Vunau ni Soro 14 - Vakavakadewa Vou kei na iVola tale eso（FNVDC12）

Veivakasavasavataki ni Oti na Mate ni Kuli

1A sa vosa vei Mosese o Jiova, ka kaya:

2Oqo na i vakaro me baleta na tamata e tauvi koya na mate ni kuli rerevaki ka sa vakabulai mai na mate oqo. Ena siga me sa vakasavasavataki kina, me qai kau mai o koya vua na bete;Maciu 8.4; Mari 1.44; Luke 5.14; 17.14

3ia me kauti koya yani ki na taudaku ni i tikotiko na bete, ka me dikevi koya mai kea. Kevaka sa bula mai na mate na tamata o ya,

4me qai vakarota na bete me kau mai ena vukuna sa la'ki vakasavasavataki e rua na manumanu vuka sa savasava, e dua na tiki ni kau sitari, na wa damudamu kei na isopi.

5Me vakarota na bete me vakamatei e dua vei rau na manumanu ena kuro qele sa tawa tu ena wai mai na wai drodro.

6Me taura na bete na i karua ni manumanu bula, ka tonia vata kei na kau sitari, kei na wa damudamu, kei na isopi e loma ni beseni sa tu kina na nona dra na i matai ni manumanu sa vakamatei.

7O koya na bete me qai kureitaka vakavitu vua sa la'ki vakasavasavataki mai na mate ca ni kuli ka vakaroti koya ni sa savasava, ka qai laiva na manumanu bula me vuka yani ki na vanua lala.

8Ia o koya sa mai vakasavasavataki me savata na nona i sulu, ka toroya laivi taucoko na drauniuluna, ka sili ena wai; ena qai savasava kina. Ni sa oti o ya, me qai lako mai ki loma ni tikotiko, ia me kakua ni curuma mada na nona valelaca me siga vitu tale.

9Ia ena i kavitu ni siga, me toroya laivi kece tale na drauniuluna, na kumina, kei na vacuna, kei na vuti ni yagona kece. Me qai savata na nona i sulu, ka vuya na yagona ena wai, ena qai savasava kina o koya.

10Ia ena i kawalu ni siga, me kauta e rua na lami tagane kei na dua na lami yalewa yabaki dua ka sa sega ni dua na tikina e ca vei ira, kei na tolu na kilokaramu na valawa digitaki sa veiwaki vata kei na waiwai, kei na dua na i katolu ni lita na waiwai.

11Ia na bete sa veivakasavasavataki me kauta ki na mata i Jiova na tamata sa mai vakasavasavataki kei na veika me vakacabori oqo, ki na katuba ni Vale ni Veitavaki.

12Me qai taura na bete e dua vei rau na lami tagane ka vakacabora me i madrali ni veisausaumi, ka vakakina na waiwai e dua na i katolu ni lita me qai laveta cake me i soro yalovaki ena mata i Jiova.

13Me qai vakamatei na lami ena yasana sa dau vakamatei kina na i madrali ni veisausaumi kei na i soro kama, ena tikina tabu; ni sa nona na bete na i soro ni valavala ca, sa vaka talega kina na i soro ni caka cala; sa ka tabu sara.

14Ia me kauta eso na dra ni soro ni caka cala o koya na bete, ka boroya na vuso ni daligana i matau na tamata sa mai vakasavasavataki, kei na i dovidovinikakana ni ligana i matau, kei na qaqalo levu ni yavana i matau.

15Me qai kauta na bete eso na waiwai mai na waiwai e dua na i katolu ni lita, ka livia ki na qeteqete ni ligana i mawi,

16ka tonia na nona i dusidusi i matau ena waiwai sa tu ena qeteqete ni ligana i mawi, ka kureitaka vakavitu na waiwai ena nona i dusidusi ena mata i Jiova.

17Ia na vo ni waiwai sa tu e ligana, me lumuta kina na mua ni daligana i matau ni tamata sa mai vakasavasavataki, kei na i dovidovinikakana ni ligana i matau, kei na i qaqalo levu ni yavana i matau, ena dela ni dra ni soro ni caka cala;

18ia na vo ni waiwai e liga ni bete, me livia ki na ulu i koya sa mai vakasavasavataki. Ni caka oqo e sa vakayacori kina na cakacaka bibi ni veisorovaki e mata i Jiova.

19Ena qai cabora na i soro ni valavala ca na bete, ka vakayacora na cakacaka ni veivakasavasavataki. Ni oti o ya, me qai vakamatea na manumanu sa vakarautaki me i soro kama,

20ka cabora na i soro kama kei na i madrali laukana e dela ni cabocabonisoro. Me qai vakayacora na bete na veiqaravi ni veivakasavasavataki, me savasava kina o koya e qaravi.

21Kevaka sa dravudravua o koya ka sa sega ni rawata, me qai kauta e dua na lami tagane me nona i madrali ni veisausaumi, me sorovaki kina, ka dua na kilokaramu na valawa digitaki sa veiwaki vata kei na waiwai me i madrali laukana, kei na dua na i katolu na lita na waiwai.

22Me kauta talega mai e rua na soqe se rua na ruve me vaka na ka sa rawata; ia me dua me i soro ni valavala ca, ka me dua me i soro kama.

23Me kauta vua na bete o koya ena i kawalu ni siga me vakasavasavataki kina, ki na katuba ni Vale ni Veitavaki, e mata i Jiova.

