Siraki 39 - Vakavakadewa Vou kei na iVola tale eso（FNVDC12）

1Ia e duidui o koya e vulica na lawa nei Koya na Cecere Sara.

E na qara na nodra yalomatua na qase, kacivaka na parofisai.

2E na katona na nodra ivosavosa na tamata rogo, e na matata vua na ibalebale ni vosa vakatautauvata.

3E na qara na ibalebale vuni ni vosa vakaibalebale, e na matau vua na ibalebale buawa ni vosa vakatautauvata.

4E na qaravi ira na tamata rogo, tu e matadra na veiliutaki;

e na veilakoyaki i vanua tani, ni kila kina na tamata vinaka kei na tamata ca.

5E na dau yadra vakamataka me qara na Turaga a buli koya, e na vakamamasu vua na Cecere Sara;

e na dolava na gusuna e na masu, kerea me vosoti na nona ivalavalaca.

6Ke lomana na Turaga levu, e na vakasinaiti e na yalo ni kilaka;

e na vakasavuya na vosa yalomatua, vakavinavinaka vua na Turaga e na masu.

7E na vakanaulu vakadodonu na nona ivakasala kei na kilaka, e na vakasamataka na veika vuni ni Kalou.

8E na macala na nona vuku e na nona veituberi, e na nona isakisaki na lawa ni veiyalayalati ni Turaga.

9E lewe levu era na qoroya na nona kilaka, e na sega ni taqusi rawa;

e na sega ni mudu na kena nanumi, e na dei tu na yacana e na veitabagauna.

10Era na tusanaka na veimatanitu na nona yalomatua, era na vakacaucautaki koya na ivavakoso;

11Ke bula dede, na irogorogo e na laiva tu mai, e na levu cake mai na lewe dua na udolu; ke sa mani vakacegu koso, sa rauti koya vinaka ya.

Sere ni vakacerecerei vua na Kalou

12E tu tale e levu na noqu vakasama meu tukuna, au sinai tu me vaka na vula ni coko.

13Ni rogoci yau mada o kemuni na luvequ yalododonu moni se me vaka na rosi e tubu e bati ni wai.

14Moni boi yawa vaka na mira, moni se vaka na lili.

Me tete na kemuni iboi vinaka, moni lagata na sere ni veivakacaucautaki: ni vakacaucautaka na Turaga e na nona cakacaka kece;

15ni vakalagilagia na yacana, ni vakavinavinaka vua

e na veivakacaucautaki e na sere kei na ivakatagi vakawa; qo na ka mo tukuna e na vakavinavinaka:

16“Na ka kece e vinaka sara, e cakacaka ni Turaga; na ka kece e vakarota, e na vakayacori e na nona gauna.”

17E sega ni dua e rawa ni kaya, “Na cava qo?” “Na cava e vaka kina qori?”, ni na qai matata na ka kece e na gauna ni Kalou.

A tu vakadua na wai e na nona vosa, na wai titobu e na icegu mai gusuna.

18E na nona ivakaro ga, sa caka kina na veika kece e vinakata, e sega ni dua me yalana rawa na nona kaukaua veivakabulai.

19E raica na cakacaka kece ni tamata, e sega na ka e vunitaki e matana.

20E raica na veika taucoko mai na ivakatekivu i na ivakataotioti, e sega ni dua na ka e kurabuitaka.

21E sega ni dua e rawa ni kaya, “Na cava qo?” “Na cava e vaka kina qori?”, ni sa dui tu na kena yaga na veika kece e buli.

22Na nona veivakalougatataki e drodrova na vanua mamaca vaka na uciwai, vakasuasuataka vaka na waluvu.

23Era na vakila na veivanua na nona cudru me vaka ga nona vukica na waidrodro me waitui.

24Nona ivakarau e dodonu vei ira na yalosavasava, ia vei ira na tamata ca e nodra itatarabe.

25E na ivakatekivu a buli na veika vinaka me baleti ira na tamata vinaka, na veika ca me baleti ira na tamata ca.

26Na veika e yaga duadua e na bula ni tamata na wai, buka, kaukamea, masima,

falawa, sucu, oni, waini, waiwai kei na isulu.

27Na veika qo e vinaka vei ira na tamata vinaka, e vuki me ca vei ira na tamata ca.

28A buli na cagi e so me veikanakuitataki; e na kedra warumisa, era vakacaca vakalevu.

E na gauna ni lewa era na ravuravu e na kedra kaukaua taucoko me na maravu kina na cudru nei koya a bulia.

29Na buka, ucacevata, viakana kei na matetaka era buli mera veitotogitaki.

30Na bati ni manumanu kila, na batibasaga, na gata kei na isele era totogitaka na tamata ca me mate;

31era na marau e na nona ivakaro, era sa tu rawa e vuravura mera waraka nodra itavi; ni sa yaco mai na nodra gauna, era na sega ni beca na nona vosa.

32Au sa kila gona mai na ivakatekivu na ka qo, au sa vakasamataka mani vola:

33Na cakacaka ni Turaga era vinaka kece, e na walia na leqa kece e na kena gauna.

34E sega ni dua e rawa ni kaya, “Qo e ca, e vinaka ya”, ni vinaka kece na ka e na kena gauna.

35O koya gona moni sa lagata e na yalomuni kei na domomuni taucoko na sere ni veivakacaucautaki, moni vakacerecerea na yaca ni Turaga.