa tu e dua na parofita nuitaki,
42me kovana, me liuliu ni vale tabu, me lesi ira na kena ilesilesi, me lewa na vanua, na iyaragi kei na koronivalu,
43mera vakarorogo kece vua na lewenivanua, me volai e na yacana na konitaraki kece ni vanua, me vakaisulu lokaloka, vakaiukuuku koula.
44“Me tabu ni dua na lewenivanua se bete me beca nona lewa, se saqata nona vosa, se me veisoqoni vakailoa se me vakaisulu lokaloka se vakabakala koula.
45O koya e beca na lewa qo se vakawalena, e na totogitaki.”
46Era sa vakadonuya kece na tamata me vakatarai vei Saimoni me vakatulewa me vaka na lewa qo.
47Sa ciqoma o Saimoni, sa vakadonuya me betelevu, me vunivalu, me iliuliu ni Jiu kei na bete, me nodra liga ni dauveitaqomaki kece.
48Era sa qai vakarota me ceuti e na vatu parasa na lewa qo, me na toka e na dua na vanua laurai levu e na lomanibai ni vale tabu,
49me maroroi tale ga na kena ilavelave e na vale ni iyau meratou rawa ni dau mai raica o Saimoni kei iratou na luvena.
Who We AreWhat We EelieveWhat We Do
2025 by iamachristian.org,Inc All rights reserved.