24Me qai kauta na lami me i soro ni caka cala na bete, kei na waiwai e dua na i katolu ni lita, ka laveta cake na bete ena mata i Jiova me i soro yalovaki.

25Ia me vakamatea o koya na lami ka taura eso na kena dra ka boroya kina na bebe ni daligana i matau na tamata sa mai vakasavasavataki, kei na i dovidovinikakana ni ligana i matau, kei na i qaqalo levu ni yavana i matau.

26Me livia eso na waiwai na bete ki na qeteqete ni ligana i mawi,

27ka me kureitaka vakavitu ena nona i dusidusi i matau ena mata i Jiova eso na waiwai sa tu ena ligana i mawi.

28Me qai lumuta na bete ena waiwai na vanua vata ga sa boroya kina na dra: oqori ena daligana i matau na tamata sa mai vakasavasavataki, ena nona i dovidovinikakana e ligana i matau, kei na i qaqalo levu ni yavana i matau.

29Na vo ni waiwai sa tu e ligana na bete me qai livia ki uluna me vakasavasavataki kina, ka sorovaki koya ena mata i Jiova.

30Me qai vakacabora o koya e dua vei rau na soqe se ruve me vaka na ka sa rawata,

31e dua me i soro ni valavala ca, ka dua me i soro kama kei na i madrali laukana; ia me sorovaki koya sa mai vakasavasavataki na bete e mata i Jiova.

32Oqo na lewa ena vukuna sa tauvi koya na vukavuka dina ka sega ni rawata na i madrali ni nona vakasavasavataki.

Vakasavasavataki na Vukavuka

33A sa vosa o Jiova vei Mosese kei Eroni, ka kaya:

34Ni o ni yaco ki Kenani, na vanua au sa solia vei kemuni mo ni taukena, ka kunea ni'u sa vakatubura me tete na tavukadiridiri ena dua na vale mai na vanua o ni sa taukena,

35me qai lako o koya sa taukena na vale ka tukutuku vua na bete, ka kaya, “Au sa raica rawa ni tauvi tavukadiridiri tiko na noqu vale.”

36Na bete me na vakarota me ra vagalalataka mada na vale kei na kena i yaya ni bera ni curuma yani o koya me dikeva na tavukadiridiri oqo; de mani okati na vale taucoko me sa tawa savasava. Ni oti o ya, me qai curu i vale na bete me vakadikeva matua.

37Me dikeva na tavukadiridiri o koya; ia kevaka sa tiko ena lalaga ni vale na kena e roka drokadroka se damudamu siyawa, ka vaka me sa kania tiko na lalaga,

38me qai curu i tautuba na bete ka lokataka na vale me siga vitu.

39Me qai lako tale mai na bete ena i kavitu ni siga, ka dikeva; ia kevaka sa teteva na lalaga ni vale na tavukadiridiri,

40me qai vakarota na bete me ra kauta tani na veivatu sa laurai kina na tavukadiridiri, ka biuta ki taudaku ni koro, ki na yasana sa sega ni savasava.

41Me vakarota talega na bete me kari na lalaga ni vale e loma, ia me ra biuta na lase era karia ena taudaku ni koro, ki na yasana sa sega ni savasava;

42me ra qai kauta mai na veivatu vou, me vakaisosomitaka na veivatu o ya ka kauta na lase vou, ka botana kina na vale.

43Kevaka sa basika tale mai na tavukadiridiri ki na vale, ka yaco oqo ni sa kau tani oti na vatu ka sa kari oti na vale ka vakavinakataki,

44me qai lako yani na bete ka dikeva; ia kevaka sa tete na tavukadiridiri, sa sega ni savasava na vale o ya.

45Me qai talaraka sobu na vale o ya ka wili kina na kena veivatu, na kena kau, kei na botani kecega ni vale; ka kauta tani ki na taudaku ni koro, ki na yasana sa sega ni savasava.

46Ia o koya sa curuma na vale ena siga sa sogolati kina ena sega ni savasava me yacova na yakavi;

47kei koya e davo e loma ni vale o ya se kana kina me na savata na nona i sulu.

48Ia kevaka sa curu kina na bete ka vakadidike, ka kunea ni sega ni teteva na vale na tavukadiridiri ni sa botani oti na vale, me qai vakarogoya na bete ni sa savasava na vale o ya, ni sa yali vakadua na tavukadiridiri.

49Ia me kauta o koya e rua na manumanu vuka, na kau sitari, na wa damudamu, kei na isopi, me vakasavasavataki kina na vale.

50Me qai vakamatea o koya e dua vei rau na manumanu ena dua na kuro qele sa tawa tu ena wai savasava.

51Ia me qai taura na kau sitari, na isopi, na wa damudamu, kei na manumanu vuka sa bula ka tonia ena dra ni manumanu a vakamatei, ena beseni sa tawa tu ena wai ka kureitaka vakavitu ki na vale.

52Ena vakasavasavataka na vale o koya mai na dra ni manumanu, na wai mai na wai drodro, na manumanu vuka sa bula, na kau sitari, kei na isopi, kei na wa damudamu;

53ia me sereka na manumanu bula me vuka yani ena dela ni vanua mai na taudaku ni koro. Ni sa sorovaka vakaoqo na vale, ena qai savasava.”

54Oqo na i veivakaro ena vuku ni matenikuli kece sara, na milamila,

55na tavukadiridiri e kunei ena i sulu se na vale,

56na vuvuce, na varivari se na dani,

57me rawa kina ni vakatakilai se sa savasava se tawa savasava e dua na ka.