1Era sa tabalaka cake e dua na kaila vakadomoilevu na lewenivanua taucoko; ka ra veitagicaki na tamata ena bogi o ya.
2Era sa vosa kudrukudru baleti rau o Mosese kei Eroni o ira kecega na Isireli; ka ra sa kaya vei rau na lewenivanua taucoko, “Oilei! E a vinaka cake kevaka eda a mate ga mai na vanua o Ijipita! Se me da mate ga ena vanua lala oqo!
3Ena vuku ni cava sa kauti keda mai kina o Jiova ki na vanua oqo, me da mai vakamatei ena i seleiwau? Era na mai mate wale o ira na watida kei ira na luveda; ena sega li ni vinaka cake me da lesu tale ki Ijipita?”
4Era sa veikayaka vakai ira, “Me da lesia e dua na noda i liuliu ka lesu tale i Ijipita.”
5E rau sa qai cuva vakatoboicu o Mosese kei Eroni e matadra taucoko na lewenivanua ni Isireli.
6Sa qai dresulaka na nodrau i sulu me vakaraitaka na nodrau rarawa levu o Josua na luve i Nuni kei Kelevi na luve i Jifune, e rua vei ira na yamata ka la'ki rai vanua,
7ka rau sa vosa vei ira na lewenivanua taucoko ni Isireli, ka kaya, “Sa vanua vinaka dina na vanua keimami sa lakova ka la'ki butuka.
8Kevaka sa marautaki keda o Jiova, ena kauti keda o koya ki na vanua oqo, ka na solia vei keda me noda na vanua sa dave kina na sucu kei na oni.
9Ia mo ni kakua ga ni talaidredre vei Jiova; ni kakua talega ni rerevaki ira na lewenivanua o ya; era sa keda madrai ga. Eda na kabai ira vakarawarawa. Sa tiko kei keda o Jiova, ka sa vakadrukai ira oti na veikalou eso era sa dau taqomaki ira; mo ni kakua kina ni rere.”Ipe 3.16
10Era sa qai tukuna na lewenivanua taucoko me rau vakaviriki ena vatu, ia sa qai basika vakasauri mai na rarama ni serau i Jiova ena dela ni Vale ni Veitavaki, ka ra sa raica tu yani na tamata.
Sa Masulaki Ira na Tamata o Mosese11A sa kaya vei Mosese o Jiova, “A cava tale beka na dede ni gauna era na besetaki au tikoga kina o ira na tamata oqo? A cava beka li na kena dede era na bese tikoga kina ni vakabauti au, ka dina ga ni'u sa kitaka oti e vuqa na veicakacaka mana ena kedra maliwa?
12Au na vakatala yani e dua na mate levu, ka vakarusai ira; ia au na vakaturi iko cake mo matanitu levu ka kaukauwa cake mai vei ira.”
13Ia, sa tukuna o Mosese kivei Jiova, “O ni sa kauti ira tani mai Ijipita na lewenivanua oqo ena nomuni kaukauwa. Ena gauna era na qai rogoca kina na kai Ijipita na veika o ni sa cakava oqo vei ira na nomuni tamata,Lako 32.11-14
14era na qai talanoataka vei ira na tamata era bula voli ena vanua oqo. O ira na tamata oqo era sa rogoca oti ni o kemuni Jiova sa tiko kei keimami, ka sa vakatakilai na nomuni tiko ni sa rairai mai na nomuni o ena delai keimami, ka o ni sa liutaka tiko na neimami lakolako mai na nomuni duru o ena siga kei na duru bukawaqa ena bogi.
15Kevaka o ni sa vakamatei ira na tamata oqo me vaka era sa lewe dua ga na tamata, a cava era na qai kaya o ira na veimatanitu ka ra sa rogoca na kemuni i rogorogo, ka kaya,
16‘Ena vuku ni sa sega ni kauti ira rawa na tamata oqo o Jiova ki na vanua ka sa bubuluitaka oti me solia vei ira, sa qai vakamatei ira kina vakaoqo o koya ena vanua lala.’
17Ia oqo, au sa vakamasuti kemuni mo ni vakaraitaka na nomuni kaukauwa ka vakayacora na veika o ni sa yalataka, ena nomuni a kaya,
18‘Sa dau berabera ni cudru o Jiova, ka sa sinai sara na nona yalololoma, ka sa dauvosota na caka cala kei na talaidredre. Ia, au sa sega ga ni vakalaiva me ra sega ni cudruvi na tamata ca, kau na cudruvaka na nodra caka ca na qase vei ira na luvedra kei na makubudra, ka yacova yani na i katolu kei na kava ni tabatamata.’Lako 20.5-6; 34.6-7; Vrua 5.9-10; 7.9-10
19Au sa vakamasuti kemuni mo ni vosoti ira na tamata oqo ena vuku ni nodra caka cala, me vaka na cecere ni nomuni loloma sa tudei, me vaka talega na nomuni sa vosoti ira tiko me vakatekivu mai Ijipita ka yacova mai na siga edaidai.”
20Sa qai kaya o Jiova “Au sa vosoti ira, me vaka na nomu vosa.
21Ia au sa yalataka oqo me vaka ni'u sa bula, ka me vaka ni sa roboti vuravura na noqu i serau,Ipe 3.18
22ena sega sara ni dua vei ira na tamata oqo me na bula tiko me yacova na vanua yalataki. Era sa raica na noqu i serau kei na cakacaka mana ka'u sa kitaka mai Ijipita kei na loma ni vanua lala; ia era sa vakatovolea na noqu dauvosota voli ena vuqa sara na gauna, ka ra sa sega ni vakarorogo ki na noqu vosa.
