Siraki 48 - Vakavakadewa Vou kei na iVola tale eso（FNVDC12）

Ilaija

1 1Tui 17.1-24; 18.38; 19.15,16; 2Tui 1.10-16; 2.11; Mala 4.5,6 Sa qai vura na parofita o Ilaija vaka na buka, veivakamai nona vosa vaka na dudunibuka.

2A vakasobura na dausiga vei ira na tamata, vu ni nodra lewe lailai na nona gumatua.

3E na vosa ni Turaga, a sogota kina na lomalagi, vakalutuka vakatolu mai kina na bukawaqa.

4O sa lagilagi dina, Ilaija, e na nomu cakacaka talei. O cei tale e rawa ni sakitaka nona cakacaka me vakataki iko?

5O sa vakabula tale na mate mai Etesi e na vosa nei koya na Cecere Sara.

6O yaviti ira mate na tui, ceburaki ira na tamata rogo mai na nodra imocemoce.

7O rogo vosa ni veivakadodonutaki mai Sainai, rogoca mai Orevi na lewa me saumi na ca;

8O lumuti ira na tui mera vakatauca nomuni cudru, digitaki ira na parofita mera sosomitaki iko.

9O iko o a kau cake e na cagiviko bukawaqa, e na qiqi kei na ose bukawaqa.

10O iko e volai tu nio tu vakarau e na gauna lokuci mo vakamalumutaka na cudru ni Kalou ni bera ni kacabote,

mo vagolea na loma nei tama vei luvena, mo vakadeitaka tale na yavusa i Jekope.

11Era na kalougata na raici iko nio lesu mai, o ira tale ga era na mate e na veilomani, ni o keimami tale ga keimami na bula.

Ilaisa

12 2Tui 2.9,13 O Ilaija a ubi koya na cagiviko, o Ilaisa a vakasinaiti e na yalona;

a sega ni rerevaka kina na iliuliu se me lewai koya e dua.

13 2Tui 13.20,21 A sega ni dua na ka e dredre vua; ni sa mate, ase parofisai ga na yagona.

14A cakacaka mana ni se bula, cakacaka mana tale ga ni sa mate.

15 2Tui 18.11,12 Era sega ga ni veivutuni kina na tamata, sega ni besetaka nodra ivalavalaca,

me yacova nira sa kau vakabobula mai na nodra vanua mera veituyaki e na dela i vuravura.

Era sa lewe lailai sara kina na vo, ia nodra iliuliu tiko ga e dua vei ira na kawa i Tevita.

16E so vei ira era vakayacora na ka e vinaka vua na Turaga, e so era binia tu na ivalavalaca.

Esekaia

17 2Tui 20.20 A viribaita nona koro o Esekaia, vakadrodroya mai kina na wai;

a taya e na kaukamea na sala ni wai e na vatu, bulia na kena tobu me maroroi kina.

18 2Tui 18.13-17 A kabata na koro o Senakerivi e na nona gauna, tala yani na Ravisake;

a dulaka na ligana vei Saioni, vosa bolebole e na nona qaciqacia.

19Era sa qai rere, sautaninini na lewenikoro, era sa vutugu vaka na yalewa taratara.

20 2Tui 19.15-20,35 Ia era sa kaci vua na Turaga e dauloloma, ra dodoka yani vua na ligadra;

e totolo sara nona rogoci ira mai lomalagi na Yalosavasava, talai Aisea me vakabulai ira.

21A ravuta nodra keba na kai Asiria na Turaga, vakawabokotaki ira nona yagilosi,

22ni vakayacora o Esekaia na ka e vinaka vua na Turaga, kabita matua na ivakarau nei Tevita na tamana

me vaka a vakarota na parofita o Aisea, ni dau dina nona rai.

23 2Tui 20.10,11 E na nona gauna a suka na matanisiga; a vakabalavutaka na bula ni tui.

24E na yalo ni qaqa, a raica kina na veika mai muri, mani vakacegui ira kina na lolosi tiko e Saioni.

25A vakaraitaka na ka e na yaco me yacova ni cava na gauna, kei na veika vuni ni bera ni yaco.