1A sa kaya vei Jeremaia, na Turaga o Jiova, na nodra Kalou na Isireli,
2“Mo vola ena dua na i vola na veika kece sara au a tukuna vei iko,
3baleta ni na yaco mai na gauna au na kauti ira lesu tale kina na noqu tamata, na Isireli kei Juta. Au na kauti ira lesu tale mai ki na vanua au a solia vei ira na nodra qase me ra taukena tale.”
4A sa kaya o Jiova me baleti Isireli kei Juta:
5“Au sa rogoca e dua na tagi ni domobula,
E dua na tagi ni rere ka sega ni tagi ni sautu.
6Tu mada vakadua ka vakasamataka!
E rawa li me vakasucuma na tagane
E dua na gone?
A cava au raica kina
Ni ra dui biuta tu na tagane yadua
Na ligadra e ketedra?
Me vaka e dua na yalewa sa taratara?
A cava sa vulaci kecega kina na matadra?
7E dua na siga rerevaki ena yaco mai;
Ena sega tale ni dua na siga
Me na vakatauvatani kaya.
Ena dua na gauna ni rarawa
Vei ira na kawa i Jekope;
Ia era na bula tikoga.”
8A sa kaya na Turaga o Jiova ni lewevuqa, “Ni sa na yaco mai na siga o ya, au na qai musuka na i vua mai na domodra ka biuta laivi na sinucodo ka ra sa na sega tale ni bobula vei ira na kai tani.
9Ia era sa na qarava ga na Turaga na nodra Kalou kei Tevita na nodra tui o koya au na solia vei ira.
10Kemuni na kawa i Jekope na noqu dauveiqaravi,
Ni kakua ni rere, kemuni na Isireli,
Ni kakua ni yalo lailai.
Au na sereki kemuni mai na vanua yawa o ya,
Mai na vanua o ni a vakabobulataki kina.
Era na lesu tale mai na kawa i Jekope
Ka mai tiko sautu;
Era na galala
Ka sega ni dua me vakarerei ira.”
11Au na tiko kei kemuni
Me'u vakabulai kemuni.
Au na vakarusai ira
Na veimatanitu kecega
Ka'u a vakasavi kemuni kina;
Ia au na sega ni vakarusai kemuni.
Au na sega ni laivi kemuni
Mo ni kakua ni totogi;
Ia ni'u na totogitaki kemuni
Ena vakarauta ga.
Ni sai Jiova ga sa kaya oqo.”
12A sa kaya o Jiova vei ira na nona tamata,
“Sa sega ni vakaoti rawa na nomuni mosi,
Ka sa sega ni mavo rawa na nomuni mavoa.
13Sa sega ni dua me qaravi kemuni rawa vakavinaka,
Ka sa sega na i sui ni mavoa me yaga,
Sa sega talega ni rawa ni o ni bula.
14O ira kece era domoni kemuni
Era sa guilecavi kemuni,
Era sa sega tale ni kauwaitaki kemuni.
Au ravuti kemuni me vaka na meca
Ka sa bibi sara na kemuni totogi,
Baleta ni sa rui levu na nomuni i valavala ca,
A ka vakaitamera na nomuni dukadukali.
15Ni kakua tale ni vosa kudrukudru
Me baleta na nomuni vakararawataki;
Sa sega ni malumu rawa
Na nomuni vutu.
Au na totogitaki kemuni vakaoqo
Baleta ni sa rui levu na nomuni i valavala ca
Ka vakaitamera na nomuni dukadukali.
16O ira kece era tilomi kemuni
Era na tilomi,
Ka kau tani kece vakabobula na kemuni meca.
O ira kece era vakacacani kemuni
Era na vakacacani,
O ira kece era tokitaki kemuni era na tokitaki.
17Au na vakabulai kemuni tale,
Au na vakaotia na nomuni vakararawataki,
E dina era na kaya na kemuni meca,
‘Sa biu laivi tu o Saioni,
Sa sega e dua me kauwaitaka.’
18A sa kaya tale o Jiova:
“Au na vakasukai ira lesu tale
Na kawa i Jekope
Ki na nodra vanua,
Ka na sobuta na noqu loloma na veivuvale yadua.
Ena tawa tale na veikoro kece,
Ka vakavoui tale na veivale kecega.
19Era na sere ena vakavinavinaka na tiko kina;
Ka ra na kaila ena marau.
Au na vakalevutaka na kedra i wiliwili,
Ka vakavuna me ra dokai.
20O ira na luvedra
Era na vakataki ira tale e liu,
Ka ra na vakataudeitaki tale
Na nodra i soqosoqo e mataqu;
Au na totogitaki ira kece era vakacacani ira.
21Ena nodra tui
E dua ga vei ira mai na nodra matanitu,
Ka nodra turaga me kovana i liuliu
E dua ga vei ira.
Ni'u na sureti ka vakauqeti koya
Ena toro voleka mai;
Ka na sega ena via lako mai
Ni sega ni sureti se vakauqeti.
22Era na qai noqu tamata
Ka'u na nodra Kalou.
Sa i au ga o Jiova sa kaya vakaoqo.”
23Raica sa liwa mai na cava ni Turaga, sa lako mai na cudru, e dua na cagilaba kaukauwa, ka na tabaka na uluna na tamata ca.
24Ena sega ni suka wale na cudru waqawaqa ni Turaga. Me yacova ni sa vakayacora ka vakaotia sara na ka e talai kina, era na qai kila vinaka na tamata na veika oqo e muri,” sa kaya o Jiova.
Who We AreWhat We EelieveWhat We Do
2025 by iamachristian.org,Inc All rights reserved.