23Era na sega sara ni butuka na vanua ka'u sa bubului kina me'u solia vei ira na nodra qase. Ena sega sara ni dua vei ira ka besetaki au me na butuka na vanua o ya.
24Ia me vaka ni sa duatani na yalo i Kelevi na noqu tamata, ni sa muri au tikoga ena yalona taucoko, ka'u na kauti koya ki na vanua ka sa la'ki butuka, ka ra na taukena talega o ira na nona kawa.
25Ia oqo me vaka ni ra tiko ena vanua buca o ira na Amalekaiti kei ira na kai Kenani, mo ni lesu yani ni mataka, ka lako ki na vanua lala ena sala vaka ki na Wasa Damudamu.”
Veitotogitaki na Kalou ena Vuku ni Vosa Kudrukudru26Sa qai vosa vei rau o Mosese kei Eroni o Jiova, ka tukuna,
27“Ena vakaevei li na dede ni gauna me ra kudruvaki au tikoga kina o ira na mataqali tamata ca vakaoqo? Au sa oca na rogoca tiko na nodra didivaki au, ka ra sa daukudruvaki au vakaca.
28Mo drau tukuna oqo vei ira: “Me vaka ni'u sa bula, au na vakayacora vakaidina vei kemuni na veika sara ga au rogoca ni rogo tiko ena kemuni maliwa.
29O ni na vakaleqai kece ka veibiuyaki na yagomuni mate ena vanua lala oqo. Me vaka ni kemuni sa vosa kudrukudrutaki au, ena sega sara ni dua vei kemuni e sivia na yabaki ruasagavulu na dede ni nona bula me butuka yani na vanua yalataki.Ipe 3.17
30Au a yalataka mo ni la'ki bula kece ena vanua o ya, ia sa sega ni yaco vakakina oqo vei kemuni, ka vakavo ga o rau o Kelevi na luve i Jifune kei Josua na luve i Nuni.
31O ni kaya ni ra na tauri vakavesu o ira na luvemudou lalai, ia au na kauti ira yani ki na vanua o ni sa besetaka, ka biuti ira kina me nodra i tikotiko.
32Ia o kemuni, ena bale sobu na yagomuni mate ena vanua lala oqo.
33O ira na luvemuni era na vakatawa sipi voli ena vanua lala me yabaki vasagavulu, ka ra na kune rarawa ena vuku ni nomuni sega ni yalodina, me yacova sara ni sa mate na i otioti ni tamata vei kemuni.Caka 7.36
34O ni na sotava na i sau ni nomuni valavala ca me vasagavulu na yabaki, me tau yadua na yabaki na veivasagavulu na siga kece sara o ni a la'ki vakadikeva kina na vanua o Kenani. O ni na kila kina na i balebale ni noqu cudruvi kemuni!
35Sai au oqo, o Jiova, ka'u sa tukuna oti ni'u na vakayacora oqo vei kemuni na yavu tamata ca ni o ni sa soqoni vata mai ka saqati au. O ni na mate taucoko sara ena loma ni vanua lala oqo.”
36O ira na tamata ka talai ira yani o Mosese me ra la'ki rai vanua, oqo o ira ka vakavuna me ra vosa kudrukudru na lewenivanua taucoko ena vuku ni kena rui ca na nodra i tukutuku baleta na vanua vou,
37sa o ira kece oqo ka kauta mai na i tukutuku ca era sa ciba kecega mai na mate dewa levu ena mata i Jiova.
38Ia e rau sa bula ga o Josua na luve i Nuni, kei Kelevi na luve i Jifune mai vei ira na tamata era sa talai me ra la'ki rai vanua.
Ai Matai ni Sasaga me Rawai o Kenani(Vrua 1.41-46)39Ni sa vakaraitaka o Mosese vei ira kecega na Isireli na veika sa tukuna o Jiova, era sa tagi vakadomoilevu na lewenivanua.
40Ena mataka caca ni siga tarava, era sa sou yani me ra la'ki valuta na vanua veidelana, ni ra sa kaya, “Raica, sai keimami oqo. Keimami sa na cabeta cake na vanua sa yalataka o Jiova, baleta ni keimami sa vakadinadinataka na neimami cala.”
41Ia sa kaya o Mosese, “A cava na vuna o ni talaidredre tikoga kina vei Jiova me yacova mai na gauna oqo? O ni na sega sara ni rawata!
42Mo ni kakua ni lako cake, de ra qai samuti kemuni mai o ira na kemuni meca, ni sa sega ni tiko vata kei kemuni o Jiova.
43Ena gauna sa sotavi kemuni kina mai kea o ira na Amalekaiti kei ira na kai Kenani, o ni na mate ena i valu; sa sega ni tiko vata kei kemuni o Jiova baleta ni o ni sa sega ni via muri koya.”
44Ia era sa domoqa ga ka cabeta cake na vanua veidelana, ka dina ga ni sega ni lako vata kei ira na Kato ni Veiyalayalati se o Mosese.
45Era sa qai siro sobu mai na Amalekaiti kei ira na kai Kenani era tiko e kea ka valuti ira na tamata domoqa oqo, ka vakamalumalumutaki ira, ka cemuri ira sobu me yaco sara ki Orima.
Who We AreWhat We EelieveWhat We Do
2025 by iamachristian.org,Inc All rights reserved.
